محمد عبد الماجد : عشان تبقوا عارفين قالوا (الترجي) مشارك في (عاصفة الحزم)

(نساء حائرات) بحضرها سبعة مرات في اليوم..(العشق الاسود)..تنتهي هنا ..بمشي ليها هناك
“”””””””””””””””””””””””””””””””
مريخابي لاقيتو بشكي قال لي والله الترجي مسخ علينا الدنيا…(الفول) دا بقى ما بتبلع لينا
“””””””””””””””””””””””””””””””””””””
الهلالاب ديل في (عزام) قفلوا علينا (كوبري المنشية) في الترجي يعملوا لينا شنو؟
“”””””””””””””””””””””””””””””””””””””””
اذا كان وفد المقدمة بتاع الترجي بعمل فيكم كدا …ناس (افول) يعملوا فيكم شنو وقت يصلوا؟
“”””””””””””””””””””””””””””””””
• الايامات دي نحن مستمتعين ..استماع مبالغ فيه.
• الشريط بعد ما نكملو ..بنقلبو.
• شغالين كدا.
• بنطلع من العصر.
• نحوم في الدنيا دي ..ما بنخلي لينا (ضل) ناصية.
• بنقيف في اي حتة ..زي طلاب المدارس.
• ما عندنا اي مشكلة.
• اي حاجة ظابطة.
• يجيبوا لينا (السمك)..نقعد نضرب فيه زي (الكعك).
• في اللخمة دي ..كان في زول عندو وجعة (ناصية).
• شايل وجعتو وحايم.
• ممكون ..وصابر وما قادر يقول حاجة.
• يقول شنو عاد؟.
• حاج عثمان واحد من الناس … بعتقد انو ما في اسوأ من (وجع الضرس) في الدنيا دي.
• اسوأ حاجة يكون عندك وجع ضرس..وعرس في البيت.
• هسع (العرس الفي البيت) الدخلو شنو هنا؟.
• المهم يا ناس ..عشان ما اطول عليكم ..حاج عثمان …الايامات دي عندو (وجع ضرس).
• شايل ضرسو وحايم.
• البقول ليه اعمل ليه زيت الخروع.
• والبقول ليه اعمل ليه (مناكير).
• والبقول ليه ما في احسن من (القرنفل).
• والبقول ليه اعمل ليه (معجون).
• والبقول ليه (تمباك) عديل.
• حاج عثمان ما خلّى حاجة للضرس ..اي حاجة قالوا ليه اعملها عملها.
• ضرسو بقى زي (المخزن) ..من الحاجات العملها ليه.
• والوجع كلو يوم ماشي زايد.
• حاج عثمان ما قاعد ينوم.
• يستلم ليك (الريموت كنترول) من الساعة عشرة ..ويقعد ليك في التلفزيون.
• ما بخلي ليه قناة.
• يلقى مباراة معيودة في كورة القدم ..بتابعها.
• يلقى ليه مباراة تنس ..بتابعها.
• يلقى ليه مصارعة ..بقعد يحضرها.
• ما بخلي حاجة.
• بعد الساعة واحدة بقبل على الافلام الهندية.
• ما بخلي ليه فيلم.
• يكمّل الافلام الهندية ..بقوم يقبل ليك على الافلام العربية.
• بحب ليك الافلام القديمة ..بموت في افلام (علي الشريف).
• عندو اعتقاد راسخ ..وثابت انو (علي الشريف) زول خطير.
• وانو الفيلم الذي يشارك فيه (علي الشريف) بكون فيه (خيانة).
• بعتقد كدا.
• انا ما بعرف (علي الشريف)..انا بحب افلام (ابراهيم سعفان).
• ح تقعدوا تشرعوا لي وتقولوا لي (ابراهيم سعفان) دا منو؟.
• المهم حاج عثمان بقعد يتنقل لينا من قناة الى قناة ..ما بخلي ليه حاجة.
• وكلو من (الضرس).
• الضرس عذبو عذاب شديد.
• الضرس خلاهو يقعد يتابع ليك المسلسلا التركية.
• (نساء حائرات) بحضرها سبعة مرات في اليوم.
• (العشق الاسود)..تنتهي هنا ..بمشي ليها هناك.
• والضرس … ما بخليه يطلع (فاصل اعلاني).
• معذبو عذاب شديد.
