محمد عبد الماجد : سبحان مغيّر الأحوال من (عجبكو الهندسية) إلى (عمركو الهندسية)

فيصل العجب بقوا ما بتذكروه بي (سطر)..تقول كان في المريخ ماسك (البوفيه)
“”””””””””””””””””””””””””””””
يا حليل (السلطان عبدالحميد)…السعودي دا – تقول في المريخ كان سائق (عربية الترحيل)
“”””””””””””””””””””””””””””””””””””””””
كابتن الباشا …نسوه..بقوا ما بجيبوا سيرتو…كأنو بيلعب في مريخ الفاشر
“””””””””””””””””””””””””””””””””””””
بله جابر قاعدين يعيدوا تسجيلوا بـ (100) مليون ..والمليارات بتمشي حتة تانية
“””””””””””””””””””””””””””””””””””””
• زمان قدام البيت..كانت بتكون في (شجرة).
• ومزيرة.
• وبكون في (ميدان كبير)…ما في زول بقول الميدان دا حقو.
• وبكون في (نادي).
• وبكون في (دكان)…فيه سماحة (طحنية).
• فيه طحنية عجيبة.
• وبكون في (شفع) بيلعبوا.
• ونسوان مارقات العصر.
• الحاجات دي ثابتة قدام أي بيت سوداني – نحن حافظنها حفظ.
• عارفنها.
• أي بيت كانت قدامو بتكون في هذه الحاجات.
• هذه الأشياء كانت ثوابت.
• قدام أي بيت.
• هسع الحاجات دي كلها بقت مافي.
• الشجرة قطعوها.
• المزيرة نشفت.
• الميدان شالوه…وزعوه.
• النادي شلعوه.
• الدكان بقى فاضي ما فيه أي حاجة.
• الشفع الكانو بيلعبوا مشوا وين ما عارف؟…دخلوا السوق – الحالة بقت صعبة.
• النسوان الكانن بطلعن العصر ..عملنها كلها مسلسلات وواتس آب.
• الحياة اتغيرت.
• الحصل شنو؟…عليكم الله ما تسألوني.
• زمان – زمنا نحن ..كان (الكورة) بتطير جوه البيت.
• المشهد دا – أنا حافظو حفظ.
• في كل يوم بنلعب كورة العصر – الكورة تقوم تطير في بيت من البيوت.
• سيد البيت يطلع لابس ليه عراقي قديم كدا ..قايم من النوم زعلان وبهرج.
• يقول لينا تاني الكورة دي لو وقعت في البيت بقدها ليكم.
• شفع ما عندكم أدب.
• ما عندكم احترام.
• أنتوا عليكم الله جايبنكم من وين؟..عفاريت بس.
• الغريبة الكورة كانت بتقع..وزولكم ولا بقدها.
• الناس كانت طيبة شديد.
• بتكلموا ساي.
• لكن كمان لمن الكورة كانت تكسر لمبة الحوش – كنا بنشيل شيلتنا ..أسبوع تاني ما بنلعب كورة.
• الحلة كلها كانت بتشكي مننا.
• هسع بقت ما في كورة بتطير في البيت.
• وما في لمبة بتتكسر.
• وما في شفع بلعبوا في الأساس.
• عمري ما شفت في الخرطوم دي ..زول طالع من بيتو وبهرج مع الشفع عشان الكورة طارت في بيتو.
• الحصل شنو؟.
• الشفع ديل يا بقى ما عندهم (حيل) عشان يطفشوا الكورة.
• عشان تقع جوه البيت.
• أو البيوت دي بقت مقفلة.
• أو مافي فسحات عشان الشفع يلعبوا في الأساس.
• الغريبة الشفع بقى ما عندهم وقت.
• هم فاضيين لي من التلفونات.
• فاضيين لي من البلي استيشن.
• شفع الزمن دا ما عندهم وقت.
