بابكر سلك : صقر قريش 3/1000

> ايها الناس
> يفترض ان نواصل الحديث عن جريمة الاختلاس الشهيرة بصقر قريش
> ولكن جدت امور اجبرتنا على تأجيل الحديث عن الجريمه الشهيره
> في موضوع اهم
> شمار من امو
> معروف ان عدم اتباع الوسائل والسبل واللوائح في ما يتعلق بالاطعمه
> فيه اضرار كبير بصحة المستهلك
> لذا حماية المستهلك تعمل ليل نهار من اجل ضمان توفير اطعمه صالحه للاستهلاك الادمي لينا
> ولكن هناك من يعمل ليل نهار ايضا عكس اهداف حماية المستهلك
> ويقدم للمستهلك المسكين اطعمه ممكن توديهو في داهيه
> ومن اخطر تلك الاطعمه
> الذبيح الكيري
> والكيري هو الذبيح خارج السلخانه
> واشتراط الذبيح في السلخانه
> ليس من اجل الرسوم
> وانما من اجل الحفاظ على صحة المستهلك
> والكشف علي «البهيمه» بيطرياً يؤمن لنا السلامه
> لان بهيمة الانعام ممكن تكون مصابه بامراض خطيره تنتقل الينا
> هو نحنا لاقين لحمه كمان لما تجيب لينا المرض؟
> حميات فحميه ومالطيه ووهميه تسببها البهائم المريضه
> وتنتقل منها للمواطن المسكين
> زول حق ربع كيلو اللحمه في تلتله
> لما يوفروا تجيب ليهو الاذى؟
> والذبيح خارج السلخانه فعل شين وقبيح
> ولا يقوم به الا عديم ضمير
> وزول ساي ساكي القروش باي وسيله
> بعضهم يقوم بها وهو جاهل بمضارها
> والبعض الآخر يقوم بها وهو مستهتر بمخاطرها
> والبعض الثالث يمارسها استخفافاً بحياة الناس وحباً في جمع المال
> والكيري عبارة سوقيه يستعملها الجزارون
> فيهم ناس بضبحوا كيري
> وبقلدوا ختم السلخانه في بطاطسة
> ويبيعوهوا للناس في السوق
> وفي جزارين بجيبوا ربع عجل من السلخانه
> يعلقوهوا وسط عشره تيران كيري
> يبيعوا من الكيري ويخلوا ربع العجل بي ختمو تضليل للعداله والزبائن
> ولكنهم جميعا في نار جهنم خالدون
> ده لعب بصحة الناس وبحياة الناس
> نحنا ضبحنا الف خروف في الاستاد
> كيري واحد ما فيهم
> ضبح نهارا جهارا
> وفي وسط البلد
> ضبح الليل اب كراعا بره ما بنعرفوا
> ووين ؟؟؟
> في خمسين !!!!
> خمسين والجوكر بايظ يا عمك
> كلو شي عرفناهو
> كمان جابت ليها كيري !!!
> المهم
> اعدادنا واستعدادنا لمعركة العبور الافريقيه يجري علي قدم وساق
> وحكاية نتأهل دي مسألة وكت
> قلبنا ثابت
> لانو نصرنا بامدرمان لم يكن محل شك
> ولم يكن مهزوزا
> كان ثابت
> وثابت هو الاصل
> كيري كمان ؟؟؟؟
> والله يا هو الفضل
> المهم
> في الجمعيه العموميه تمت ممارسه ديمقراطيه راقيه
> نشيد باعضاء التحالف ورموزه الذين قدموا درساً في فنون الديمقراطيه
> ونشيد باعضاء المجلس الذين قدموا سعة صدر فاقت حد الخيال والجمال
> والتحيه لاعضاء الجمعيه الذين مارسوا حقهم بادب اشادت به المفوضيه
> فقط لدي ملاحظه
> استعجال قفل باب النقاش والتصويت عليه
> ليس من مصلحة الكيان ولا من مصلحة الاعضاء
> يجب ان تستمر المناقشه طويلاً
> نقتل خطاب الدورة بحثاً
> بالتأكيد نستفيد
> طالما الادب والاحترام هما اسياد الموقف
> شكراً المريخ المعلم علي هذه المحاضرة الراقيه
> وعلي البقيه ان تتبع
> فالمريخ هو القائد والرائد دوماً
> المهم
> تمنيه واربعين ساعة الكوكي لسه ما تمت؟
> ساعتكم دي ماشه بي درداقه؟؟؟
> جية الكوكي بتشبه الجوهره الزرقاء
> الراجي الجوهره تقوم
> يرجي طيارة الكوكي تنزل
> هو الكلام بفلوس !!!!
> المهم
> اوضحت ميزانية المريخ
> ان جيمي «الواجع الناس ده»
> قد تنازل عن واحد وتلتين مليار للمريخ خلال السنوات من 2011 الي 2014م
> قلت لي خمسه وعشرين في الميه من الجوهره؟؟؟
> الجواهرجي
> اسم يعجبني من انا صغير
> الجواهرجي
> ومرة وانا في الابتدائي
> قريت في لوري مكتوب
> الجخاخ
> عجبني برضو اسم الجخاخ
> كنت كلما اعمل لي عربية جالون بكتب فيها الجخاخ
> الاسم كان عاجبني شديد
> وما كنت عارف معناهو
> عرفتو قريب ده
> عرفتو لما شفتو
> شفت الجخاخ المابخاخ
> المهم
> بكري جاهز لي مباراة العبور
> وعبور من غير قون من بكري ما دايرنو
> باقي الانجوليين كتار
> وما بكتلهم الا بكري
> والجري ورا بكري
> والعقربه
> اسي الكيري ده في الضلمه دي يمكن ضارباهو عقرب ؟؟
> الناس دي تاكل ساااااي !!!!
> ايها الناس
> ان تنصروا الله ينصركم
> اها
> نجي لي شمارات والي الخرتوم
> كان شفت يا والينا
> واحد مجنونا لينا
> شاف بوسترات المرشحين معلقات لينا
> قام رسم روحو في بوستر يا والينا
> والرمز اسطوانة الغاز الواحشنا يا والينا
> وعلقو في شجرة لينا
> كاتب فيهو يا والينا
> انتخبوا مرشحكم رمز الاسطوانه
> من اجل حل ازمة الغاز المجهجهانا
> من اجل بسمة وجوه قرفانه
> من اجل ابادة جقور ماكلانا
> من اجل حياة كريمه للمعانا والما معانا
> من اجل اقتسام ريع بلدنا بامانه
> من اجل قفل المواضيع البقت لبانه
> من اجل بلد تلمنا ونقول لامانا
> من اجل محاربة الفساد بالنزاهه والامانه
> من اجل مجانية العلاج وحكومية الاجزخانه
> من اجل عودة قفة الخضار والخضره والشمار واللحم مختوم من السلخانه
> المهم يا والينا
> وقفنا كلنا قرينا
> جا واحد بتاع بحر يا والينا
> قرأ زي ما قرينا
> قال صدقوني الاسطوانه بتفوز بتفوز
سلك كهربا

ننساك كيف ولو الاسطوانه ما فازت حا نرجع للاسطوانه ديك تاااااني
والي لقاء
سلك

تعليقات الفيسبوك

تعليقات

الرد

لن يتم نشر عنوان بريدك الإلكتروني. الحقول الإلزامية مشار إليها بـ *