محمد عبد الماجد : يا عنكبة لو عملت ليك (مؤتمر صحفي) ما كان مرقتها للأبيض

الناس يسجلوا في (البرازيليين) وانتوا تعملوا في المؤتمرات الصحفية للاعب قديم
تراوري عمل ليه (مؤتمر صحفي) عشان يدخل (تشكيلة غارزيتو) وإلّا عشان يدخل (تشكيلة الحكومة) الجديدة؟
المريخاب ديل الحاجة وقت يكونوا عاوزين يصلحوها – اصلو ما بتغلبهم.
ولا بتحيروا.
يصلحوها ليك حاجاتهم زي الما حصلت حاجة.
يهندسوا ليك في الاشياء.
لمن انت براك تنبسط.
تستغرب وتقول في شنو؟.
لكن نحن بنريحهم.
نحن بنخليهم.
نحن ما بنرحمهم.
بنقيف ليهم على الواحدة كدا.
ما بنفوت ليهم (مسرحياتهم) دي.
يخرجوا ليك الموضوع ويعملوا ليه (سيناريو) – صلاح جاهين ما بعملو.
جماعتكم ديل ما فاضل ليهم إلّا يجيبوا (سعاد حسني) عشان السيناريو يكتمل والقصة (تتسبك).
طبعا من اجيب ليكم سيرة (تتسبك) دي ح تفكروا لي في ملاح (البامية المطبوخة).
تفكيركم كعب.
ورأسكم فاضي.
بسمع كتير عبارة (بامية مسبكة).
لمن (المسبكة) ارتبطت عندنا بالبامية المطبوخة.
عشان تفكيركم ما يمشي لي بعيد …قلت احسن اعملها ليكم (بامية مطبوخة).
لو عملتها ليكم اكتر من البامية المفروكة – ما بتطلعوا لي تاني من العمود دا.
اتخيلوا اعملها ليكم دمعة سمك (مسبكة).
يمين ما تطلعوا تاني.
كمان السمك فيه حلاة (دمعة).
ولمن تلقى ليها زول (يسبكها) – بتبقى حاجة ما تخلص.
لمن تشيل (استغرابك) وتطلع تعاين في الشارع.
المريخاب ديل – الزول وقت يكونوا عاوزين يقعدوه ..يقولوا ليك عمل ليه (مؤتمر صحفي).
مؤتمر صحفي على منو؟.
مؤتمر صحفي علينا نحن؟.
نحن عاوزين نكافح الملاريا.
عاوزين ندشن حملة تطعيم.
مؤتمر صحفي لي شنو؟.
الكلام دا قولوه لي زول ما عندو محترف (برازيلي).
يصلحوا ليك في الكلام – ويقولوا ليك تراوري (قدم اعتذار) رسمي.
اعتذار لي منو؟.
تراوري بيعتذر.
خلاص يا سيادة السفير.
سفير بس.
سفير السودان للامم المتحدة.
عملتوا ليكم قيمة لمحترف ما عندو اي حاجة.
محترف غير منضبط.
غير ملتزم.
يعمل ليه مؤتمر صحفي.
تاني تراوري كل ما يغيب ليه (45) يوم بيجي يعمل ليه (مؤتمر صحفي).
ويعتذر ويفوت.
عرف علاجكم.
عرف نقطة ضعفكم.
مؤتمر صحفي بس.
وانتوا عندكم اعلام ما بقصر في (المؤتمرات الصحفية).
غلبكم تدفعوا ليه (180) الف دولار ..قلتوا احسن يعمل ليه (مؤتمر صحفي).
شفتوا الحاجة الاسهل.
قلتوا احسن يعتذر.
نحن بنعرف غارزيتو.
وبنعرف تراوري.
وبنعرف بكري المدينة ذاتو.
كلهم كانوا معانا.
بنعرفهم زي (جوع بطنا).
تراوري دا لو عمل ليه (اختراع) واكتشف (الذرة) – غارزيتو ما بلعبوا ليكم.
انتوا عاوزنو يشارك في السلطة؟.
مؤتمر صحفي شنو؟..البخليه يلعب في (تشكيلة المريخ).
عاوزين تدخلوه (التشكيلة) بي مؤتمر صحفي.
انتوا مدخلنو (تشكيلة) الحكومة الجديدة …عشان تقولوا ليه اعمل لينا (مؤتمر صحفي) واعتذر فيه.
مؤتمر صحفي لي شنو؟.
انتوا بتستهبلوا؟.
انتوا بتلعبوا علينا؟.
غايتو عندكم جنس حركات.
شفتوا عشان حركاتكم دي ح تتعبوا مع (الجزائريين).
نحن من الـلـه خلقنا ما شفنا لينا محترف بغيب (6) شهور – ولمن يرجع بيعمل ليه (مؤتمر صحفي).
دي نحن ما سمعنا بيها.
يا محمد كامل سعيد …تراوري دا عمل ليه (مؤتمر صحفي) وزير الصحة ما بعملو.
الناس يسجلوا في (البرازيليين) وانتوا تعملوا في المؤتمرات الصحفية للاعب قديم.
انتوا جنيتوا.
كان بعد المؤتمر الصحفي دا تمنحوه درجة (الدكتوراه).
على الاقل كان تمنحوه (الماجستير).
مؤتمر صحفي!!.
مؤتمر صحفي يا مفترين.
تتخيلوا نحن (الخريف) بيجي ويفوت – وما بعملوا ليه (مؤتمر صحفي).
المدارس تفتح وتقفل – ما بعملوا ليها (مؤتمر صحفي).
درجة الحرارة بتصل لغاية (52) درجة ..برضو ما بعملوا ليها (مؤتمر صحفي).
مؤتمر صحفي لي تراوري.
تقول عاوزين يعلنوا (لجنة تسيير) للمريخ.
