محمد عبد الماجد : (يا زول جميل) … وقت جرس الفسحة يضرب

محمد النصري بمرق مع نصوصو ..بوصلها ليك بي نفسو…بي نفس الاحساس ..والحاجات الصغيرة ..بي كل التفاصيل
سيد أحمد عبدالحميد ..بغني له النصري : ( لا تكتر غيابك تاني شان ما يبقى عادي..بعد وادعنا الهموم رحلت مقبلة غادي)
وقت نكون عاوزين نطلع من الموضوع بنقعد نعمل فيها بنفتش عن شاحن الموبايل
نشيل (شنطة المدرسة) تاني…شنطة من (قماش دمورية)..و (تموت تخلي)..وبستلة فيها (عصيدة)
• نحن طبعنا كعب.
• ما بنشرب الشاي بالبسكويت.
• ولا بنشرب القهوة بالبلح.
• ولا عندنا حركات ناس (البندر) ديل نجيب لينا (فشار) مع الجبنة.
• ونرش الحوش ..وقت نكون عاوزين (نتفلهم) شوية.
• نحن بنشرب الشاي بالنصري.
• ونشرب القهوة بالنصري.
• ووقت نكون عاوزين نضبط الساعة ..اول حاجة بنسمع لينا نص من نصوص النصري.
• محمد النصري بمرق مع نصوصو ..بوصلها ليك بي نفسو.
• بي نفس الاحساس ..والحاجات الصغيرة ..بي كل التفاصيل.
• نحن كدا.
• كلمة واحدة ..يمكن تودينا وتجيبنا.
• لمن نقعد في الواطة.
• نطقطق اصابعنا و (21) مرة.
• ننخرط في (الحيرة)…ما نعرف نعمل شنو؟.
• عرقنا يُشر.
• تغلبنا الحكاية ..نبقى (متراوحين) من نفسنا.
• نفتش مفتاح العربية.
• يا ربي في (مطرة)؟..وإلا احساسنا براهو (مُتخوبط).
• عندنا احساس بالمطرة ..وهي ما في مطرة.
• شوارعنا بتتقفل …ونغطس في الموية للركب.
• وما في موية.
• ولا في مطرة.
• ولا في حاجة.
• وقت نكون عاوزين نطلع من الموضوع بنقعد نعمل فيها بنفتش عن (شاحن الموبايل).
• ونحن – ولا عندنا هدف في (شاحن الموبايل).
• نقسم السبعة في الاتنين ..وقت نسمع محمد النصري بغني في (يا زول جميل).
• نشيل باقى الكلام ..ونجري (طرف الشارع).
• نشيل (شنطة المدرسة) تاني.
• شنطة من (قماش دمورية)..و (تموت تخلي)..وبستلة فيها (عصيدة).
• وكراس (املاء) كلو (اعد).
• لا بيرقر ..ولا شاورما.
• ولا العصائر البقوا يجيبوها لينا (مكيسة).
• تقول نحن في معركة (حربية).
• انتوا قايلننا نحن في (فيلم اجنبي).
• نطلع برة.
• نتفن في الرملة.
• الشمس مولعة نار.
• نتغبر بالنص.
• نتخربش بالكلمات.
• نقيف بعيد ..نتلفت متل (مرايات) الهينو.
• يتخيل لينا ..اننا بنلقي لينا زول ..يشرح لينا القصة – ويورينا (الحاصل شنو؟).
• زول يفشنا في (النص).
• البخليني أرجع تاني لي الصف الخامس شنو؟.
• جرس الفسحة يضرب.
• ننتشر في حوش المدرسة.
• نشتري لينا دومة من حاجة التومة في شجرة المدرسة.
• الفصل كلو يكد مع (دومتك).
• ولا بتزعل.
• الفصل كلو يشبع من الدومة ديك.
• نجي راجعين البيوت تاني.
• ولا بنفطر.
• شايلين (نص) محمد النصري ..وحايمين بيه من ضل لي ضل ..زي طلبة المدارس وقت يوزعوا ليهم اخر ورقة في الامتحانات.
• بتخيلوا نفسهم تاني ما برجعوا المدرسة.
• وتاني ما بلبسوا هدوم المدرسة (الاتهردت) في جتتهم.
