د. عادل الصادق المكي : The Absent Bella بلة الغائب

د. عادل الصادق المكي : The Absent Bella بلة الغائب

رجل شغل السودانيين.. وما زال.. شيخ.. متنبئ.. بعضهم يصفه بالدجل وآخرين يصفونه بالصلاح.. والوصول وانو راجل واصل.. أما أنا فاعتبر الشيخ بله ظاهرة تستحق الوقوف عندها ودراستها وعلى ضوئها دراسة نفسية المجتمع.. زيها وزي الظواهر اللمت فينا في أيامنا الأخيرة.. تعرفت على الرجل من خلال الصحف السيارة.. ومن خلال الونسة هنا وهناك.. بعضهم يصف لي قدراته الخارقة وبعضهم يقول لي ما تصدق دا كلو نضم فارغ.. وقرأت له كم حوار والراسخ في ذهني كان حوارا في صحيفة الصحافة وخصوصا وصفه للإخوة (الجن).. وقال إن عيونهم مطاولات وبيلبسو نضارات شمسية عشان يغطو عيونهم المطاولة وانهم بيبيعو النعناع.. مما جلعني اشك في كل صاحب أو صاحبة نضارة سوداء.. وأقعد أحاول اتاوق بتحت النضارة عشان أشوف العيون واقفة واللا راقدة زي عيوننا واحد.. أما النعناع لا أخفي أنني من أكثر المعجبين بالنعناع وشرابه واعتبر نفسي زبونا دائم لأصحاب العيون المطاولة وأكان كدي أكون اتمليت منهم نعناع وشربت وادوبلت لمن داير اتفقع.. مؤخرا كان عندو حوار في إحدى الصحف.. بعد أن قرأت له بيانا طويل عريض هاجم فيه الصحافة والصحفيين واتهمهم بتحوير نبؤاته.. وذلك بعد أن تنبأ بفوز البرازيل على ألمانيا في نهايات كأس العالم 2014 على حسب ما ورد في الصحف في حينها. فانهزمت البرازيل من المانيا هزيمة نكراء خلت البرازيل كلها تتباكى وتتجاعر والبكاء لي عندنا هنا وصل.. سبعة أهداف هزت شباك البرازيل.. اعتقد أن شيخ بله شاف النتيجة مقلوبة.. فجاء بيان الشيخ بله نافيا أن يكون قال البرازيل ح تهزم المانيا بل العكس أن المانيا ح تهزم البرازيل هزيمة نكراء.. لكن الصحفيين حرفو كلامو وحولو الهزيمة لألمانيا.. وحلف تاني قال ما ح يتعامل مع أي صحفي.. ومن حقو طبعا طالما قاعدين يزورو ويحرفو نبؤاته.. ويطلعوهو زول ضعيف في التنبؤ.. وأنا لو محلو أحرد التنبؤ زاتو.. وأقول للناس إن شاء الله ما عرفتو.. انتو أول شبه تنبؤ يا بتاعين البوش.. أعرف الشي واموت بيها براي.. وإن بقى شيتن ختري جايي للناس الملم بعضي وأمشي.. والناس الما بصدقوني ديل خليهم يجهجهو..!! في حواره الأخير وعن تنبؤاته للعام 2015 قال الشيخ بله (شيء ما سينكشف يوم الاتنين).. على كل حال نحن معاهو كل اتنين لي نهاية السنة أصلو ما بنضايقو.. وقال (العالم سيفقد زعيم عربي).. وما دائم إلا وجه الله يا شيخ بله.. أما النبوءة التي استوقفتني فهي(ستحدث ظاهرة كونية تخيف النمل في الأرض).. كامل تعاطفي مع النمل.. الح يجنن ويجهجه ويشلهت.. هو أصلا ما ناقص شلهتة، مشلهت في معايشو وديمة جاري. غايتو يا شيخ بله انت قلت النمل ح يشلهت أنا تراني قاعد وراجي شلهتة النمل وخايف نضمك يبقى يا قول وليدات الزمن “حنك النمل الما بيعضي”.. يا شيخ بله ظاهرة كونية اكتر من السقط الجانا دا. خوّف النمل والباعوضة والضبان وحتى الناس!!

تعليقات الفيسبوك

تعليقات

مقالات ذات صله

الرد

لن يتم نشر عنوان بريدك الإلكتروني. الحقول الإلزامية مشار إليها بـ *