• اخر حاجة ..حاج عثمان ..لاقى ليه (روسي)…الروسي قال ليه يا زول احسن (ضرسك) دا تمش تشوف ليه دكتور ..بدل تخليه كدا متل (الستائر) الما لاقيات ليهن زول ينزلن من الحيطة.
• حاج عثمان مشى الدكتور.
• الدكتور عندو قميص (كحلي) كدا ..زي باقى الملوخية في الصحن.
• الدكتور بي قمصيو (الكحلي) دا ..قال ليه احسن نحشي ليك.
• حشوا ليه (الضرس).
• الوجع ما راح.
• الوجع زاد.
• حاج عثمان مشى للدكتور ..وقال ليه انت تعال هنا بي قميصك (الكحلي) دا ..الضرس دا حشيتو شنو؟.
• حشيتو بارود.
• حشيتو سلطة اسود.
• الدكتور بي قميصو (الكحلي) ..قال ليه ما مشكلة…نكتل ليك الجذور.
• حاج عثمان ..قال ليه اكتلن ..لو المشكلة في (الجذور) ما في مشكلة.
• الدكتور بي قميصو (الكحلي) ..كتل ليه الجذور.
• بعد يومين …حاج عثمان تاني جاء للدكتور بي قميصو (الكحلي) ..وقال ليه انت الضرس دا عملت ليه شنو؟.
• الضرس دا حماني النوم.
• الضرس دا ما خلى لي صفحة اتقلب عليها.
• الدكتور بي قميصو (الكحلي) ..قال ليه خلاص ما مشكلة يا حاج عثمان ..نحن (نخلع) ليك الضرس عديل.
• نقلعو ليك فد مرة.
• حاج عثمان ..قال ليه اخلعو.
• الدكتور بي قميصو (الكحلي) ..قلع ليه الضرس.
• حاج عثمان بعد يومين ..جاء بي ضرسو (المخلوع)..وقال للدكتور بي قميصو (الكحلي) ..الضرس الى الان وجعتو مستمرة.
• الدكتور بي قمصيو (الكحلي) ..قال ليه يا حاج عثمان ..الوجع دا ما من الضرس.
• حاج عثمان قال ليه طيب من شنو؟.
• الدكتور بي قميصو (الكحلي) قال ليه من (الترجي).
• حاج عثمان ما عرف يمشي وين؟.
• في النهاية قال ليه طيب يا دكتور بي قميصك (الكحلي) دا ..وقت الوجع من (الترجي) قالع لي الضرس ليه؟.
• كان تخلي (ضرسي) في حتتو.
• حاشيهو ليه؟.
• كاتل جذورو في شنو؟.
• الدكتور بي قميصو (الكحلي) ..قال ليه ..ما كان امامنا خيار غير نقلع ليك (الضرس)..عشان (الترجي) ما بتقلع.
• عاوزنا كمان نقلع ليك الترجي.
• الايامات دي …طبعا ايامنا.
• قاعدين كدا.
• بدون مناسبة المريخاب يجيبوا ليك سيرة (الترجي).
• انتوا عارفين.
• عشان الكلام يقع ليكم.
• الترجي دا قالوا في (عاصفة الحزم) مشارك بي مقاتلات ..لو عندكم (عذر) طلعوه من بدري ..الترجي ماشي عليكم.
• المريخابي تلقاه قاعد في المناسبة.
• يضرب ليك في (الكوكتيل).
• فجأة كدا يقوم يخنق.
• تقول ليه في شنو؟.
• مالك يا زول؟ ..في زول بتخنقو (جبنة).
• يقول ليك المشكلة ما في الجبنة.
• تقول ليه المشكلة في شنو؟.
• يقول ليك المشكلة في (الترجي).
• المناسبة كلها تجيه جارية بي (جك الموية).
• والله فعلا الترجي بيخنق.
• المريخابي ..تلقاه نايم.
• نايم نوم عميق.
• فجأة يقوم ينط ليك.
• ينط من السرير.
• تقول يا زول قول باسم الله …الحاصل شنو؟.
• دا كابوس؟.
• المريخابي يقول ليك دا ما كابوس.
• تقول ليه طيب دا شنو؟.
• المريخابي يقول ليك يا ريتو لو كابوس …الكابوس الساهل دا …دا (الترجي).
• تقول ليه كمان (الترجي) بقى يجيكم في النوم.
• لا دي ما طريقة.
• يقول ليك …والله (الترجي) دا يخلوه كدا في (الاكل) يجينا.
• نحن ما بنقدر نقول ليه حاجة.