• ولا بشيلوا (شنط الدمورية) المجدوعة في ضهورهم من بداية العام الدراسي.
• يا النصري ما تلفحنا بي (نص).
• تعال طالع.
• بتغلبنا القعدة.
• نمشى نمرق لي برة.
• نسكسك في (الفكرة).
• ما بنلقى لينا فكرة مقنعة.
• حايمين بي (يا زول جميل) من فصل لي فصل.
• ما بنخلي لينا (شجرة).
• في حاجة حاصلة.
• في شيء بيحدث.
• في حاجة غلط.
• لكن ما عارفين الحاصل شنو؟.
• نبلع لينا (13) حبة بندول ..ما تعمل اي حاجة.
• نوقف (النزيف) بي :
• (يا ﺯﻭﻝ ﺟﻤﻴﻞ..ﻟﻤﺘﻴﻦ ﻋﻠى ﺧﺎﻃﺮﻙ ﺗﺸﻴﻞ..ﻣﻊ ﺍﻧﻮ ﺯﺭﻋﻚ ﻣﺎ ﺑﻘﻮﻡ ﻟﺴﺎﻙ ﺑﺘﺰﺭﻉ ﻓﻲ ﺍﻟﺠﻤﻴﻞ..ﻳﺎ ﺯﻭﻝ ﺣﻨﻴﻦ ﻟﻠﻨﺎﺱ ﻭﻓﺎﻙ..ﺷﺎﻥ ﺍﻧﺖ ﻓﻲ ﻃﺒﻌﻚ ﻧﺒﻴﻞ..ﻋﻨﺪﻙ ﻛﺮﺍﻣﺘﻚ ﺍﻫﻢ ﺷﻲء ..ﻭﻣﺎﺏ ﺗﺒﻘﻲ ﻟﻲ ﻗﻠﺒﻚ ﺫﻟﻴﻞ).
• نقسّم القلب (21) مرة ..وقت نسمع الكلام.
• نقعد نتغالط في قلوبنا.
• نتشرق.
• نبلعها بي موية.
• لا بتعرف قلبك من قلب عبدالجبار ود ريا.
• الشاعر الجميل (رامي قسم السيد) ..اخصائي (الجمال) في نصوص محمد النصري الغنائية.
• بجيك واقع من فوق.
• طلع بينا على القمرة.
• مرق بينا الخلا.
• وما جينا راجعين.
• خلانا نصارع في الفكرة.
• نلبت نقع.
• نندرش على رأسنا.
• رامي قسم السيد بتلقاه قاعد فوق ..في اي (نص) بيهبش (الوتر الحساس).
• تطلع تاني برة ..تقعد تفتش في (حروف الجر) ..عشان تفهم حاجة.
• تتغلب صفر / 9.
• تقيف في اول السطر.
• تبلع ليك (موية).
• عشان (النص) ينزل.
• يقيف ليك في الحلق.
• تاني تمشي تقيف في (الزير)..تشرب ليك موية باردة.
• الموية ذاتها ما تنزل.
• تلحقها بي :
• (ﺯﻱ ﺍﻟﻘﻤﺮ ﺗﻨﺸﺮﻩ ﻧﻮﺭ..ﻳﻮﻡ ﺗﺒﻘى ﻛﻞ ﺍﻟﺪﻧﻴﺎ ﻟﻴﻞ..ﺑﺘﻜﻮﻥ ﺻﺤﺎﺭﻱ ﺑﻼ ﺭﺿﺎﻙ..ﻳﻮﻡ ﺗﺮﺿﻲ ﺯﻳﻚ ﻣﺎﻓﻲ ﻧﻴﻞ..ﺷﺎﻳﻞ ﻫﻤﻮﻡ ﺍﻟﻨﺎﺱ ﺩﻭﺍﻡ..ﻣﻊ ﺍﻧﻮ ﻫﻤﻚ ﻣﻮ ﺷﻮﻱّ).
• نحن الجابرنا على (التلتلة) دي شنو؟.
• نحن ناقصين (اكتشافات).
• البخلينا نروج لي شنطة الدمورية شنو؟.
• دا (رامي قسم السيد) ذاتو (شايل هموم الناس دوام مع انو همك ما شوي).
