د. عادل الصادق مكي : فشخرة.. وسمحة المقدرة

مجتمع استهلاكي.. الفرد مننا من يلقى ليهو قرشين.. تمسكو أم هلاهلا.. وتغلبو القعدة ويكوس يصرف القروش وين؟.. فشخار.. بوبار.. يهمو راي الناس وإنهم يتونسو بالصرفو قدر شنو؟.. أفراده أقرب إلى قطيع القرود.. من حيث الحكا والمحاكاة.. نخلق نجوم من راسنا دا ونقعد نلف حولها.. الشافع يلدوهو.. في مستوصف وين ما عارف؟.. مستوصف نجم.. البيلدوهو في المستشفيات الحكومية دا ذاتو ما محسوب.. وحقو ما يدوهو الجنسية ولا رقم وطني.. وإن جاء التعداد.. موظف التعداد يسأل الأم: ولدك دا مواليد وين؟ تقول ليهو مواليد الراهبات يا أخوي.. وكدا سمحة المقدرة.. والوليد يكبر يطهروهو عند إسماعيل ( والطهرني ساكن حي الدومة).. والما طهرو إسماعيل يستوجب عليه إعادتها أو دعوهو (سليم).. الروضة في أغلى روضة.. ومدارس أجنبية.. والجامعة في أغلى جامعة حتى لو كان الولد تور الله في برسيمو.. يتخرج الشغل ذاتو ما في أي مكان.. شركة ليها شنة ورنة.. ولما يجي يعرس.. المأذون ذاتو ما أي مأذون.. المأذون شيخ فلان المعروف.. العرس.. في أغلى صالة.. الملايين تتطاقش للحفلة والعشاء.. والفنان ترباس.. والعروس شيلتها من دبي.. وتحننها وتمكيجها غادة شرفي.. تعلمها الرقيص قسمة.. والما رقصتها قسمة عرسها ناقص وعليها إطعام ستين مسكين.. السكنة في حي راقي.. والفرش من مارومينا يا ما تجينا.. يتغير سنوي!! الصلاة دي.. صلاة الله دي.. مافي أي جامع.. في جامع الشهيد.. وإن فاتتو يعتبر نفسو ما صلى.. ويصلي بيهو التراويح المقرئ المليوني شيخ فلان نجم (عرض عليه أربعة مليون جنيه عشان يصلي التراويح في رمضان بأولاد المصارين البيوض في أحد مساجد الطبقة الراقية).. والما صلى بيهو شيخ فلان صلاتو ناقصة.. يكبر ويمشي الحج.. والحج ما بي بابور البحر.. حج خمسة نجوم.. حج فاخر ( حليل زمن الحج بالجمل والزول يودعوهو ويقعدو يبكو.. يمشي ويجي في ستة شهور).. يمرض ويجيهو فشل كلوي ويرقد في أغلى مستوصف خاص.. دا لو ما ودوهو الأردن.. والبيزوروهو ذاتم ما ناس كشا مشا… يموت.. الموت ذاتو ما بيشبه موت الناس.. وتقول إحدى قريباتو الكضابات ومن ضمن مهامها الإعلام.. (وحات الله لمن روحو مرقت نور بق من وشو.. واشهد.. وضحك ..ومات).. يصلي عليهو شيخ فلان المقرئ المليوني برضو.. (ما عارف سعر صلاة الميت بكم عندو؟).. لكن ما بتفرق معانا.. المهم لما بناتو ونسوانو يجن يتونسن يقولن صلى بالجنازة شيخ فلان.. ويا ريت لو يجيبو شيخ نجم ومعروف ينضم كتير عند راسو قبال ما يدفنوهو.. ويدفنو النجم درمة.. ولو ما دفنو درمة يكوسو لي درمة وين.. ويحفتوهو يمرقوهو بعد ما دفنوهو ويدفنو تاني.. أي سوداني لاقتو الخطوات الفاتت دي.. لو ما كلها بعض منها.!!

د. عادل الصادق مكي
الباب البجيب الريح- صحيفة اليوم التالي

تعليقات الفيسبوك

تعليقات

الرد

لن يتم نشر عنوان بريدك الإلكتروني. الحقول الإلزامية مشار إليها بـ *