بابكر سلك : جونيور سيد اللبن

بابكر سلك : جونيور سيد اللبن

* أيها الناس
* لا أطلب منكم أن يكون إنتمائكم الرياضى صوفى الطبع
* بمعنى ان تحب كيان لا تنتمى له
* فأهلنا الصوفيه بطرقهم المختلفة
* وبإنتماءاتهم المتعددة
* يحبون بعضهم البعض
* بل ويقدمون الآخر عليهم
* إنه تواضع كبير وأدب تمتاز به الصوفية التى يعود الفضل اليها فى تربية أهل السودان
* ولكن اطلب منكم ان تنتموا رياضياً لمن تريدون الإنتماء له
* وتحبون إنتمائكم بجنون وإخلاص
* وأن تتباهوا بإنجازات وإنتصارات كياناتكم التى تنتمون اليها
* فقط أطالبكم بإحترام الآخر
* وعدم المساس بقامات ومقامات أناس لهم أوضاعهم وماناتهم المحترمة عند أهل
إنتماءاتهم
* مع إصرارى على دوام المناكفات البريئه التى تعطى للرياضة طعم
* وتجعل من المجتمع الرياضى مجتمعاً متميزاً يقبل النصر والهزيمه بصدر رحب
* أيها الناس
* تفلتات بدأت فى الظهور من جديد
* والمتصفح لصفحات الشبكه العنكبوتيه والقروبات
* يجد ان الأمر قد وصل نقطه بعدها الإنفجار لامحالة
* خاص صفحة الأحمر الوهاج
* والأنفجار يعنى خراب مالطا
* يعنى تفلت الوسط الرياضى وضياع ميزاته
* والوسط الرياضى ليس كذلك
* فشاعرنا الدكتور عمر محمود خالد عبر عنا بقوله
* نحنا فى الوسط الرياضى لابنخاصم ولا بنعادى
* أيها الناس
* الإنتماء بتفلت يضر الوطنيه
* والقومية هى العنوان
* لا لجماعه ولا لكيان
* لأن عدم إحترام الآخر يؤدى الى عدم الإعتراف بالآخر فى كل المواقع
* ومن تلك المواقع المنتخب
* فإنتمائنا لأنديتنا بتفلت وتشدد
* يقود الى تلاشى الإنتماء القومى
* والنظرة للمنتخبات بمنظار الإنتماء الضيق تضيع علينا طعم الوطنيه
* فالإنتماء لقبيلة بأى حال
* لايعتبر خصماً على الإنتماء الأكبر
* للوطن الكبير
* أيها الناس
* تعالوا نفرمل شوية
* خاص صفحة الأحمر الوهاج
* لننقى الوسط الرياضى من كترابات التشدد التى ألمت به
* فمثلاً لا يمكن أن نقرأ ونسمع هتافاً يقول
* الشعب يريد إخراج الشغيل
* والشغيل وقتها يضع صقر الجديان على صدره مدافعاً عنه
* ولكنه الإنتماء الضيق هو الذى قاد الناس لذلك الهتاف
* فيجب ان يستوى الأمر لدينا
* لوجاب قون المنتخب بكرى المدينه او كاريكا
* يجب ان نفرح كلنا
* فالمقام مقام بكرى لاعب المنتخب وكاريكا لاعب المنتخب ونحن شعب المنتخب
* ولكنه ليس مقام الجاب القون لاعبنا والصرج الكورة مدافعكم
* أيها الناس
* بالنسبة لينا الهلالابى هو منو؟؟؟
* وبالنسبة للهلالاب المريخابى هو منو؟؟؟
* بالنسبة لينا الهلالابى هو يا ابو يا أخو يا ابن عم يا خال يا صديق عزيز
* فهل يعقل ان يخسر الأنسان أخاه لمجرد إنتماء كروى؟؟؟
* إن كان كذلك
* خلاص
* نصحى من النوم بدرى نكتل الهلالاب فى بيوتنا
