محمد عبد الماجد : رمضان عجب مالها إصاباتو كترت كدا؟

• مرات في تلفونك ..الموضوع دا بيحصل.
• يضرب ليك زول…(شنبو متل العراضات من القون للقون).
• شنبو متل (كنبة) الاحتياطي …الجهاز الفني بالاحتياطي كلو ممكن يقعد في (شنبو) دا.
• الشنب بيظهر في خدمة الرسائل ..(عارفكم كان ح تقولوا لي عرفت شنبو كيف؟).
• لو ما بعرف (الشنب) ما بعرف (الكنب).
• في تلفونات حديثة شديد طبعا.
• اول شيء الزول الضارب ليك يقول ليك معليش دا تلفون (تهاني).
• تقول ليه بي كل طيب خاطر ..ابدا والـلـه.
• بعد تلاتة يوم يضرب ليك زول تاني…(بدون شنب).
• يقول ليك معليش دا تلفون (سماهر).
• تقول ليه سماهر منو؟…(الموضوع كبر).
• يقول ليك سماهر اخت (تهاني).
• هو يعني نحن عرفنا (تهاني) عشان نعرف ليكم (سماهر).
• ناس التلفونات ديل عندهم حاجات غريبة.
• المريخاب ديل مالهم؟.
• مالهم بتخابطوا كدا؟.
• لمن الهلال سجل مصطفى عبده ..قالوا مصطفى عبده (مكسور)..تاني في (المقصورة) ما بدقها.
• ودقاها.
• ولمن الهلال سجل باكمبا ..قالوا باكمبا كراعو واحدة ..والكراع الواحدة ذاتها مضروبة.
• باكمبا جاب قون باليمين في المريخ…بالطرشه.
• ورجع جاب ليك قون بالشمال في المريخ.
• ناس المريخ الى الآن الشغل دا ما وقع ليهم.
• الهلال لمن سجل حمودة بشير..المريخاب قالوا اهـ.
• قلنا ليهم الحاصل شنو؟.
• قالوا حمودة بشير (مصاب)…شهر ما بلعبو ليكم.
• الغريبة ان حمودة بشير الى الآن بتألق مع الاهلي شندي ..وبقدم في محاضرات اصابات الملاعب.
• مرت كم سنة كدا.
• وجينا تاني وسجل الهلال من المريخ نصرالدين الشغيل.
• تعرفوا (حنك) المريخاب كان شنو؟.
• المريخاب قالوا نصرالدين الشغيل (مصاب)..في استديو تاني ما بيلعب.
• إلا يقعد يحلل ليكم المباريات.
• الآن نصرالدين الشغيل افضل ارتكاز في البلد.
• ما سائل ليه في زول.
• هسع رمضان عجب …بعمل في نفس الحركات.
• رمضان عجب عملها ظاهرة.
• رمضان عجب بقى كل (48) ساعة يعمل ليك فيها مصاب.
• وانا ما بقدر ألعب.
• وعندي رباط صليبي ..(نفس الحركات الكان بعمل فيها حمودة بشير).
• والجماعة يتجرسوا ليك.
• انت يا رمضان عجب (17) يوم غالبك تصبرهم مع الجماعة ديل.
• اصلو ما في داعي لموضوع (الاصابات) دي.
• يا زول اصبر.
• يا زول اركز.
• يا زول كمّل عقدك ..(نحن حركات بكري المدينة دي ما بنعملها).
• انت الجماعة ديل مستحملهم تلاتة سنوات ..ما عاوز تستحملهم (17) يوم.
• وإلّا عشان انت عارف يا رمضان عجب ..ان مسرحية (الاصابات) دي هي الطريق الى كشوفات الهلال.
• غايتو الزول وقت يكون ما عاوز ليه زول بكون ظاهر.
• شغل (القنع) ظاهر.
