بابكر سلك : الحوثيون 7/1000 الفشنكات والكمونيه

> خسر السودان مقعديه في الكونفدراليه
> بخروج اهلي شندي والخرطوم الوطني
> وكسب السودان مقعدين بالابطال
> واحد خدمة يمين وعرق جبين
> والتاني خدمة قرعه وحظ المسار
> مسار عزل عزل للهلال
> رياك مشار ما بعزل مسار زي ده
> لكنه الحظ
> احيانا يلعب اكتر من اللاعبين
> ويكون اثره واضحاً
> فدرهم الحظ يمكن ان يخدم اكثر من قنطار الشطارة
> اسي عليكم الله كي ام كي ام ده فريق ؟؟؟
> والغريبة التأهل امامه كان بفارق الاهداف
> ولولا تدخل العناية الالهية
> لشاهدنا بالامس كي ام كي يلاعب الفشنكات الملاوية
> ثم ابتسمت القرعه من جديد
> الفشنكات الكمونيه
> بالامس شاهدنا اسوأ مباراه تتلعب في تاريخ البطولات الافريقية
> لا مستوي ولا محتوي ولا فنيات
> هرجله من الطرفين تثبت ان بطولة الابطال بتجيب مواسير كتيرة
> تخدمها القرعة
> يعبد لها المسار
> المهم البحصل بحصل
> المهم
> قابل الزعيم في مشواره حتي الآن فرقاً محترمة
> تؤدي بفنيات وعرفة ودراية
> مافي زيها في ميدان عقرب
> مازي ناس سنبهار وزنزبار
> وفي الطريق الترجي
> لأن قدر الكبار دائماً يضعهم امام الكبار
> القدر ذاتو بخجل
> عشان كده بقيم
> وعلي الترجي ان يستعد للعب الدور المكرر
> فمدرب عزام عندما صرح بانه خسر امام بطل هذه النسخة افريقياً
> لم يتحدث ساكت
> الراجل خبير وشماها من بدري
> وزي ما قلت ليكم
> شامي لي ريحة مطار
> ريحة المطار بتعرفوها يا محمد عبد الماجد؟
> شميتوها متين؟
> ترجي علي مين !!!!
> ترجي علي ناسو وبس
> ايها الناس
> علة الكرة التونسية علي مر السنين واضحة
> ثيردباك ومساك طوال وتقال
> مع بكري ده لما يتلفتوا يلقونا في المجموعات
> ايها الناس
> جنينتنا الله يخليها لينا
> دائماً تعطينا احلى الثمر
> الجنينة الأدتنا طمبل وكليتشي ومجاهد وبكري العسل
> مفروض ما نغيرها اصلو
> ونصبر على الثمر في الشجر
> ينجض في امو
> ونجيبو بعد ينجض من امو
> ثمرات حلوة حلا
> اسي شايف لي ثمرة وسيمبو نجضن
> ووليد واطهر في الفرع يتمايلن
> محمد عبد الرحمن قرررررب
> باقي العويش يودوهوا السوق
> لكن زي بلح المدينة ده اسيادوا معروفين
> ما تغير الجنينة دي يا والي
> اها
> بكري بالغ لكن
> معقولة يا سيد المدينة!!!!
> لكن في حاجة غريبة جداً
> بكري لابس أربعة
> وحاور المدافع رقم أربعة
> وكسر بي تلاتة والحارس أربعة
> والكورة شوطين هنا وشوط تالت هناك
> وجاب القون في الشوط رقم اربعة
> وبعد قونو في كمبالا ببورتسودان وقون أمل عطبرة وقون عزام وده رقم أربعة
> بكري بجري بنمرة اربعة
> وكان جري الناس تعاين للقبل الاربعة
> وبلبس زي ساكواها اربعة
> عشان تعرفوا مجلس بفرط في بكري مجلس اربعة
> والغريبة القرار فيهو قرار اربعة
> كردنة وفطومة وروشا ثم عمدة الأربعة
> ايها الناس
> تأهلنا امام عزام بفارق الاهداف
> هدف بكري رجح الكفة
> وتأهلنا امام كابوسكورب بفارق الأهداف
> هدف بكري رجح الكفة
> هو النجاح ده كيف بس ؟؟؟
> كده قروش تسجيلو كملت
> وقعد لينا ربح ساااااااي
> استثمار كبير
> فعلاً رجل اعمال شاطر يا والي
> صفقة بكري صفعة معلم
> يا معلم
> وصفقة الموسم
> يا مؤلم
> ايها الناس
> على جمال سالم ان يراجع حساباته
> يا اما الاستهتار اصاب الولد ده
> يا اما مدرب الحراس ده كعب
> الزول ده ما كان كده
> الحاصل شنو ؟؟؟؟
> ايها الناس
> استفاد المريخ من التجارب
> ولن يفرط في مباراة دورية عقب الفوز الافريقي
> خيلاء ما في
> المباراة الدورية القادمة
> لازم الاولاد يمتعونا عرضاً ونتيجة
> ليثبتوا لنا انهم استفادوا من العثرات
> اللفة قربت
> والبغلة حاتقيف
> باقي بغلة عبد الخير الوقفة عندها ضرورييييييييييية
> ايها الناس
> علمتني امي وقالت لي
> البرفع يدو علي امو طال الزمن ولا قصر البلا حايخمو
> وقالت لي في مثل بقول الفيك بدربو
> قلت ليها سنكيت بدربو كيف يعني؟
> قالت لي ما سنكيت.. الله بيننا وبين سنكيت
> الفيك بدربو
> ايها الناس
> ان تنصروا الله ينصركم
> اها
> نجي لي شمارات والي الخرتوم
> كان شفت يا والينا
> الكتاحة بقت حولينا وما علينا
> مشت الإمارات والسعودية يا والينا
> تكون اغتربت وفتحت لينا؟؟؟؟
سلك كهربا

ننساك كيف وحتي الكتاحة الكانت بتميزنا اتخارجت
والي لقاء
سلك

الرد

لن يتم نشر عنوان بريدك الإلكتروني. الحقول الإلزامية مشار إليها بـ *