محمد عبد الماجد : الأهلي الخرطوم التصريحات تصريحات (البرسا) والكورة كورة (جزيرة الفيل)

مالك بقيت ضعيف كدا ؟ زي (كراس الإملاء)..عيونك (متغورقة) متل (كراس الجغرافيا)
“””””””””””””””””””””””””””””””””””””””””””””
ناس الأهلي الخرطوم بقوا يركزوا في (الجرايد) أكتر من تركيزهم في (الملاعب)
“””””””””””””””””””””””””””””””””””””””””””
· مرات في زول قدر ما يلاقيك – يقول ليك تجي تفطر معانا.
· بمناسبة وبدون مناسبة.
· بس كدا ..(تجي تفطر معانا).
· وما في علاقة بين الزول دا – والفطور البتكلم عنو؟.
· (ويتلملم سحابك عارفو ولا بصب).
· كلام بس.
· ما في اي رابط.
· اعتبروا الكلام البقول ليكم فيه دا (مدخل) للكلام عن مباراة الهلال والاهلي الخرطوم.
· جربوه.
· وفتشوه.
· بتلقوا ليكم (رابط) حايم.
· ناس الاهلي الخرطوم ديل بتكلموا ساكت عن (الفطور).
· وفطورهم تلقوه (عدس).
· الكلام كلام (سمك) – والفعل فعل (عدس).
· مرات في شارع الله دا – بتلقى ليك زول شايل ليه (جواز اخضر) وحايم.
· لسه ما جدد الجواز.
· قدر ما تلاقيه – بكون شايل الجواز دا.
· الفضول يكتلك.
· الزول دا بلاقيك مية مرة.
· تقول توقفو ..تقول ليه الحاصل شنو؟.
· تسألو.
· سؤال عادي – ما فيه اي حاجة.
· يقول ليك والله قررت اسافر.
· البلد دي ما بتنقعد.
· خلاص عاوز اطلع.
· ولا بيطلع.
· ولا بسافر.
· بس شايل (جوازو) وحايم.
· بعمل في شنو ما عارف؟.
· تلاقيه تسألو.
· يقول ليك (مسافر).
· ما في اي علاقة بين السفر والزول دا.
· (ويتلملم سحابك عارفو ولا بصب).
· زي ناس الاهلي ديل.
· بشيلوا (الجواز) ساكت.
· حكاية (الجواز) دا – ما بتختلف كتير عن حكاية الزول البتلاقيه في اي (عيد) بقول ليك عرسي (العيد) القادم.
· قدر ما تبارك ليه العيد – دون مناسبة كدا بقول ليك عرسي العيد القادم.
· يجي العيد ولا بعرس.
· تاني بقول ليك عرسي العيد القادم.
· بالطريقة دي يفوتو الف عيد.
· ما في اي علاقة بين العيد ..وعرس الزول دا.
· (ويتلملم سحابك عارفو ولا بصب).
· عامل عيونو زي (لوري القصب).
· زي ناس الاهلي.
· كل مرة يقولوا ليك ح نغلب الهلال.
· وأتينا للمباراة من اجل الفوز.
· مرات في زول يلاقيك في المستشفى.
· شايل ليه جنس ورق.
· كمية من الظروف وصور الاشعة والادوية.
· تسألو يا زول الحاصل عليك شنو؟.
· مالك بقيت ضعيف كدا ؟ زي (كراس الاملاء).
· عيونك (متغورقة) متل (كراس الجغرافيا).
· ولونك اتقلب.
· يقول ليك والله الدكاترة ديل وهمونا ..بقيت جاري من دكتور لي دكتور.
· تقول ليه عندك شنو؟.
· يقول ليك لسه النتائج ما ظهرت.
· عشرين سنة تلاقى الزول دا بي الطريقة دي.
· جاري وشايل ورقو وملخوم.
· تسألو.
· يقول ليك نتائج الفحوصات لسه ما ظهرت.
· (ويتلملم سحابك عارفو ولا بصب).
· وما في علاقة بين الورق الشايلو والفحوصات.
· زي ما بحصل الآن في الاهلي الخرطوم.
· قاعدين بس يصرحوا.
· ويطيّروا في قلوب الناس.
· التصريحات تصريحات (برشلونة).
· والكورة كورة (جزيرة الفيل).
· ناس الاهلي الخرطوم ديل زمان ما كان بصرحوا.
· ولا بتكلموا.
· ولا بحبوا الجرايد.
· هسه شايفهم جابوا ليهم شوية تصريحات.
· بقوا يركزوا في الجرايد اكتر من تركيزهم في الملاعب.
· بقوا يفكروا في (الدخل) اكتر من تفكيرهم في (المباراة).
