بابكر سلك : البره الخط بره العقد ولا شنو ؟؟؟؟

> التقى الرائع دوماً عمر محمود خالد
> بالرائع المبدع سيف الجامعة
> التقيا في نشيد نحنا في الوسط الرياضي
> فتدفق شلال الابداع والقيم والمثالية
> نحنا في الوسط الرياضي لابنخاصم لا بنعادي
> هكذا هو شعار اهل الرياضة
> وإن بدت تفلتات في بعض الاحايين
> فإنها ليست ديدننا للوسط الرياضي مهما طال امد تلك التفلتات
> الوسط الرياضي يقوم على تقديس الانتماء
> مع الاعتراف بالآخر
> وفي حق الآخر في الوجود
> وفي احترام الآخر
> لان احترام الآخر يحقق احترام الآخر لك
> ويعتبر احتراماً للنفس قبل الآخر
> ايها الناس
> المريخ كيان كبير ومحترم مهما انكر البعض عليه ذلك
> والهلال كذلك كيان محترم له عشاقه ومحبيه مهما انكر عليه البعض ذلك
> والاعتراف بالآخر هو قمة الفهم
> وثريا احترام النفس
> لذا
> يفترض فينا جميعاً ان ننتمي لما نريد
> ونقدس ما نريد
> فالانتماء في الوسط الرياضي عقيدة
> فقط يجب علينا احترام عقيدة الآخر
> نتنافس بشرف
> واجتماعياً نتواصل ونحترم بعضنا
> انها دعوة للمحبة
> اذا كنا نحب كياناتنا
> يجب علينا احترام ما عداها من كيانات
> لان ذلك يجعل احترام الآخر لكياننا واجب عليه
> عليه
> انها دعوة للمحبة
> نحب بعضنا البعض
> كلنا في الوسط الرياضي نمارس المحبة
> انا احب فطومة اختي
> وفاضلابي يحب شجرابي
> الاتنين من نهر النيل
> بعرفو يحبو بعض كيف
> روشا يحب مزمز
> واسماعيل حسن نحبو كلنا
> جعفر سليمان يحب حسن البطري
> بتشابهو
> وداؤود مصطفي نتفق على حبه
> محمد عبدالماجد تحبك الشكلوتة
> اما خالد عزالدين
> فنسيبو لي مأمون ابو شيبة
> بعرف يحبو كوووووويس
> عمرابي يحب سامر العمرابي
> عمراب في بعضهم
> احمد محمد احمد يحب حسن فاروق
> ما تخرخر يا احمد
> والله ماعندنا ليك غير حسن فاروق
> اما صديقي معاوية الجاك
> بالتأكيد بموت في دباديب رمضان
> كلنا نحب بعضنا
> وننتمي لكياناتنا بكل قوة
> فقط نحترم الآخر
> ونعترف بحق الآخر
> فنحن في المريخ
> نعترف بحق الهلال في أن يحلم بفراق الصفر الدولي
> بس على الاخوة الاهلة أن يعترفوا بجوياتنا ولا يبخسوها
> وعلى الاهلة ان يعترفوا بحقنا في الحلم بكأس الابطال هذا العام
> وده الكلام البجيب اللخبطة للمحبة
> لكن نعتبروا مشاكسة محبين ساي
> ايها الناس
> نحن مجتمع محترم
> وكوسط رياضي نتحلى بالصدر الواسع
> وبالحكمة في قبول الآخر
> تعالوا نسقط الشوائب
> لننطلق من جديد
> انطلاقة نحو منصات التتويج الافريقية
> نحنا ننطلق عائدون اليها
> والاهلة ينطلقوا محاولين الوصول اليها في السنة التمنية وتمنين
> ونعم نعم رياضيين احبكم
> المهم
> قون كوستي بره الخط
> وقون علولو من النص
> وقون الميرغني كسلا بي جاي للنص بشوية
> انتو مكسيم ده متفقين معاهو البره الخط بره العقد ولا شنو ؟؟؟؟؟
> تاني زعلتو روشا