• موضوع رمضان عجب دا ذكرني ليك بي موضوع كدا.
• عندنا زول في الحلة قالوا ليه لازم تتزوج بنت عمك.
• لازم تغطي قدحك.
• زولكم قال ليهم (قدح) شنو؟..هي مونة وإلا عرس؟.
• المهم حاول يقنعهم ليك.. قال ليهم انا ما قاعد افكر في العرس في الوقت الحالي.
• ومرات يقول ليهم ..عاوز احجج الوالدة.
• ومرات يقول ليهم ..عاوز اكمل البيت ..لو ما عملت البيت تاني دور ما بتزوج.
• كل ما يجي عيد هو يشوف ليه (مراقة) بالشكل دا ويقولها ليهم.
• عشر سنوات بالطريقة دي.
• لمن البنت عرسوها.
• صاحبكم تاني يوم اعلن خطوبتو.
• هسع رمضان عجب ..بعمل في نفس الحركات.
• مرات يقول ليهم مصاب.
• ومرات يقول ليهم ما بقدر ألعب.
• ومرات يقول ليهم ..عندنا زول عيان.
• حركات الزول المتخارج ظاهرة ..وواضحة ..افهموها يا مريخاب.
• الشيء الجابوه لينا ..قالوا مجلس المريخ اجتمع بي رمضان عجب ..وقالوا ليه انت عاوز شنو؟.
• قال ليهم انا عاوز عربية اخر موديل.
• قالوا ليه ما في مشكلة ..بنجيب ليك العربية الاخر موديل ..تاني عاوز شنو؟.
• قال ليهم عاوز اكمل البيت سبع طوابق.
• قالوا ليه بنكمل ليك البيت سبع طوابق ..تاني عاوز شنو؟.
• قال ليهم عاوز رصيد في البنك.
• عملوا ليه الرصيد في البنك.
• وتاني يا رمضان.
• اتكلم ما تخجل ..قول يا رمضان.
• رمضان قال ليهم عاوز امشي الهلال.
• جمال الوالي قام ليك على حيلو ..قال ليه شوف دي الحاجة الوحيدة الما بنقدر نعملها ليكم.
• انتوا الزول وقت يكون ما عاوزكم …يعمل ليكم شنو اكتر من كدا؟.
• قال ليكم انا مصاب ..ما فهمتوه.
• انا عيان ..ما فهمتوه.
• رمضان عجب قالوا قال للمريخاب عديل كدا ..انا عاوز لي (بزازات).
• يا جماعة ما تفهموه اكتر من كدا يعمل ليكم شنو؟.
• ……….
• ملحوظة : يطلع ليكم (بيان) يعني.
• هوامش
• الليلة مساحة الاعلان ما خلت ليها حاجة للجقور.
• عشان كدا نتاوق بس ..ونتخارج.
• اعلام المريخ حاول يعمل ليه (عاصفة حزم) بين كيبي ومعتصم.
• انتوا يا جماعة ما تشوفوا بلة بتاعكم وين؟.
• انتوا ما تشوفوا تراوري.
• تقول جايبنو (مهندس صوت).
• اعلام المريخ اصلا ما عندو قدرة او شجاعة يناقش ليه مشكلة في المريخ.
• الاعلام كلو تحت ادارة جمال الوالي.
• الحمدلـله ان اعلام الهلال متعدد المشارب وكل زول عندو رأي مختلف.
• الكاردينال دافع ليه (40) مليار جنيه ..وبرضو بتاهجم من اعلام الهلال.
• شفتوا اعلام الهلال راقي كيف؟.
• ………..
• عاجل : انت يا رمضان عجب لو ما عاوز ليك مشكلة ساكت ..البفرحك شنو بـ (الجوهرة الزرقاء).

تعليقات الفيسبوك

تعليقات

مقالات ذات صله

الرد

لن يتم نشر عنوان بريدك الإلكتروني. الحقول الإلزامية مشار إليها بـ *