• يتخيل لي كدا بيكون الزول الجميل.
• بالمواصفات دي بكون الجمال.
• يدقوا لينا الجرس.
• نرجع للصف الرابع تاني.
• بعد السن دي.
• بعد (الشيب) دا.
• مالنا نحن بنصعبها كدا..
• البرجعنا الصف الرابع شنو؟..لو ما ساي.
• (ما بترتا في حالك كتير.. ﺩﺍﻳﻤﺎ ﻛﺮﻳﻢ ﻭﺷﺠﺎﻉ ﻭﺣﻲ..ﻟﻲ ﺯﻭﻝ ﺑﻴﺘﻠﻮﻡ ﻣﻌﺎﻙ..ﻣﺎﺏ ﺗﻠﻘﻲ ﻓﻲ ﻗﻠﺒﻚ ﻓﻲ ﺷﻲء..ﻭﺍﻟﻨﺎﺱ ﻗﺪﺭ ﻣﺎ ﻳﺤﺴﺪﻭﻙ..ﻟﻠﻨﺎﺱ ﺗﺸﻴﻞ ﺍﻟﻔﺮﺣﻪ ﺿﻲ).
• دا رامي نفسو.
• وقت تلقاه قاعد براهو.
• في حفلة او في مناسبة ..بتلقاه مطرف واقف بعيد.
• قاعد بزرع في الجميل.
• شوفوا الزول لمن ما (يرتا) لي نفسو ..بكون اخطر زول.
• دي اجمل حاجة.
• النصري بكتشف فينا تلك المشاعر.
• بفتش فينا الحاجات دي.
• سيد احمد عبدالحميد ..برضو عندو نص (تحذيري) خطير.
• نص قاطع.
• وواضح وصريح.
• سيد أحمد عبدالحميد ..بغني له النصري : ( لا تكتر غيابك تاني شان مايبقى عادي..بعد وادعنا الهموم رحلت مقبله غادي).
• الغياب ذاتو لو كتر ببقى عادي.
• عشان كدا نحن بنقول محمد النصري بغني في حتات براهو ..بغني لتصاوير ما اتغنت قبل كدا.
• بحوم في حلة مشاعر حقتو براهو.
• بجيب لينا (حالات) خاصة.
• نحن وقت يرسلوا لينا من (الشمالية) كرتونة البلح.
• ويجيبوا لينا (العجوة).
• برسلوا لينا مع الكراتين دي (نص) للنصري.
• نقوم نخلي البلح بي حلاوتو ..ونمسك في النص.
• محمد سفلة يمثل في حنين الطنبور حالة (الصمود) الواضحة ..التى لم يكسرها الهوى.
• (افتكرتك) ..احدى روائع النصري ..قدمها له محمد سفلة في حلة من المشاعر الباكية.
• في حفلة من الحواس.
• (ﺍﻓﺘﻜﺮﺗﻚ ﻟﻤﺎ ﻋﻴﻨﻲ ﺳﺎﻟﻮ ﺗﺮﺟﻊ..ﺍﻓﺘﻜﺮﺗﻚ ﻗﺒﻞ ﺍﺑﻜﻲ ﺍﻟﺪﻧﻴﺎ ﻓﻲ ﻋﻴﻨﻴﻚ ﺗﺒﻜﻲ.. ﻭﺩﻡ ﻋﻴﻮﻥ ﻋﻴﻨﻴﻚ ﺗﺪﻣﻊ..ﺍﻓﺘﻜﺮﺗﻚ ﺻﺪﺭﻱ ﺣﺎﻧﻲ ﻭﻗﻠﺒﻮ ﻳﺘﻘﻄﻊ ﻋﺸﺎﻧﻲ..ﺍﻡ ﺑﺘﺘﺤﺴﺲ ﺭﻗﺎﺩﻱ ﻭﺍﻡ ﺑﺘﺘﻔﻘﺪ ﻣﻜﺎﻧﻲ..ﻣﺎ ﺑﺘﺴﻴﺒﻨﻲ ﺍﻋﻴﺶ ﻣﺸﺮﺩ ﻣﺎ ﺑﺘﻨﻮﻡ ﻟﻤﻦ ﺍﻋﺎﻧﻲ).