• بنقول ليه (الترجي) بعملها …الترجي ما بعيدة عليه.
• ممكن يعمل اي حاجة.
• زي واحد ..سأل ليه زول ..قال ليه انت تعال هنا ..الثعلب بيلد وإلّا ببيض؟.
• الزول قال ليه ..والله الثعلب ما بعيدة عليه …الثعلب دا مكار اتوقع منو اي حاجة.
• ممكن يبيض وممكن يلد.
• هسع الترجي دا مكار.
• اتوقعو منو اي حاجة.
• ممكن يجيكم بي طايرة.
• وممكن ييجكم بي لوري.
• ممكن ما يجي اصلا ..ويغلبكم سبعة.
• اصلو ما في حاجة بعيدة عليه.
• يوم داك..لاقت لي مريخابي..لقيت حالتو صعبة.
• الزول نزل النص ..وعمل ليه (صلعة) فجأة.
• بقى فتران.
• قلت ليه يا زول مالك؟..الحاصل عليك شنو؟.
• قال لي (الترجي)..والله الترجي مسخ علينا الدنيا…(الفول) دا بقى ما بتبلع لينا.
• قلت ليه ..(الترجي) عندو قدرة يمسخ (السمك)…فول شنو؟.
• الفول دا انتوا يا ناس المريخ (مريخ الفاشر) بمسخوا عليكم.
• مريخابي تاني ..قبل اربعة يوم ..لقيتو في (الجوازات).
• قلت في نفسي ..المريخابي دا عاوز يعمل شنو؟.
• قبل يومين ..شفتوا ليكم في المطار.
• الشمار كتلنا ..قلت احسن اثبت الزول ..واقول ليه الحاصل شنو؟.
• ثبتوا ليكم ..قلت ليه يا زول مالك؟..انت برضو مهاجر.
• المريخابي قال لي مهاجر.
• قلت ليه مالك ..انت يا زول ماسك ليك اربعة بنوك ..غير مجالس ادارة الشركات..البخليك تهاجر شنو؟.
• قال لي (الترجي).
• انتوا قايلين تاني سألتو.
• لكن هو بدون ما اسألو ..قال لي الهلالاب تاني ما بخلونا نقعد في (البلد).
• الهلالاب ديل في (عزام) قفلوا علينا (كوبري المنشية) في الترجي يعملوا لينا شنو؟.
• ما قلت ليه حاجة.
• عشان بي صراحة كدا ..امس في (21) مريخابي رحلوا من حلتنا.
• مشوا وين؟..انا عارف.
• هجوا من البلد.
• …….
• ملحوظة : غايتو يا المريخاب راجيكم ايام سودا.
هوامش
• انا ما عارف البخليكم ترجفوا كدا شنو؟.
• ناس المريخ (وفد المقدمة) بتاع الترجي خلاهم يرحفوا.
• اذا كان وفد المقدمة بتاع الترجي بعمل فيكم كدا …ناس (افول) يعملوا فيكم شنو وقت يصلوا؟.
• الايامات دي الواطة سخنة شديد.
• الترجي ما عندو علاقة بالسخانة دي.
• عشان تبقوا فاهمين.
• وما تقعدوا تلخبطوا لينا ساكت.
• نحن معاكم ..واضحين.
• وصريحين.
• لو في حاجة زي دي حصلت ..بنكلمكم.
• بنقول ليكم.
• بس ما تقعدوا ترجفوا لينا من الآن.
• المباراة يوم 18 ابريل ..تقعدوا ترجفوا لينا من يوم خمسة.
• اصلو ما معقول.
• ولا بنقبل منكم الكلام دا.
• محسن سيد قال الترجي ليس افضل من عزام وكابو سكورب.
• الزول دا ما نصيح!!.
• شن جاب عزام للترجي.
• انت يا محسن سيد ..ما كنت قاعد تحضر حصة (الانجليزي).
• يا زول ما في اي علاقة بين الترجي وعزام.
• لو دا فكر مدربكم يا مريخاب ..سبعة ما بتقيفوا عندها.
• …………….
• عاجل : معقولة في الدنيا دي في زول بيقارن بين الترجي وعزام..ناس الترجي لو سمعوا المقارنة دي يا محسن سيد اول حاجة بعملوها ..بقطعوا ليك (اضنينك) ديل..قبل ما يجيبوا اي قون.

تعليقات الفيسبوك

تعليقات

الرد

لن يتم نشر عنوان بريدك الإلكتروني. الحقول الإلزامية مشار إليها بـ *