د/ عادل الصادق المكي : حمير في حياتنا

قلت إنه كل ما تسنح لي سانحة.. انتهزها وأشيد بالحمار ودوره المهم في الحضارة الإنسانية..
علاقتنا بالحمير علاقة قديمة.. متجذرة.. تترنح بين الازدراء والاحتقار وبين قليل من الاحترام والشفقة.. للحمار تأثير على ثقافتنا.. طالما نحن نتعامل معه.. من أهم الحمير :-
حمار الحلب، حمار كلتوم، حمار الهدوم، وحمار النوم..
حمار الحلب:- هو دائما مضرب مثل للتدليل على الخداع.. لأنو الحلب كانو في حوامتهم يجلبو الحمير.. الحمار يركبه المشتري ويكون مشاااااااي وسريع.. ويعجبو ويتبسط منو.. بعد يومين.. يا الله يمشي.. ولو لقيتو راقد.. ترفعو عشان يقيف علي كرعيهو.. عندهم وصفة سرية للحمار تخليهو يمشي سريع ويكون نشيط.. بعضهم يقول إنهم بيستعملو سحر.. وبعضهم اتهمهم بوضع الشطة في مناطق حساسة من جسد الحمار تخليهو يمشي وأحيانا ينطط وأحيانا يفنجط.. اعتقد أن الحلب كانوا بيدو الحمير منشطات ساعة البيع.. وأول ما ينتهي مفعولها.. الحمار يرجع لي سجمو ورمادو!!
حمار كلتوم:- معلوم ومعروف.. وهو أول حيوان سوداني يعتبر شهيد.. عندما جات الطيارة بي فوق وشايلة القنابل كوم دايرة تضرب الخرتوم ضربت حمار كلتوم ست اللبن.. ومات نتيجة للصراع الكان حاصل في الحرب العالمية التانية.. وقد خلدناهو في الغنية الانفة الذكر..وقبل ايام شايف في احدى وسائل الإعلام كان في صراع حول انتماء حمار كلتوم هل هو ينتمي الي الخرتوم ام الي القضارف؟ وأقول للمتصارعين مافي داعي يا جماعة للجهوية.. هذا الحمار حمار قومي وينتمي إلى السودان.. ويا ريت يكون عندنا ليهو يوم نحتفي بيهو (يوم حمار كلتوم).. ونشوف شركة عندها قريشات مضيقات خلقها ترعى هذا اليوم المجيد.. ويلطع لينا شاعر يعمل نشيد للحمار.. وفنان يغنيهو.. ونكون ما قصرنا لو عملنا مبارات قمة بين المريخ والهلال على كاس (حمار كلتوم)!!
حمار الهدوم:- كان يُصنع من الخشب.. ويعتبر ضروريا في البيت عشان يعلقو فيهو الهدوم قبل التحول للدولايب والشماعات.. ومن أهم أثاثات بيت الزوجية الجديد.. إضافة إلى تربيزة مرصوصة فيها العدة المكونة من كبابي شاي وكبابي شربات وصحانة طلس.. وصيبتين.. وحلتين.. إضافة إلى عنقريبين.. وتلقى العروس تقعد ما تلقى شغلة تشيل العناقريب تقبلن شرق من غرب.. وتشيل تربيزة العدة تختها في الركن الجنوبي بعد الشمالي وتقعد ترص في العدة من أول جديد (تغير ديكور) وغالبا ما يكون تغير الديكور بعد ما تكون (نقضت) شعرها واتمشطت مشاط جديد.. سمي حمار الهدوم حماراً لأن هيكله شبيه بهيكل الحمار ناقص الراس والضنب !!
حمار النوم:- المشي ليلا والزول نايم.. يكون نايم يقوم يلبس نعلاتو ويكشت.. ويحوم زين ويرجع يرقد تاني.. يعتبر حمار النوم من الاضطرابات النفسية.. وقالو رقبتو يمكن هستيريا.. بعض علماء النفس بي يقولو من صفات شخصية صاحب حمار النوم انو (مغرور).. وفاكيها في روحو ومتقرضم.. وفي الليل يشد حمار النوم ويقعد يحوم بيهو.. النضم دا خلاني أشك في ناااس كتار لو ما عندهم حمار نوم بيكون عندهم دحيش نوم!!

تعليقات الفيسبوك

تعليقات

الرد

لن يتم نشر عنوان بريدك الإلكتروني. الحقول الإلزامية مشار إليها بـ *