محمد عبد الماجد : الزول وقت يكون مفلس لو ضرب ليك بقول ليك أرجع لي

حدايق السلام دي ما خلو فيها ركن..يتحولو فيها من ضل لي ضل..كملو الكلام
“””””””””””””””””””””””””
ناس المريخ المحترف وقت يعملوا ليه (الكشف) الطبي قالوا ليك بدفعوه نص قيمة المبلغ
“””””””””””””””””””””””””””””
بكري المدينة قالوا دفعوه رسوم الأورنيك…قالوا ليه نحن بعد الـ (3) مليارات جنيه رسوم تسجيل ما عندنا ليك
“””””””””””””””””””””””””””””””
المريخاب يجيبوا في لاعبين كبار السن – تقول عاوزين تقلبوه فريق للمعاشيين
“””””””””””””””””””””””””””””””””””””””
• تسجيلات المريخ دي – تسجيلات (فلس)….إلّا يتموها ليكم بـ (ليلة شعرية).
• خلوه يقدمها ليكم متوكل أحمد علي (بتكون عندو فكرة).
• لو ما عندو فكرة بنجيب ناس التحالف (ديل كمان في الشعر ما بتصاقعوا).
• حافظين صاح.
• نحن زمان وقت الشغلة تغلبنا بنعمل لينا (ليلة شعرية) ، ونقعد ننداح ليك.
• في الإندياح نحن صعبين.
• ولا بنتفاهم.
• ما بنخلي لينا بيت شعر حايم.
• كانت أيام.
• المريخاب هسع محتاجين ليهم لي (ليلة شعرية).
• سلك لو قنع منكم بكتب (شعر).
• مالو ومال (ضفر).
• هسه يا سلك لو بقيت (شاعر) ما احسن من الشغلة دي.
• التسجيلات دي يا مريخاب لا بتقدروا عليها ولا حاجة – ولا عندكم ليها (رقبة).
• تموها شعر.
• قالوا ليك واحد خطب ليه واحدة – كل يوم طالع بيها على الحدايق.
• حدايق السلام دي ما خلو فيها ركن.
• يتحولو من ضل لي ضل.
• كملو الكلام.
• ما عارفهم بقولوا في شنو؟.
• الولد في الحدايق كلو يوم بسمعها ليك (قصيدة).
• ما خلى ليه (قصيدة).
• البنت في السنة الاولى كانت (منهدشة) بالشعر دا.
• سمعها ليك كميات مبالغ فيها من (الشعر).
• يقول ليها في الشعر ويحللوا ليها.
• في السنة التانية – البنت اضايقت شوية من حكاية الشعر (الكيري) دا.
• قالت ليه انت (الشعر) ساعدو بي (بسكويت)…جيب لينا (بسكويت) نهضم بيه الكلام البتقول فيه دا.
• على الاقل – شعرك يقع لينا..بدل نسمعو على الجوع كدا.
• بقى كل ما يقول ليها قصيدة يشتري ليها بسكويت.
• البنت تسمع الشعر وتاكل البسكويت ، وترجع البيت.
• عاجبها البسكويت – ما الشعر.
• السنة التالتة – البنت نفسها مرقت من (البسكويت).
• البنت اضايقت.
• قالت ليه ما معقول يعني كدا – اصلو دي ما طريقة ، نحن ح نعدها (شعر) لمتين.
• الولد قال ليها : خلاص نسيتي (البسكويت).
• نسيتي (البسكويت) البجيبو ليك صندوق – صندوق…وانتي تلهطي فيه.
• البنت قالت ليه (البسكويت) دا ما بفتح ليه بيت – اتحرك شوية.
• الولد مع الشعر والبسكويت – بقى يجيب ليها (حاجة باردة) كل اسبوع.
• البنت في الشهر الاول انشرحت شوية.
• لكن بعد شوية البنت برضو لقت المواضيع دي ما بتفتح ليها (بيت).
• قالت ليه نحن (الشعر) دا لازم نوقفو…لازم تعمل ليك خطوة عملية.
• الولد قال ليها خطوة عملية اكتر من (الخطوبة) – انتي جنيتي – انا اعمل شنو؟ انا اتقطع…انتي ما شايفة البلد حالها واقف.
• البنت قالت ليه : لازم نعقد – نحن ح نقعد كدا لمتين؟.
• الولد قال ليها انا لو عاوز (اعقد) كنت خطبت اختك – الجابرني عليك شنو؟ – عاملة عيونك متل (الفتق) الفى القميص.
• البنت اتصدمت..وقالت ليه والله لو عارفك زول مخادع كدا ..(بيت شعر) واحد ما كنت سمعتو ليك.
• تغشني – نازل وطالع معاي من حديقة لي حديقة وتسمع فيني في الشعر من (لبيد) لي (امجد حمزة)…انا الجابرني شنو على (الشعر) دا؟.
• الولد اتفجر ليك – قال ليها خلاص نسيتي (البسكويت).
• هسع البسكويت الجبتو ليك ما بعمل ليه (كرتونة) – عملت ليك (جضوم) من البسكويت.
• نسيتي (الحاجة الباردة) البشتريها ليك كل خميس.
• نسيتي.
• نسيتي قبل (7) شهور اشتريت ليك (غباشة).
• انت عارفة الغباشة بي كم؟.
• لو عارفه سعرها ما بتقولي كلامك دا.
• قالت ليه بي كم؟.
• قال ليها بـ (5) جنيه.
• قالت ليه والله ما كنت قايلك بتعزني للدرجة دي.
• ح اديك سنة تانية عشان الغباشة دي – لكن اتحرك شوية.