* ويصحوا الهلالاب بدرى يكتلوا المريخاب فى بيوتهم
* خاص صفحة الأحمر الوهاج
* ويبقى جمهور ابوروف هو اكبر جمهور نادى
* يلموا فيهو جماهير بيت المال يلحقوهوا امات طه
* وهكذا
* الى ان نصفى كل الإنتماءات الرياضيه للأنديه
* أيها الناس
* قليل من التعقل يقودنا لبر الأمان
* ويعطى الرياضة معناها السامى
* الذى وجدناها عليه وأحببناها فيه
* أيها الناس
* وتبقى بعد كل ذلك المناكفات البريئة الجميلة
* التى لا تخدش إنسان ولا تسئ لبشر
* عليكم الله
* لو ما البلد دى فيها هلالاب كان فرحنا بى جوياتنا قدر ده؟؟؟
* ولو ما البلد دى فيها مريخاب كان الهلالاب إتحرجوا من صفرهم الدولى ده؟؟؟
* الأهلة أعطوا إنجازنا الجوى طعماً
* والشفوت ولدوا فى الأهلة إحراجاً جعلهم يصرون على فراق الصفر الدولى
* يبقى المناكفات ممكن تكون حث على السعى والجد والإنجاز
* فقط بدون إساءة
* أيها الناس
* خاص صفحة الأحمر الوهاج
* ما قلته الأهلة يحبوا المريخ
* ولاقلت المريخاب يحبوا الهلال
* فقط يتبادلوا الإحترام بيناتهم
* أسى عليكم الله
* لوما الهلال كان عرفنا انو النسور إتظلمت فى بلنتيين عديل؟؟؟
* غير كورة النسور ضد الهلال
* أتحدى مريخابى عرف النسور لاعبه متين تانى
* الأهلة بعد قون حسن كمال فينا
* مريخ الفاشر بيلبس شنو ما عرفوهوا
* إلا يوم مريخ كوستى شطب سيمبو فى إستاد الهلال
* اليوم داك عرفوا انو الله واحد
* أيها الناس
* يبقى كلو زول يحب ناديهو زى ما عايز
* ويقدم ليهو
* فقط يحترم الآخر
* عشان تحترمنا الكورة
* وتصعد بينا الى مصاف الأبطال
* أيها الناس
* حقو نحاول يمكن نقدر
* خاص صفحة الأحمر الوهاج
* المهم
* ماشاء الله الإذاعة الرياضيه إعلاناتها كتاااااااااااار
* لكن اللفت نظرى
* الشفع بريدوا دعايه معينه
* اول من تجى بغنوا معاها
* الدعايه بتقول
* جونيور سيد اللبن
* جونيور ده دحين ما أسم برازيلى؟؟؟
* وجونيور سيداللبن
* لحنها جميل
* أيها الناس
* إن تنصروا الله ينصركم
* أها
* نجى لى شمارات والى الخرتوم
* أكان قلت يا والينا
* المدارس تفتحها لينا
* اول شئ المراورح فى فصول الزنكى ركيها لينا
* طبعاً ما عشمانين تكندشها لينا
* حيشان المدارس شجرها لينا
* خاص صفحة الأحمر الوهاج
* بين كلو طالب وطالبه مسافة خليها لينا
* أعمل كليك بين كلو طالب وطالب يا والينا
* وجموع أطفالنا من السحائى تطعمها لينا
* وما دايرين نتكلم عن الترحيل يا والينا
* خاص صفحة الأحمر الوهاج
سلك كهربا
** ننساك كيف ورمضان والمدارس والخريف كلهم جايات فى الصيف&&& خريف
فى الصيف؟؟؟؟صعبتوها علينا يا والينا؟!!
والي لقاء
سللللللللك

تعليقات الفيسبوك

تعليقات

مقالات ذات صله

الرد

لن يتم نشر عنوان بريدك الإلكتروني. الحقول الإلزامية مشار إليها بـ *