تراوري قعد بي مؤتمرو الصحفي دا.
المسكين (عنكبة).
عنكبة مرقها للابيض.
اعاروه هلال الابيض.
في لاعب من المريخ بعيروه للهلال لو دا ما لعب منكم ساكت.
فهمونا الحكاية دي.
الشغل دي شغل (ولاة) ساكت.
شغل احمد هارون وجمال الوالي.
اقنعوني ان الموضوع دا نظرة من غارزيتو.
كمان عاوزين تدخلوا غارزيتو في السياسة.
عنكبة لو كان بفكر..كان يعمل ليه (مؤتمر صحفي).
لكن يفكر كيف؟..هو لو كان بفكر كان كورتو بتمشي (الكشافات).
هسع كورتو مشت (الابيض).
الابيض عديل كدا.
يقعدوا ناس (تراوري) الما قاعد يلعب.
ولا قاعد يتمرن.
ويطلعوا ناس عنكبة.
يعني عشان عنكبة ما بعرف يعمل ليه (مؤتمر صحفي).
انتوا الحقارة حقتكم دي اصلو ما بتخلوها.
عنكبة ذنبو شنو؟.
عنكبة في السخانة دي يمرقها للابيض.
ويلعب في هلال الابيض كمان.
كان تودوه مريخ الفاشر.
لو مشى لفيصل العجب وحسن كمال – كان شوية كدا بتبقى مبلوعة.
لكن يمرقها للابيض.
والهلال كمان.
عنكبة البلعب ضد بارين ميونيخ.
عنكبة البلعب ضد شالكة.
يمشي يلعب في هلال الابيض.
غايتو بالاعارة دي …يكون اي لاعب كان ضمن تشكيلة المريخ امام بايرن ميونيخ ..المريخ اتخارج منو.
كلهم اتخارجوا.
بس فضل (مالك).
ومالك ذاتو ما كان لاعب امام بايرن ميونيخ.
لكن ناس باسيرو وشيلميس ومنو كدا العاجي داك ..وسيلمانو ..كلهم المريخ اتخارج منهم.
اخرهم كان عنكبة.
وعنكبة هسع في هلال الابيض.
طبعا يا عنكبة عشان تكون عارف …(الاعارة) دي مخارجة بي ظرافة كدا.
مخارجة بي رشاقة.
منو الاعارو المريخ ورجعو.
انت براك شايف.
سعيد السعودي.
الطاهر سادومبا.
كلهم رفضوهم.
ما في واحد فيهم برجع.
عشان كدا يا عنكبة ابقى ركز من هلال الابيض.
خلاص انت طلعت من الخرطوم.
وان رجعت للخرطوم ..ما بتلعب إلّا في الخرطوم الوطني.
اقنع من ناس المريخ.
بقعدوا فيها البجيبوهم من الهلال ..ناس بكري المدينة والباشا وتراوري ..ويتخارجوا ناس عنكبة.
لو جابوك من الهلال كان ح تقعد معزز مكرم.
وما في زول بقدر يقول ليك حاجة.
انت براك شايف.
الباشا …ليه سنة ونص ما شفنا ليه حاجة.
وقاعد في الكشف.
كمان كابتن الفريق.
تراوري ..يغيب ويسافر ..ويعمل ليه مؤتمر صحفي.
بكري المدينة ..ما في زول بقدر يقول ليه حاجة.
ولا كلمة.
انت يا عنكبة مسكين.
عشان جابوك من الخرطوم الوطني – يعملوا فيك كدا.
عشان ما بتعرف تعمل ليك مؤتمر صحفي.
طيب وقت ما بتقدر على المؤتمر الصحفي – طلع ليك (بيان).
طلع ليك بيان رش فيه الجماعة.
قول فيه اي حاجة.
ما تقعد لينا مسكين كدا.
كدا حقك بروح ساكت يا عنكبة.
الحقارات نحن ما قاعدين ندورها.
الحقارات نحن بنعرفها.
واللف والدوران ..والاعارات المفخخة.
…………….
ملحوظة : يا عنكبة الابيض الايامات دي قالوا فيها جنس جو.
هوامش
قبل جوليام.
وقبل جونيور.
خبطة التسجيلات كانت في وليد الشعلة.
والخبطات اتواصلت في نزار حامد ونصرالدين الشغيل.
هذه انتصارات كبيرة للاعب الوطني.
وخبطات يستحق عليها مجلس الادارة الاشادة والتقدير.
جميل تصعيد (الثعلب).
الهلال فيه اكتر من بشه.
واكتر من برنس.
واكتر من ثعلب.
نحن اي حاجة عندنا بي نظام.
نحن ما قاعدين نلعب ساكت.
نحن بنعمل في الحاجات دي بي فهم.
يا ربي ناس المريخ في الرديف عندهم (عنكبة) برضو.
عنكبة الرديف.
اسمعوا كلامي دا.
في التسجيلات القادمة سوف تتم اعارة ابراهومة.
نحن الحاجات دي عارفنها.
نحن الحاجات دي حافظنها.
وشاربنها شراب.
………………
عاجل : قالوا مالك بفكر ليه في (مؤتمر صحفي(.

تعليقات الفيسبوك

تعليقات

1 تعليقات

  1. ابوصلاح علي

    مقال بايخ لذلك لم اجد اي ردود غايتو السودان اصبح فيه نوعيه غريبه من اشباه الصحفيين عيال يعني

    الرد

الرد

لن يتم نشر عنوان بريدك الإلكتروني. الحقول الإلزامية مشار إليها بـ *