بابكر سلك : انتوا دحين سانا وبانا لاعبين متين؟؟

> كل افريقيا وجميع الوطن العربي برغم عاصفة الحزم والتغيير في حكومة السعوديه
> الا انهم جميعا مشغولون بمباراة المريخ والترجي
> افريقيا والعرب ما اتلموا الا في اغنيه الرائع الكابلي
> اليومين دي لاميهم الزعيم
> قال ليك ميسي مواعد رونالدو يحضروها سوا
> اجتماع نواب وزراء الخارجيه العرب
> واجتماع وزراء الرعايه الاجتماعيه الافارقه
> واجتماع مجلس الشيوخ الامريكي
> كلهم اجلوهم لي يوم الاتنين
> قالوا ما بفوتوا كورة المريخ والترجي
> العالم كلو مستنيها
> والعالم كلو ما عارف سانا وبانا لاعبين متين
> ناس سانا ذاتهم
> قالوا بحضروها حتي يمشوا الاستاد
> وناس بانا طبعا ما بحضروها لانو اعصابهم بايظه
> وعلي العليهم ناس سانا ابوا يركبوا بص ناس بانا
> وبوف بوف
> سانا وبانا برتكانه صندل بوف
> اطلع بره يا الفي النص
> ايها الناس
> الاتحاد الافريقي ذاتو ما عارف سانا وبانا لاعبين
> همو كلو المريخ والترجي
> مباراة بطوله سابقه لاوانها
> وتهم الاتحاد الافريقي
> لأن المتأهل منها وهو المريخ سينال بطولة الشامبيون
> والجواك بطل
> والخاسر فيها وهو الترجي سيتوج بطلا للكونفدراليه
> وسيتقابل العملاقان مجدداً في السوبر الافريقي
> الاتنين سوبر
> موش سانا وبانا
> ايها الناس
> اليوم جمعه
> والامة في المساجد مجتمعة
> نرفع الاكف ليبعد الله عنا الحسد والحقد والتنجيم ويوفقنا في التأهل
> ما طمعانين
> هدف واحد كفانا
> ويا حبذا لو كان ذلك الهدف معقرب ومكهرب
> بموتوا التوانسه الهناك
> وبفطسوا التوانسه الهنا
> وبوف بوف
> سانا بانا برتكانه صندل بوف
> اطلع بره يا الفي النص
> ايها الناس
> علي اليمين هلالاب كتااااار بتكلموا عن يوم الأحد عشان المريخ لاعب مع الترجي
> وما بجيبوا سيرة لكورتهم
> لانو نصهم ما عارف انو الهلال لاعب في نفس اليوم
> سانغا !!!!
> انتوا بتجيبوا الاسامي دي منين بس يا عااااالم !!!
> ايها الناس
> الهلال عود الاهله ألا يفرحهم ابداً
> هكذا عهده معهم
> تمنين سنه كايسين الفرح
> كلما يأملون فيه يخذلهم
> تتذكروا يوم مازيمبي
> الاذاعه الرياضيه شغاله استطلاعات تلاته يوم
> مافي زول قال بنغلب اقل من اربعه
> وجات الكورة
> خذلهم جنس خذله
> خمسه خذلانات
> مع الوداد المغربي
> الكاس جابوهوا ليهم هنا
> بالطياره ورجع يا خساره
> ولكن يفرح الاهله بخسارة المريخ
> تصدقوا في ناس كانوا بهنوا بعض في الشارع باستقالة الوالي!!!
> ديل لو نفذ الوالي الاستقاله
> بقوموا من الصباح يستحموا ويلبسوا جلاليبهم وعممهم ويمشوا يصلوا صلاة العيد
> ويباركوا لي بعض بعد الصلاه
> عيد عديل كده بالنسبه ليهم مشية جمال
> ولكنهم لا يعلمون ان بالمريخ جمال في كل النواحي
> وفي زول لو جبنا اسمو
> الاهله بمشوا لي جمال يقولوا ليهو عليك الله اقعد ما تستقيل
> زول تقيل
> ما بعرف سوداني
> كلامو كلو دولار
> اذا غير قروشو بالسوداني
> لو فرشوها السودان ما بشيلها
> السودان الصغير ده !!!!
> السودان الكبير القبل الانفصال وكينيا ويوغندا ما بشيلوها
> تقيل شديد
> اخير ليكم جنا تعرفوهوا من جنا خواجه
> الزول ده خيطو الخواجه
> افتحوا العلبه وشموا البخور واتوكلوا
> زولكم خيطو الزرق الطوال
> مشهورين بضيق البال
> والكنكشه في الدولار
> اخير جمال يا ناس هوووووووي
> ايها الناس
> فيكم زول بعرف اسم زول من سانغا؟؟
> طيب فيكم زول بعرف زول سمع بي سانغا؟؟
> طيب فيكم زول سمع بفريق اسمو سانغا؟؟؟
> انتوا بتجيبوا الاسامي دي منييييييييييين بس؟!
> يعني اي حداشر من جامعة افريقيا لو دخلوا الميدان
> مافي زول بفرزهم ديل ناس سانغا ولا ناس جئت ادرس في السودان
> سانغا!!
> وسانا بانا برتكانه صندل بوف
> غايتو الاتحاد الافريقي بعد يتفرج في كورتنا ضد الترجي
> لو اتفرج في كورة سانا وبانا
> بطيرهم الاتنين
> لا سانا عاجبانا
> ولا بانا في مستوانا
> المهم
> بكوري يجيب قونو
> وجمال يحمي قونو
> وغداً نسمع
> ده ما الترجي البنعرفوا
> بالتأكيد صاح
> الترجي البتعرفوهوا يا محمد عبد الماجد ترجي خمسه سته سته تاني خمسه تاني غير التلاتات
> لكن الترجي البطفشها في المدرجات عشان بكري ما يحصلها ده
> ده الترجي البنعرفوا نحنا
> يشوف كونفدرالتو وين
> ايها الناس
> ان تنصروا الله ينصركم
> اها
> نجي لي شمارات والي الخرتوم
> السخانه بدت تجينا
> طوالي الكهربه ماشه تخلينا
> وكت بتقطع لما تسخن علينا
> دفع مقدم لي شنو يا والينا؟؟
> ندفع مقدم ولما نسخن تنقطع لينا
> ده دحين ما حكم قرقوش يا والينا
> ولا حقاره ساي بينا؟؟
> تدفعونا وتسخنونا!!
سلك كهربا
ننساك كيف وسخانة الجيب بتنبئ بسخانة الغيب البجيب الجقليب
والى لقاء
سلك

الرد

لن يتم نشر عنوان بريدك الإلكتروني. الحقول الإلزامية مشار إليها بـ *