د/ عادل الصادق المكي : عليكم الله ما تكاوونا

د/ عادل الصادق المكي : عليكم الله ما تكاوونا

أذكر في إحدى دول الخليج.. وأيام غربتي وتغربي.. كنا مجموعة من المواطنين، مواطنين البلد النحن فيها.. ونحن اتنين سودانيين.. حان موعد صلاة المغرب.. تقدمنا أحدهم.. وقف ونهرنا أن استووو.. استوينا.. ونحن أصلا مستوين قبال ما يقول لنا.. وقعد يقرأ بصوت عالي.. غلط في آية.. قرآنية.. صاحبي المعاي قال ليهو “سبحان الله”.. حاول الإمام يصلحها غلط تاني ولخبطها فوق تحت.. صاحبي صلحو.. انتهت الصلاة.. الإمام ونحن طالعين تلاتنا أنا وهو وصاحبي.. قال الإمام لرفيقي وهو معاتبا لائما “ايش فيك يا رجال تفشلني قدام خوياني؟”.. يعني لشنو تحرجني قدام الناس؟.. وتصلحني.. وهو يقصد انو مفروض صاحبي يطنش ويخليها تمر عشان ما يحرجو ويطلعو أي كلام.. طالما ما مافي زول جايب خبر!! العبادة علاقة روحانية بين الرب والعبد.. الزول لما يؤديها ما يكون قدامو غير الله.. يعني ما يسويها عشان زول.. ولا يقصد من وراها مقصد من مقاصد الدنيا.. ولا يوظفها لمصلحتو.. إلا للتقرب من الله سبحانه وتعالى وخالصة له.. رمضان على الأبواب.. وبدت تظهر مظاهر الاحتفاء بقدومه.. الكوجان وريحة عواسة الابري.. والإعلان عن مواد رمضان.. وسلة رمضان.. وأي زول تلاقيهو وتسألو عن موضوع أو مشروع يقول ليك “كدي خليهو بعد رمضان”.. أو رمضان دا يا زول مافيهو حوامة.. وبدينا نهتم بأحوال الطقس وخصوصا ارتفاع وانخفاض درجات الحرارة.. ونتابعها باهتمام.. لو الواطا حرت.. نتمنى إن شاء الله ما تجينا كدي في رمضان.. وعلى مستوى أجهزتنا الإعلامية كلها.. مسموعة ومرئية ومقروءة.. تتجهز لرمضان.. برامج رمضان.. والبرامج الدينية قبل رمضان بشهر أسئلة كلها عن القضا.. وخصوصا من الجنس الناعم.. الواحدة تتمحرك السنة كلها أول ما رمضان يقرب ويكون باقي ليهو شهر تتذكر القضا.. وتتلفت وتسأل.. وتصوم.. اطناشر شهر كل مرة تقول للشهر الجاي.. لحدي ما يزنقها رمضان.. أما برامج القنوات الفضائية الراتبة والثابته.. وأشهرها على الإطلاق برنامج أغاني وأغاني.. تتسرب إلينا أخباره.. كنوع من الترويج للبرنامج.. الفنان فلان قال ح يحرد.. والفنانة علانة جاية تاني.. والفنان فرتكان أول مرة ح يشارك.. والبرنامج في ثوبه الجديد “في ثوبه الجديد دي اتلحوها ناس الجرايد.. شغالين ترزية.. كل شهر جريدة يتلفتو يلقو حالها وقف.. يحدثونا ترقبو الجريدة الفلانية في ثوبها الجديد وهو يكون نفس توب الجارات القديم بس غسلوهو.. أدوهو شطفة شطفتين وكوهو.. وملصقات.. أربعة وأربعين صورة لكتّاب.. راصنهم.. واحد مقبل شرق وواحد مقبل غرب وواحد مدنقر وواحد مشلق.. وكل الأوضاع الممكنة.. وسيد الجريدة صورتو فوووووووق.. وانت تعاين يا ربي دي جريدة واللا مدرسة خاصة؟؟.. وديل الطلبة المتفوقين.. أول ما تطلع تلقى من الأربعة واربعين كاتب اتنين بس البيكتبو.. ما عارف الفهم شنو؟ جريدة من قولة تيت تغشني باقي لكم تاني بصدق نضم يجي فيها؟ “.. أغاني وأغاني برنامج ناجح مافي نضم.. علا عليكم الله يا ناس البرنامج.. الفنانات ديل ما كل يوم فستان جديد ولبسة جديدة.. ما تكاوو بنياتنا.. براهن مسكينات يلتقّن فيها.. يبقن في فساتين.. وحدو الزي حقهن.. لبسوهن كاكي.. رأفة بحواء السودانية.. ومن ثم بآدم..

تعليقات الفيسبوك

تعليقات

مقالات ذات صله

الرد

لن يتم نشر عنوان بريدك الإلكتروني. الحقول الإلزامية مشار إليها بـ *