• بقوا مهمين زي (المدراء).
• غايتو – نعمل شنو؟.
• ونقول إيه؟.
• ما ح نعمل أي حاجة.
• ولا بنقول شيء.
• المريخاب حياتهم كلها بقت (عمر بخيت).
• من بكري المدينة لي عمر بخيت.
• بقوا يوصفوا ليك المريخ بـ (عمر بخيت).
• الناس ديل أتاريهم مع (مصعب عمر) كانوا قاعدين في الصقيعة.
• كانوا ممكونين وصابرين ساكت.
• يا حليل (عجبكو الهندسية)….بقوا ما بتذكروه بي سطر.
• تقول كان في المريخ ماسك (البوفيه).
• يا جماعة نسيتوا (العجب).
• العجب الودانا (غانا).
• نكرتوه (حطب).
• يا حليل (السلطان عبدالحميد).
• السعودي دا – تقول في المريخ كان سائق (عربية الترحيل).
• ناس مزمل أبو القاسم وسلك بقوا ما بجيبوا سيرتو.
• تقول عاوز منهم قروش.
• بالمناسبة الجماعة البتكلم ليكم عنهم ديل – دفعة المعز محجوب وعمر بخيت وهيثم مصطفى.
• يعني ما تقعدوا تنكروا ساكت.
• ما تقعدوا تتخلعوا لينا في الفاضي.
• يا حليل (هيثم الرشيد).
• تلقاهم هيثم الرشيد ما عارفنو كان بلعب وين؟.
• يا حليل (أحمد يكيني).
• انتوا قاعدين تنسوا.
• موش (أحمد يكيني) دا جبتوه عشان يقفل (هيثم مصطفى).
• عشان يراقب (هيثم مصطفى).
• وينو أحمد؟.
• وينو المهندس محمد موسى؟.
• بقوا ما بعرفوه.
• في زول عاقل كدا بنسى المهندس محمد موسى.
• لو انتوا بتنسوا للدرجة دي ..خلوني أسألكم من ناس معاكم في الكشف.
• وقت بتمسحوا سريع كدا.
• وينوا أحمد الباشا؟ ..كابتن المريخ ..الزول الشباح.
• أسرع زول.
• يمين أحمد الباشا بي مستواه دا لو كان بيلعب في الهلال …كان هسع مرقتوا ليه في مظاهرات.
• كان شجعتوا ليه برشلونة.
• كابتن الباشا …نسوه.
• بقوا ما بجيبوا سيرتو.
• تقول بيلعب في مريخ الفاشر.
• وينو بله جابر؟.
• نسيتوا البعملوا ليكم بله جابر.
• بله جابر دا عليكم الله قصّر معاكم.
• بله جابر قاعدين يعيدوا تسجيلوا بـ (100) مليون ..والمليارات بتمشي حتة تانية.
• وقت بتعرفوا تقدروا الناس.
• وبتقدروا العمل.
• والعطاء.
• انتوا ما تقدروا (بله جابر).
• الزول دا كابتناً للمريخ.
• ما تقعدوا تعملوها لينا كلها (عمر بخيت).
• المضحك والغريب أن صحافة المريخ حاولت تعمل (فتنة) في الهلال وقالت إن مجلس الهلال أعطى نزار حامد اتنين مليار ونص.
• مالو؟.
• يستاهل.
• نحن (المليارات) بنديها (أولادنا) …ما بنديها أولاد المريخ.
• انتوا يا ناس المريخ ناس بله جابر بتسجلوهم بي مائة مليون ..والمليارات بتمشي لي ناس بكري المدينة والمعز محجوب وعمر بخيت.
• وبعد المليارات دي – بقعدوا يشكروا فيهم.
• بطلعوهم السماء بعد (14) سنة لعب في الهلال.
• عليكم الله من الله خلقكم شفتوا ليكم (خلعة) زي دي.
• قابلتكم.
• سمعتوا بيها.
• صادفتكم في حتة.
• جميل من الهلال أنه أنصف نصر الدين الشغيل وأعاد تسجيله ..كما فعل مع الصاقعة نزار حامد.
