بابكر سلك : صورة الباسبورت بتشيل عشرة يا فطومة

> اذا عدنا لمباراة الخرطوم
> لن نجد سببا للاداء الباهت غير الاستهتار
> التباهي والاختيال كانا اسباب للانهيار
> لان النفوس بعضها هش جدا
> ولا يتحمل النجوميه
> والاداء الجاد يفترض ان يولد فيهم الرغبه في التطور والمستوي المتصاعد
> ولكن الطموح محدود
> ولعمري هي اسباب الشخصيه الباهته لمعظم لاعبي المريخ
> الامر الذي يجعل الاحساس بالنديه متوافراً عند خصومهم
> برغم ان النديه منعدمه
> لا يقارن المريخ بغيره
> فقط هؤلاء الاشباح هم من يجعلون غير المريخ يظن نفسه نداً للمريخ
> ايها الناس
> الثقه الزائده بالطبع تختلف عن ذلك الاستهتار والتهور الذي يؤدي به المدعو امير كمال
> وليعلم ذلك الفتي انه لم يصل بعد لربع مستوي كمال عبد الغني
> وانه ان اراد ان يصل لذلك المستوى عليه بذل الكثير
> والاداء بجديه ورجوله وبدون استهتار ولا استخفاف
> فعندما استخف بصلاح الامير
> لقنه صلاح درسا في وضع الانف دي علي الارض
> راوغه مراوغة الدافوري
> يجب علي امير ان يستفيد من الدروس
> اما رمضان
> فالاحرف اقيم من المستوي الذي قدمه يوم الخرطوم
> وكذا وانغا وعلاء
> حتي جمال سالم الذي يتميز بالجديه
> اصبح مستهترا جدا
> فهل يعلم المريخ الناس الاستهتار ام ماذا ؟؟؟
> ايها الناس
> كنت اشك في وجود غارزيتو علي الخط
> والمريخ يؤدي بتلك العشوائيه
> فتدخل غارزيتو في الوقت القاتل
> وقتها كان المريخ مقتول
> فقام بادخال اوكرا قبل النهايه بسبع دقائق
> وزي ماقال صديقي جحا
> غارزيتو زي السواق البغير الترس بعد العربيه توحل
> اصحي يا غرزه شويه
> وناسنا ديل الببدأ كعب
> بستمر كعب ما بتحسن اصلو
> من اول خمسه دقائق البلعب كعب
> عجاج كرعينو
> لكن رمضان حيرنا
> قال انتظر التكميليه
> بي مستواك ده يا رمضان
> التكميليه الا تكملها في رابطة كرري
> ايها الناس
> بالعربي بالفرنسي بالسواحلي
> جمال سالم ده كلموهوا
> قولوا ليهو الاستهتار ما حبابو
> وما احببناك الا لجديتك
> لو داير تغير طبعك
> فنيلتنا في مكانها وكمبالا قريبه
> لاعبون لم يقدروا المسؤوليه
> ولم يحترموا الجماهير
> ولم يوفوا الشعار حقه
> المهم
> بالامس كردنه التقي الأهله الشرفاء بدار النادي
> ان شاء الله يكون كلمهم بالشركة
> وبالنقل التلفزيوني
> وببواطن الامور الاخرى
> لأن الاهلة الشرفاء يريدون الحقيقة
> دايرين يدخلوا في الصوره
> ما معقولة الصوره يكون فيها كردنه والناطقه وروشا
> وباقي الكرت فاضي
> الكرت بشيل
> والصورة بدون فلاش بتوضح
> النفوس كان اتطايبت
> صورة الباسبورت بتشيل عشره يا فطومه
> وموضوع الشركه دي حارقني شديد
> ما بخليهو ولو اكتب في الواتس
> لو اكتب في الفيس
> لو اكتب في الحيطه بي فحمه
> لازم الاهلة الشرفاء يعرفوا الحقيقه
> ولا ايه يا صديقي ماجد اسماعيل المحامي؟
> ايها الناس
> ان تنصروا الله ينصركم
> اها
> نجي لي شمارات والي الخرتوم
> كان شفت يا والينا
> في ناس ما مصدقين قصة المدرسه المزوره
> قالوا وهمه ساي لصرف الاهتمام يا والينا
> وتبريرهم انو لو القصه حقيقه
> مافي مسؤول بقعد ولا دقيقه
> لانو ما ممكن البرود يصل بالمسؤولين للدرجه دي يا والينا
> وفي ناس يا والينا
> قالوا بتحصل وما بعيده علينا
> مدام الجقور اكلت الكبري علينا
> شنو البخلي المدرسه ما تتزور فينا
> شرف الاستقاله يا والينا
> زي شرف الكلمه الحنينة
> بضيف للزول ما بخصم منو يا والينا
سلك كهربا

ننساك كيف وكلنا عارفين انو الاستقاله اشرف من الاقاله بعد الثقاله
والي لقاء
سلك

تعليقات الفيسبوك

تعليقات

الرد

لن يتم نشر عنوان بريدك الإلكتروني. الحقول الإلزامية مشار إليها بـ *