• هسع ناس المريخ قطعوا قروشهم في (الغباشة) – وخلوا ليك ناس بلة جابر يتلفتوا.
• كبوا قروشهم في بكري المدينة – مشاركة في زواجه ما قدروا يعملوها ليه.
• بكري المدينة دا زي (الغباشة).
• انقطعوا.
• الزول وقت يكون شايل ليه قروش محدودة ويدخل بيها السوق ، يعمل حسابو – ما يشتري من اول مرة.
• يعني بعد ما يلف السوق كويس – من ثم يشتري ، ما يبقى شفقان ويشتري من طرف.
• يصبر.
• اول دكان يقيف فيه – يقطع قروشو فيه ، ويقعد يتلفت.
• هسع ناس المريخ عملوا نفس الحاجة.
• كبوا قروشهم في اول ايام التسجيلات في بكري المدينة – وقعدوا يتلفتوا.
• جماعتكم عليكم امان الله (الرديف) ما قادرين يسجلوا ليه لاعب.
• فاتحين خشومهم متل (المراوح).
• الله – انت تاني عاوز تجيب لينا سيرة (المراوح).
• عندنا زول في الحلة عندو (مروحة) من سنة 54م.
• مروحة وقت يكون عاوز يشغلها – تشيل هم للسقف.
• مروحة فيها (جناح) واحد.
• وقت يشغلها في (5) – لو قلبك ما قوي تقول البلد ضربوها.
• الزول (المفلس) واضح.
• ظاهر – ولا بندس.
• شفتوا الزول من يضرب ليك – ويقول ليك ارجع لي – اعرف طوالي انو (مفلس) وحالتو صعبة.
• ناس المريخ شغالين بي نفس النظرية.
• يضربوا للزول ويقولوا ليه ارجع لي.
• قالوا ليك ناس المريخ المحترف البجبوه بقطعوه التذكرة.
• ما بقطعوا ليه التذكرة.
• المحترف وقت يعملوا ليه (الكشف) الطبي قالوا ليك بدفعوه نص قيمة المبلغ.
• ما بدفعوا ليه قروش الكشف الطبي.
• هم بدفعوا نص – والمحترف بدفع نص.
• وكمان لو المحترف طلع (مصاب) بدفع القروش كلها.
• انتوا قايلين اخباركم ما بتجينا.
• نحن اي حاجة عارفنها.
• بكري المدينة قالوا دفعوه رسوم الاورنيك.
• قالوا ليه نحن بعد الـ (3) مليار جنيه رسوم تسجيل ما عندنا ليك.
• الجماعة اتقطعوا.
• هسع عندهم (12) خانة فاضية في (الرديف) ما عارفين يتموها بي شنو؟.
• المحترفون يجيبوا في فايضة العمالة.
• واحد (ملجن).
• وواحد كبير في السن.
• وواحد قال ليهم انا ما عاوز منكم قروش.
• بس سجلوني مقابل تشوفوا لي (سكن).
• الهلال يجيب في المحترفين من البرازيل.
• دوريهم شغال – حار – حار.
• وانتوا يا ناس المريخ تجيبوا لي في كبار السن – تقول عاوزين تقلبوه فريق للمعاشيين.
• ديل من غانا – بجيبوا الزول الصلاحيتو انتهت.
• بلة جابر بقى اصغر لاعب في المريخ.
• فريقكم دا الموسم الجديد (الشوط التاني) ما بنتظروا ليكم.
• بكونوا كلهم ناموا.
• كبار السن اصلا بنوموا بدري.
• ما بنتظروا ليكم عشرة.
• …………..
• ملحوظة : الباشا قال ليهم لو عاوزين تعيروني – غيروا لي الشريحة عشان الناس ما ياكلو لحمي.
هوامش
• البرازيلي كروز وصل قطر.
• وينتظر ان يصل ان شاءالله صباح اليوم للخرطوم.
• مفروض يودوه اديس ابابا طوالي يشوف لينا موضوع (المفاوضات) دي ماشه كيف؟.
• كروز دا لو وصل الليلة – بلة جابر ح يطلب من المريخ يعيرو الى مريخ الفاشر.
• بلة جابر تاني ما بقعد ليكم في البلد دي.
• بكري المدينة راحت عليه.
• كان ح يلعب مع (كروز) – هسع ح يلعب احمد ابكر.
• احمد ابكر طبعا ما قاعد يلعب في المريخ.
• وبكري المدينة برضو ما ح يلعب ..بقرار من الفيفا.
• يا جماعة ما تحاولوا تبدأوا لينا الدوري الممتاز من اول ديسمبر.
• نحن ما عاوزين اعداد.
• جاهزين نحن.
• كروز دا جاء من الدوري البرازيلي الى السودان.
• ما محتاج اي لولوة.
• ح يوقع ويرجع يكمل دوريه في البرازيل.
• زول جاهز يعني.
• التسجيلات باقى ليها 5 ايام.
• نحن نستقبل لاعب من البرازيل.
• والمريخ بستقبل لاعب من غانا.
• الفرق كبير.
• مدرب المنتخب البرازيلي دونغا – تاني ح يتابع مباريات الهلال.
• الموضوع دا ما لعب.
• ولا نحن فاضيين للكلام دا.
• …….
• عاجل : مفروض تذاكر تمارين الهلال يبدأوا يبيعوا فيها من الآن – افتحوا شبابيك التذاكر.

وإن طال السفر – محمد عبد الماجد
صحيفة قوون

تعليقات الفيسبوك

تعليقات

الرد

لن يتم نشر عنوان بريدك الإلكتروني. الحقول الإلزامية مشار إليها بـ *