· (ويتلملم سحابك عارفو ولا بصب)؟
· عليكم الله في داعي يقطعوا للناس ديل قلبهم بالشكل دا.
· ويعشموا ليك ناس المريخ.
· بدون مناسبة كدا – ناس المريخ قعدوا يفكروا في (الصدارة).
· ناس الاهلي الخرطوم قبل المباراة يصرحوا ويملأوا الجرايد كلام.
· كلو عشان يملأوا الاستاد.
· عشان الدخل.
· بفكروا في (القروش) قبل (النقاط).
· شبكونا ليك ..الاهلي جاهز.
· والاهلي لن يقبل بغير النصر.
· والاهلي الخرطوم سوف يكون ندا للهلال.
· ونحن نشيل ونصدق.
· قلنا ناس عمر بخيت ديل ما ساهلين.
· ناس خليفة ..(صعبين).
· خليفة دا بالذات كمان عندو القدرة على ان يصبح (21) لاعب.
· خليفة عندو لياقة وحركة ونشاط وبكون عندو حسابات خاصة عاوز يصفيها في المباراة.
· واكرم الهادي سليم.
· وموسى الزومة.
· موسى الزومة قالوا جاهو عرض من (موناكو).
· مشى لعب في الاهلي.
· انتوا كمان يا ناس المريخ ما بتفرقو بين موناكو والاهلي الخرطوم.
· واكرم.
· صعب شديد.
· كمان اكرم دا وقت يقوم ..(بايرن ميونيخ) ما بقدر يسجل فيه.
· زول صعب شديد.
· والخليلة.
· ووليد الشعلة.
· وادارة كورة محترمة.
· وجهاز فني بقيادة التاج محجوب.
· وراعاية من (الجيش).
· يعني فريق ما ناقصه اي حاجة.
· قلنا الليلة الله يستر على الهلال.
· اصلو الهلال لمن يكون نشوان ..وعائد من مباراة كبيرة – لازم تتكسر فرحتو.
· الله يستر.
· ونحن والله الدوري الممتاز دي ما قاعدين نقبل فيه حاجة.
· الدوري الممتاز دي عندنا اهم حاجة.
· لازم نكون صدارة.
· اصلو ما بنقبل غير الصدارة.
· لمن ناس المريخ ديل يكونوا في مركز (الوصافة) وجع الضرس ذاتو بروح.
· ما بتكون عندنا اي مشكلة.
· يعني الجماعة بتكلموا لينا عن (الحمام).
· وبقولوا الهلال واجه افريقياً اندية ضعيفة ..بنقول ليهم الهلال متصدر الدوري الممتاز.
· الهلال متصدر باقل مجهود.
· ولا في تعب.
· ولا في ارهاق.
· مع ذلك الهلال يحكم قبضته على الصدارة.
· ناس المريخ بتكلموا عن القوة وعن ان فريقهم جيد ..وعزام وكابوسكورب والترجي التونسي..نقول ليهم ان المريخ بكل هذا (الحسن) الذي تصفونه به ..هو (وصيفا) للهلال.
· يسعدنا ذلك.
· اصلو ما عندنا مشكلة.
· انتوا برضو (حمام).
· كي ام كي (حمام).
· الرصاصات (حمام).
· سانغا (حمام).
· والمريخ (حمام).
· صدارة الهلال دي جايبها من (بورندا).
· صدارة الهلال دي بنشيلها منكم انتوا.
· تختاروا (الحكام).
· وتقولوا عاوزين دا ..وما عاوزين دا.
· وتلعّبوا بكري المدينة الموقوف.
· وتقولوا ما بنلعب المباراة.
· مع كل هذه الاشياء الهلال متصدرا للممتاز.
· نلعب بي ناس اطهر الطاهر.
· واطهر ذاتو يتعوق.
· نلعب بي ناس محمد عبدالرحمن ووليد علاءالدين وصلاح الدين (لاعب الرديف).
· ونغلب برضو اهلي الخرطوم.
· اهلي عمر بخيت وخليفة واكرم الهادي سليم وموسى الزومة؟.
· نعمل ليكم شنو يا عالم تاني؟.
· نشرحها ليكم كيف؟.
· نوقعها ليكم بي ياتو طريقة.
· صدارتكم في وجود الهلال اصلو ما بتزيد فوق الـ (24).
· بنخليكم تشموا الهوا شوية.
· عشان تعرفوا الفرق بين الصدارة والوصافة.
· نعشمكم.
· ونخليكم تمسكوا (الصدارة).
· ونشيلها منكم.
· عشان بس منكم.
· ………
· ملحوظة : مباراة البطولة كلها مباراة الهلال امام مريخ الفاشر في الفاشر.

