د. عادل الصادق المكي : درب الاتصالات للحول قريب

د. عادل الصادق المكي : درب الاتصالات للحول قريب

أصبحت الحياة مرتبطة ارتباط وثيق بوسائل الاتصالات من تلفونات ونت.. وعندما تنقطع بك سبل التواصل بسبب تعطل أحادهن.. تمسكك أم هلا هلا.. وتحس إنك اتقطعت من الدنيا وحبانا.. وإنك بقيت في حبس انفرادي.. لا أنيس ولا جليس.. تتلفت وتتطهم.. وتسلم علي إبليس “السلام المقصود هنا هو البوس.. وكانت مفردة مؤدبة شوية نستعملها في غابر الأيام للتعبير عن البوس.. ولو جبت طاري كلمة بوس فوق خشمك.. تبقى أنت زول مارق من الليد.. وما عندك أدب.. وممكن يحذرو الناس من التعامل معاك عشان ما تبوظ أخلاقهم.. دا لو ما عملو مجلس عشيرة.. وحكمو عليك بالبطح وعشرين جلدة تعزيرا وتأديبا.. وقد يلقي رئيس المجلس خطبة عصماء ويشتم السينما واليوم الجاب السينما الدايرة تبوظ أولادنا وتعلمهم النضم الفارغ.. وممكن يرفعو عريضة للدولة يطالبو فيها بإغلاق دور السينما.. مع الإبقاء على الأنادي.. ومصطلح تسلم على إبليس يعني تبوس ابليس.. وهي حركة تأفف وقرف.. واعتقد أننا الأمة الإسلامية الوحيدة القاعدة تبوس إبليس.. حيث أنه منذ أن طرد من الجنة ما لقى حاجة باستو.. العجيب انو الواحد يزهج ويبوس إبليس ويقول وراها الله ينعلك يا إبليس.. مما يدخّل إبليس في حيرة يا ربي الزول دا بيريدني واللا مكجني؟”.. حصل لي عطل في الاتصال بالنت.. وحاولت الاتصال بالشركة المشترك فيها.. فكانت حجوة ام ضبيبينة.. ولعبة المتاهة.. “مرحبا بكم مع خدمة الشركة (الفلانية).. للعربية اضغط واحد للإنجليزية اضغط اتنين”.. تضغط.. وتمشي تباري البنية البتنضم معاك من اضغط لي اضغط.. لمن توقفك في خشم باب خدمات المشتركين.. وتقول لك امشي شوية كان داير تنضم مع واحد من الموظفين.. وكان كمان داير تبدأ تحوم من الأول اضغط السلم.. يقولو ليك سوف يتم تحويلك.. يشغلو ليك نشيد الشركة.. ويعيدوهو ليك تلاتة أربع مرات.. يجيك صوت موظفة “أهلا مرحب في الشركة الفلانية ممكن نتعرف عليك؟”.. ما تحدسها انت منو ادخل في الموضوع طوالي “أنا عندي مشكلة في النت.. بسوي كدي وكدي وما بدخل معاي”.. ترد عليك بكل زوق ونضم حافضاهو مسكينة وتكون قالتو لخمسين زول غيري.. “طيب يا أستاذ خليك علي الخط شوية.. تقعد على الخط وعشان ما تزهج يشغلو ليك نشيد الشركة.. تسمعو فوق عينك.. تجيك راجعة “اسفين للتأخير والانتظار.. ممكن تخليك معانا نحولك لقسم الانترنت”.. “تقول لها سمح”.. يشغلو ليك نشيد الشركة.. تلاتة أربع مرات.. فجأة يجيك ناطي صوت راجل “مرحب بك في الشركة الفلانية”.. النصحية هم ناس طيبين اليجي ينضم معاك كلو يرحب بيك هاش باش.. تحكي قصة النت الخربان.. يشغل ليك نشيد الشركة.. تسمعو كويس.. يرجع لك “شوف يا أستاذ اعمل الخطوات دي” يوريك الخطوات.. تمرق منو.. تمشي تسوي الخطوات.. والحال في حالو.. ترجع تضرب تاني.. ونفس الجري والشلهتة الفاتت.. وتسمع نشيد الشركة.. وتصل لي زولك بتاع النت.. تحكي ليهو يقول لك “يا أستاذ ممكن تتصل بأقرب مكتب للشركة قريب منك”.. بعد تسلم على إبليس.. تشيل الكونكت وتجدعو في رأس البيت!.. وانت تتسأل “نشيد الشركة دا، كلمات وألحان منو؟”

تعليقات الفيسبوك

تعليقات

مقالات ذات صله

الرد

لن يتم نشر عنوان بريدك الإلكتروني. الحقول الإلزامية مشار إليها بـ *