بابكر سلك : يحقدون من باب ينتقدون

> نواصل موضوع امس
> قلنا الناس البتحقد من باب تنتقد موضوعهم مكشوف من بدري
> اي شيء جائز الكلام فيهو
> الا معرفة المريخ لدور الاشبال والاهتمام بهم
> فحقو من يحقد من باب ينتقد يشوف ليهو باب آخر غير الاشبال
> ايها الناس
> ايهما افضل
> ابراهومة ام وليد علاء الدين ؟؟
> طيب لماذا التباكي علي وليد علاء ؟؟
> في مقابلة المريخ والهلال على كأس السودان والممتاز
> لعب ابراهومه وبخيت خميس اساسيين ضد الهلال
> فهل شارك الهلال باشباله ضد المريخ؟
> وايهما اصغر سناً
> محمد عبد الرحمن ام بخيت خميس؟
> وكيف يكون المريخ غير مهتم باشباله؟
> وهو بطل الاشبال والرديف الموسم الماضي؟
> بربكم كيف تحكمون !!!!
> ايها الناس
> معروف ان اهل المريخ هم اول من اكتشف الفائدة من الاشبال
> والمريخ هو النادي الاكثر استفادة من الاشبال
> واسألوا حاج صبير
> صعدنا من الاشبال علي سبيل المثال
> ابراهومه وخالد وادوارد وجندي وصديق العمدة وقورماهيا وحاتم محمد احمد وطارق ابو القاسم وعادل عطا ويس الحارس.
> وهل صعد الهلال من اشباله غير كرار ابو علي وعاكف عطا؟
> كيف تحقدون
> اقصد كيف تنتقدون؟!
> والآن باشبال ورديف المريخ مواهب شابة في السن القانوني
> ارددها في السن القانوني
> مسجلين بشهادات الميلاد الحقيقية
> امثال نمر وحسين ويوحنا ومصعب وزرديه وميسي
> فكيف يكون مستقبل المريخ من الناحيه دي في خطر؟
> ايها الناس
> ابو الهل حاول اصلاح الحال بتسجيلاته الاخيره في كشف الرديف والاشبال
> يحاول اللحاق بالمريخ
> فكيف يكون من يحاول اللحاق افضل من الذي يحاول اللحاق به؟
> ايها الناس
> قصة الهلال يشرك وليد ومحمد عبد الرحمن ومعتصم واطهر
> ليست من اجل تقويتهم بقدر ما هي تغطيه علي كوم المواسير التي اتي بها الكاردينال ورفاقه
> تلك المواسير المستورده والمحليه
> فكنا نشرك ابراهومه ونضع فيصل موسي علي الكنبه
> وبديهي ان يواصل فيصل ماسوره في الكنبه ليشارك وليد
> ليست بدعه ولا فكرة جديده
> ولكني اسأل سؤالاً.
> بربكم اكبر سنا اوكرا ام محمد عبد الرحمن يا من تنتقدون من باب يحقدون !!!!!
> قارنوا بين رمضان وبشه
> فعندما كان رمضان لاعبا بناشئي المريخ
> كان بشه نجما بالموردة
> قارنوا بين فيصل موسي وبخيت خميس
> اجزم بان فيصل في كسلا كان الناس يعرفونه وبخيت شايل شنطتو ماشي المدرسه
> قارنوا بين جمال سالم وماكسيم وجمعه
> اضرب عمر جمال في اربعه يساوي عمر مكسيم مضاف اليه عمر جمعه
> قارنوا بين سن امير كمال ومساوي
> قطعا ستجدون ان عمك كمال لعب مع مساوي
> يبقي قصة اشبال وصغار سن دي
> يا ممارسة للحقد من باب النقد عند البعض
> او تغطية علي المواسير التي جلبها الهلال من جوه وبره عند البعض الآخر
> واتحداكم اعملوا متوسط للاعبي المريخ وللاعبي الهلال
> لو ما لقيتو الفرق عشره سنين لوموني
> في المريخ مافي زول اكبر من نظيره في الهلال الا في التدريب
> غرزه كبير
> واكبر من الكوكي
> في سنه وفي خبرته وفي مؤهلاته وفي فطنته ومكره الكروي
> وعلمنا ان شهادات كابتن مصطفى النقر التدريبيه اعلى من تلك التي اتي بها الكوكي
> ايها الناس
> لسه الناس بتتكلم عن الاستقالات
> لكن الرأي عندي
> عند تقييم فترة جمال
> شوفوا ناس الهلال بعد تقديم استقالة جمال
> الاهله كانوا بهنوا بعض باستقالة جمال
> اليس هذا اعترافا بنجاحات الرجل؟!
> عكس المريخاب
> لما جا الكاردينال فرحنا
> والاهله يفرحون عند ذهاب جمال
> فرق
> المهم
> هناك هنات تحتاج لعلاج في قطاع الشباب بالمريخ
> ولكن هذا لا يعني فشل التجربه
> بل هي ناجحه نجاحا كبيرا
> ايها الناس
> الترجي احسن استقبالنا
> يجب ان نحسن وداعه وهو ذاهب للكونفدراليه
> قون من بدري من بكري
> الموضوع ينتهي من خمسه الا ربع عصرا
> نعلن صعودنا والشمس بره
> نعلن دخولنا للمجموعات من باب سويقه
> موش من باب سنط متكول بي حجر قافل وهو مفاتح
> ممكن تدخل منو بدون ما تفتحو
> ايها الناس
> ان تنصروا الله ينصركم
> اها
> نجي لي شمارات والي الخرتوم
> كان شفت يا والينا
> الفلس ما مخلينا
> تفتحوها علينا
> ولا برانا نفتحها علي روحنا يا والينا؟
سلك كهربا
ننساك كيف وسخانة الجيب شعللت دايرالها همبريب يا حبيب
والي لقاء
سلك

تعليقات الفيسبوك

تعليقات

الرد

لن يتم نشر عنوان بريدك الإلكتروني. الحقول الإلزامية مشار إليها بـ *