هوامش

· مباراة الهلال امام المريخ في ام درمان مضمونة.
· ما عندنا اي مشكلة.
· من هسع ركزوا لينا في مباراة مريخ الفاشر.
· عاوزين نحسم الدوري الممتاز من الدورة الاولى.
· الاهلي الخرطوم استطاع ان يعادل النتيجة امام المريخ بعد ان كان الاخير يتقدم عليه بهدفين دون رد.
· الهلال سجل من اول تلت ساعة..وفشل الاهلي في التعديل.
· بل فشل حتى في التسجيل.
· الفرق كبير بين الهلال والمريخ.
· حتى مباراة الهلال وسانغا ..يجب ان تشهد خدمة تحويل الرصيد اكبر تفاعل من قبل الهلالاب.
· ما فارقة مع اي زول لو كل واحد حول ليه جنيه ..جنيهين ..في اليوم.
· حسب الاستطاعة.
· بدل ما تتكلموا ساكت.
· احسن تدعموا الهلال بالرصيد.
· الكلام الكتير ذاتو ما فيه فايدة.
· اي واحد هلالابي الايامات دي ما يتكلم كتير في التلفون – عشان يحول رصيد للهلال.
· خلوا كلامكم في المختصر المفيد.
· والباقي حولوه للهلال.
· خلونا في اسبوع نصل لرقم خيالي.
· نصل لرقم خرافي.
· التسجيلات على الابواب.
· والكاردينال شغال في الجوهرة.
· والدعم والمشاركة والمساندة واجبة على كل هلالابي.
· الاداء جميل.
· والانتصارات متواصلة.
· صدارة للممتاز.
· واقتراب من التأهل لمرحلة المجموعات.
· طيب ما تحولوا.
· اي حاجة تمام.
· ما ناقصكم حاجة.
· يوم الاحد القادم دور بكرة ..ح يكون اليوم العالمي ان شاءالله لتحويل الرصيد.
· نحول في الشبكات التلاتة.
· ونحول في شبكة سانغا.
· الجماهير تحول في شبكات الاتصالات.
· وناس مساوي وبشه وكاريكا يحولوا في شبكة سانغا.
· اصلو ما في مشكلة.
· ………….

· عاجل : غدا نعود لنكتب ان شاءالله عن (الفيتوري) له الرحمة والمغفرة.

تعليقات الفيسبوك

تعليقات

مقالات ذات صله

الرد

لن يتم نشر عنوان بريدك الإلكتروني. الحقول الإلزامية مشار إليها بـ *