> وزعلتو فطومة اختي
> وانتوا عارفين فطومة دي ما بتتحمل كشف حالكم
> ملت ايدها في الفجيرة
> ونطقت
> قالت كلام ما قالوا زول قبلها
> وتاني احرجتوها
> اسي سيمبو ده
> جاري على امبدة
> مهاجم كوستي رجع على القبلة
> سيمبو شافوهو امس جمب سوق ليبيا
> الزول ده كوركوا ليهو
> لكن المحيرني الجوهرة
> فيصل موسي
> جاتو الكورة اربعة مرات
> وقع خمسطاشر مرة
> الزول ده قايل روحو لاعب ام الحفر؟؟؟
> ولا يكون وقع في حفرة من حفر كردنة السبعة الداير يعمل فيها بلكووووونة صينية !!!!
> قلت ليكم
> كلمتكم
> تحكيم نضيف ابو الهل بمشي دوري الرديف
> ايها الناس
> موش قلت ليكم الهلالاب ديل بحبونا زي عيونهم؟
> عشان كده بقلدونا
> عبدالصمد قفل البلف
> امس روشا طلب من كردنة قفل البلف
> الشيئ الوحيد الماقدروا يقلدونا فيهو حاجتين
> القلعة الحمراء
> والجويات
> الجويات دي غايتو الا يشاركوا في عاصفة الحزم حتي يشوفوها
> لكن كورة واطة كده الله اعلم
> وكتب خالد عزالدين قائلاً
> ان فيصل موسي قل مجهوده وضعف مردوده بفعل عامل السن
> وفطومة ايام التسجيلات قالت خطة الهلال في الاعتماد علي النشء
> اسي نصدق منو ؟؟؟
> فيصل قل مردوده لانه بلغ من العمر عتيا ام ناشئ ؟؟؟؟
> اقول ليكم سننوه
> فطومة
> ما بتعرفي ليك ديكور فنااااااااان كده ؟؟؟؟؟
> ديكور الغريبة ما دور قصة بكور
> كنت مفتكر كبسور بعد قون ديكور يدور قصة بكور
> الانتخابات جات
> انتوا لسه ما مشيتوا لوزان !!!!
> قالوا
> مكسيم بره الشبكة
> طلع تلاتين عشرة ولا شنو ؟؟
> وقالوا
> سيمبو اشاعة
> كلمناكم من زمااااااان
> وقالوا
> بوتاكو خصماً علي الهلال
> ياهو البضحك
> وقالوا
> جاهزين لضرب اللون
> ضربتوا نفس اللون يا ناس قون ؟؟؟
> المرة الجاية اضربوهوه بصلي
> غايتو اقول ليك حاجة يا كردنة
> الداير بناء الفريق ما الاستاد
> شوف ليك صينيين يسجلوا ليك في التكميلية
> طالما الصينيون بخفضوا ليك اربعين في المية
> غايتو السامعو تحت تحت
> قالوا كردنة بدا الطنطنة
> والحكيم هو المرشيح للتسيير
> لحدي ما يرجع الارباب
> ايها الناس
> علمتني امي ان الرجوع للحق فضيلة وان المسامح كريم
> قلت ليها ماشي يا امي
> لكن البقابلنا محزم وملزم بنقابلوا.. بنقابلوا طوالي يا امي
> فلسنا على الاعقاب تدمي كلونا
> ايها الناس
> انها دعوة للمحبة
> تعالوا نمارس الحب النبيل
> ايها الناس
> «إن تنصروا الله ينصركم»
> آها
> نجي لي شمارات والي الخرتوم
> كان شفت يا والينا
> الانتخابات بدت علينا
> وفي ناس كتااار ما مسجلينا يا والينا
> حقو تاني تسجيلات تكميلية تعملوها لينا
> عشان كلو زول يسد ثغراتو بس الخوف من البسمسروا علينا
سلك كهربا
ننساك كيف وزاهر مركز ما عارف روحو في ياتو مركز
والي لقاء
سلك

تعليقات الفيسبوك

تعليقات

الرد

لن يتم نشر عنوان بريدك الإلكتروني. الحقول الإلزامية مشار إليها بـ *