• الفكرة في حد ذاتها صعبة.
• عشان كدا ..تاني بترجع تقطع ليك جك موية.
• موية باردة ..ما باردة …بقت ما فارقة كتير.
• المهم تنزل (النص).
• لكن محمد سفلة عرف دائما ان ينتصر لفكرته.
• لم ينهزم قط في قصة.
• خرج مرفوع الرأس بفكرته.
• العناد عندو حالة من الحب.
• والفراق ذاتو حالة من القرب.
• وسفلة بقول : (ﺍﻧﺖ ﻭﺍﺣﺪ ﻳﺎﻣﻨﺎﻳﺎ..ﺍﻧﺖ ﻭﺍﺣﺪ ﻭﺍﻟﻠﻪ ﺷﺎﻫﺪ..ﺍﻟﻨﺠﻮﻡ ﺧﻠﻘﺖ ﻛﺘﻴﺮﻱ..ﻭﺍﻟﻘﻤﺮ ﻓﻲ ﺍﻟﺪﻧﻴﺎ ﻭﺍﺣﺪ…ﻛﺎﻥ ﺗﻌﺎﻧﺪ ﻛﺎﻥ ﺗﺠﺎﻓﻲ ﺍﻧﺖ ﻭﺍﺣﺪ ..ﻛﺎﻥ ﺗﺰﻳﺪ أﻟﻤﻲ ﺍﻟﺨﺮﺍﻓﻲ ﺍﻧﺖ ﻭﺍﺣﺪ ..ﻛﺎﻥ ﺗﻌﺎﻧﺪ ﻛﺎﻥ ﺗﺨﺎﺗﺮ ﺍﻧﺖ ﻭﺍﺣﺪ ..ﻛﺎﻥ ﺗﻘﻨﺐ ﻛﺎﻥ ﺗﺴﺎﻓﺮ ﺍﻧﺖ ﻭﺍﺣﺪ.. ﺷﺎﻥ ﺑﺮﻳﺪﻙ ﻭﻏﺼﺐ ﻋﻨﻲ..ﻫﺎﻙ ﻛﻤﺎﻥ ﺍﻗﺮﺃ ﺍﻋﺘﺮﺍﻓﻲ..ﺍﻋﺘﺮﺍﻓﻲ ﺍﻧﺎ ﻗﻠﺒﻲ ﻏﻴﺮﻙ ﻣﺎﻟﻮ ﻣﻨﻴﺔ…ﺃﻱ ﺩﻧﻴﺎ ﻳﻌﻴﺸﺎ ﻏﻴﺮﻙ ﻣﺎﻫﺎ ﺩﻧﻴﺎ).
• ما في اجمل من القفلة دي.
• بنرجع تاني نحوم في النص.
• نطلع ونقيف.
• ووقت خلاص تغلبنا.
• بنمشي البحر.
• نشرب من البحر ..لو موية الزير ما بتجيب موجة ام درمان.
• …
• ملحوظة : اقيفوا عند النصري ..وابقوا مارقين.
هوامش
• وقت الكلام يكتر ..قلتو احسن.
• المفاجأة بقت..تفتح الماسورة تلقى موية.
• الموية بقت يجبوها معلبة.
• المسلسلات التركية عملت لينا ازمة في (التسالي).
• التسالي ذاتو بقى ما عندو موضوع.
• موضوع شنو؟.
• انا قلتا حاجة.
• لاحظوا اني في العمود دا كلو ما جبت سيرة للترجي.
• الترجي انا ولا شغال بيه.
• مالي ومالو.
• ولا سألتكم من (تراوري).
• ولا قلت ليكم بكري المدينة الخالعكم دا ..طلعوا ليه شريط كاسيت.
• ولا سألتكم من رمضان عجب.
• براكم انتوا بتتخيلوا في الحاجات.
• يقولوا ليكم الكلام الجد – تقعدوا تزعلوا لينا.
• يا احمد الحاج ..العمود ماشي عليك.
• ……..
• عاجل : لكن رمضان عجب دا عملها ظاهرة.

تعليقات الفيسبوك

تعليقات

مقالات ذات صله

الرد

لن يتم نشر عنوان بريدك الإلكتروني. الحقول الإلزامية مشار إليها بـ *