• وجميل من مجلس الهلال أنه أعاد قيد الكابتن سيف الدين مساوي.
• انتوا يا ناس المريخ تسجلوا في ناس بكري والمعز وعبده جابر.
• وتخلوا لي ناس أمير كمال وأحمد الباشا.
• شيلوا شيلتكم معانا.
• عبدالصمد عرفها.
• عبدالصمد عرف ليك الموضوع صعب.
• قال أحسن يتخارج.
• من هسع بنقول ليكم تسجيلات نوفمبر …شوفوا ليكم (بلد).
• العمليات بدأت منذ الآن.
• العمل انطلق.
• انتوا قالوا ليكم الكاردينال دا شغال بي (الجوهرة الزرقاء).
• الكاردينال دا شغال شغل تقيل…ما بتقدروا عليه.
• عبدالصمد انسحب.
• والوالي نوفمبر ما بنتظروا.
• ابقوا متذكرين الكلام دا.
• تسجيلاتكم يا ناس المريخ زي (الملوخية بي الأرانب).
• عارفين قصتها ..ولّا أقولها ليكم.
• في مصر بقولوا ليك : (ملوخية بي الأرانب).
• حيث (ملوخية الأرانب) في مصر عندها شنة ورنة…قومة وقعدة.
• عندها حكايات.
• البلد كلها بتتحدث عن (الملوخية بي الأرانب).
• بما في ذلك مسلسلات أسامة أنور عكاشة وأفلام وحيد حامد.
• يدخّلوا ليك (الملوخية البي الأرانب) في نفسك.
• لو ما عندك قضية بـ (الملوخية بي الأرنب) يبقى عندك بيها قضية.
• لم يسلم من ذلك حتى أدب (نجيب محفوظ).
• يعني الموضوع وصل مستويات رفيعة.
• مرة قلت أشوف حكاية (الملوخية البي الأرانب) البزعجنا بيها إسماعيل عبدالحافظ في كل المسلسلات التى يخرجها.
• نشوف الحكاية شنو؟.
• طلبت (ملوخية بي الأرانب) – جابوا لي (ملوخية) ما في أي علاقة بينها وبين الملوخية.
• حبة ملوخية ما فيها.
• قلت ما مشكلة.
• الملوخية ما بيناتنا – ما قضية …أحسن أركز على (الأرانب).
• سألت ليك المصري قلت ليه وينها الأرانب؟.
• المصري قال لي يعني أنت لقيت (الملوخية) عشان تلقى (الأرانب) يا زول أكل ساكت.
• أكلتها ..لكن من اليوم داك عرفت ليك (الملوخية بي الأرانب) دي كلام ساكت.
• كلام جرايد بس.
• شابكننا في المسلسلات كلها ملوخية بي الأرانب – ملوخية بي الأرانب – ملوخية بي الأرانب..ولا عندكم ملوخية ولا عندكم أرانب.
• ….
• ملحوظة : سيلا دا إلّا تكونوا سجلتوه للخريف …مجموعات شنو البلعبها ليكم سيلا.
هوامش
• إعداد الهلال شغال.
• البناء في الجوهرة الزرقاء شغال.
• علاج المصابين ..ماشي تمام.
• والتخطيط لتسجيلات نوفمبر بدأ منذ الآن.
• الرديف مية المية.
• الشباب …ما فيهم أي كلام.
• تاني شنو؟.
• بعد كدا نعمل شنو يا جماعة.
• حولوا رصيد بس للهلال.
• أقل ما يمكن أن يقدم للهلال.
• الله يكفينا شر الإصابات.
• ………..
• عاجل : قالوا ليك سيلا قال ليهم لو عارف (اندرزينهو) كان قعدت في (الأهلي شندي).

تعليقات الفيسبوك

تعليقات

الرد

لن يتم نشر عنوان بريدك الإلكتروني. الحقول الإلزامية مشار إليها بـ *