بابكر سلك : الحوثيون 2/1000 جنيه الدمغة

> لما تقيف قدام خزنة حكوميه لسداد رسوم
> بعد يوريك رسومك
> بقول ليك جنيه تاني
> تقول ليهو ليه ؟؟
> يقول ليك جنيه الدمغه
> ولو رسومك عشرة مليون
> يقول ليك الجنيه اهم من العشره مليون
> دي بس ياها قصة جنيه عمك شبشه
> جنيه الدمغه
> الوحيد الضامن الهلال يقبضو
> ابقوا عشره علي جنيه شبشه
> جنيه الدمغه
> اهم من كل الادعاءات والعنتريات والفلاشات
> عمك شبشه اذا قال فعل
> من التجارب
> وغيره اذا قال زاغ
> وبرضو من التجارب
> معقوله شركه تتنازل عن ارباحها ؟؟؟
> شركة صلات طيبه!!!
> طيب وكت بتتنازل عن ارباحها وبتشتغل ساي
> كان يسموها شركه حاسين بيكم
> بدل فو هونغ وطوطحانيه
> غايتو فو هونغ الفي النت يا ميزو
> بتعمل افضل زحلقانيه في الدنيا
> بتزحلق ليك تلاته تلاته
> تخيل في الافتتاح بتاع الزحلقانيه
> كردنه وفطومه وروشا
> متزحلقين وش
> عماد الطيب ما بتزحلق
> لانو ما بكلموهوا بي شي الا يكون مكتوب عشان يمضي وكده
> لكن الزحلقه ما مكتوبه
> غايتو يا عمده
> خليك واقف بعيد وامسك جنيه شبشه قوي
> الدمغه يا عمك
> اها
> فطومه اختي
> ابعدي عن الاستاد في اليومين دي
> البرجم منتشر وهااااايج
> تقوم تجيك عدوي من العمال ديل.. وتبقي مشكله
> الببرجم كبير بتعب شديد
> والاثر ما بروح نهائي
> والوش ببقي زي الحته الحوالين استاد الهلال
> حفره وحفره وبينهم حفره
> المهم
> الجماعه لسه بتكلموا عن قضية بكري
> وقالوا ماشين الفيفا ولوزان
> اغشوا الحصاحيصا معاكم يا روشا
> محمد سيد أحمد عازمكم غدا
> فيفا بالفا؟؟
> ايها الناس
> الناس ديل ما فاهمين ولا ما دايرين يفهموا؟؟
> قلنا ليكم قواعد انتقال اللاعبين داخل الاتحاد تختلف عن قواعد الانتقالات بين اتحادين مختلفين تابعين لدولتين غريبات عن بعض
> بكري لو جري
> اذا لحقتوهوا شكوتكم صحيحه..البجري وراهو منو ؟؟؟
> اتفرغوا لي جنيه شبشه ده وشوفوا حاتتموهوا من وين
> الجري ورا بكري ما بجدي يا كردنه وروشا ومجدي
> المهم
> روشا في محاولة للضغط علي مجدي واسامه
> تحدث عن الانتخابات والدوائر
> كأنو الاهله الشرفاء كلهم موجودين في السجل الانتخابي
> وكأنهم رهن اشارة روشا يدوا منو في الانتخابات
> ياروشا العب غيرها
> المهم
> تعجبني جوهرة المنطقه الصناعيه
> وتذكرني بايام مضت
> زماااان لما كنا صغار
> مصنع الظهره كان غرب استاد الهلال مباشرة
> كان فيهو ناس المرجوم منقزه
> والموتر البيسيه لا انساه
> ومصنع الجوهره للظهره برضو ما بنساهو
> اسألوا دافع جنيه الدمغه عم شبشه
> بكون متذكروا
> ايها الناس
> مواد القانون التي تحكم انتقال بكري للكمريخ كتيره
> والتي تؤكد صحة تعاقده مع المريخ كتيره
> والتي تبين بطلان الورقه التي قطعها كردنه من راسو وقال لبكري امضي فيها
> منها
> الماده 91/1 من قانون المعاملات المدنية لسنة 1983 والتي جاء فيها:
> يكون العقد باطلاً اذا اختل فيه ركن بأصله او بوصفه، وذلك اذا صدر من شخص فاقد الاهليه او اذا انعدم فيه الرضاء او المحل او السبب او اذا لم يتوافر فيه شكل يقره القانون لانعقاده او اذا ورد في القانون نص خاص على ذلك
> غايتو نحنا واثقين من تمام اهلية بكري لكن كمان واثقين من عدم رضاء بكري وواثقين كمان انو ورقة كردنه مكتوب فيها الهلال
> والهلال بتاع عصمت
> يعني الترويسه ذاتها لاحقه حجر الاساس
> كلها غلط
> واثقين من اهلية بكري انتوا واثقين من اهلية بقية الاطراف يا روشا ؟؟؟
> يعني حضور وكيل اللاعبين القلتوهوا ده
> الوكيل ده كامل الاهلية ليتعاقد انابة عن بكري او ليشهد على توقيع بكري ؟؟؟
> كدي اتأكدوا من اكتمال وتمام اهلية البقيه يا روشا قبل تمشوا لوزان
> والله تسكوا بكري ده يوديكم الليق
> شخصياً اثق تماماً في ان الجوهره قد مشت خطوه للامام
> جنيه شبشه رصيد لبناء الجوهره
> وخطوة اولى
> يلا هيلا هيلا وهيلا هيلا
> في التسليم والتسلم بين مجلس الهلال الحالي والقادم
> جنيه شبشه ضروري
> لازم المجلس القادم يستلمو
> المهم
> اكتب قبل لقاء كادوقلي
> اتمني ان نؤدي بقوة
> ويؤدي اولاد الجبال بقوة
> عشان نستفيد من التجربه
> وخشونة الكورة بنفرزها من الخشونه المنكوره
> ايها الناس
> امي علمتني
> ما تصدق جخاخ وما تتريح بي بخاخ يا ولدي
> ايها الناس
> ان تنصروا الله ينصركم
> اها
> نجي لي شمارات والي الخرتوم
> كان شفت يا والينا
> في خور في العباسيه غرب عابدين
> طول السنه مليان طحالب وطين
> والشجر الفيهو يشبه شجر الجنوب والفلبين
> والريحه يا والينا تجيب الرمد للعين
> الخور ده بالحاله دي سنين وسنين
> يمكن يجيب ايبولا للصغار وللمسنين
> نحنا هينين
سلك كهربا
ننساك كيف وريحة الخور تضيع ريحة البخور وبت السرور
والي لقاء
سلك

تعليقات الفيسبوك

تعليقات

الرد

لن يتم نشر عنوان بريدك الإلكتروني. الحقول الإلزامية مشار إليها بـ *