محمد عبد الماجد : وليد الشعلة – مين طفأ النور؟

يعني القاعد بحضر لمباراة للهلال الآن بفتكر نفسو بحضر في مباراة للهلال في التسعينات..الثعلب تو ..والشعلة تو …والصيني تو..وبشه تو
الهلال ظهر فيه (ثعلب) تاني..الثعلب الكبير هاجر امريكا…ظهر لينا صهيب (الثعلب)
تطبيقا لنظام الحاسوب الآلي ..الهلال كان فيه خالد (الصيني)..هسع جاء عماد (الصيني)
فات سادومبا…ظهر سادومبا في فريق الشباب…يا جماعة – الكلام دا جماعتنا ديل ما بقدروا عليه
· في مصر ظهرت اغنية راب ساخرة اسمها (مين طفأ النور؟) ..عبرت ان الوضع وقتها بشيء او بآخر في مصر.
· وناقشت قطوعات الكهرباء التى شهدتها مصر في الفترات الاخيرة.
· الكهربة في مصر بقت (تقطع) اكتر من (الحبوبات).
· بعض ما فيه نحن الآن يصلح ان نعنونه بهذه الجملة (مين طفأ النور؟).
· والمسألة اكبر من (القطوعات).
· وكلام الحبوبات.
· اظن ان عادل امام استعمل العبارة اولا في احدى مسرحياته …فكان تداول الناس لها من بعد بهذه الصورة الساخرة.
· لتقريب المسافات …وعشان نطلع من هذه الحتة باقل الخسائر ..ممكن ان نقول العبارة قبل فصل الخريف.
· عشان بعدين ما تقولوا لينا الخريف جاء (فجأة).
· فجأة عرس هو؟.
· الزول وقت يعرس ..ويلاقي ليه زول من الاهل او من الاصحاب ويقول ليه مالك ما كلمتنا بي عرسك؟.
· بقوم يقول ليه والـلـه العرس دا جاء (فجأة).
· اصلو ما رتبنا ليه.
· ومين طفأ النور؟.
· وحاجات كتيرة (ما عاوز اتكلم عنها الليلة) موش علي كيفي – يصلح ان تختصرها في (مين طفأ النور؟).
· ما عاوز اتكلم.
· انا حر.
· في لخبطة حاصلة.
· عشان اقرب ليكم الحكاية.
· واحد عزم صاحبو (سمك).
· مشوا المطعم.
· نزلوا ليك السمك دا الوان واشكال قدامهم.
· انواع السمك الفي العالم دا كلو – جابو منو عينة في (التربيزة) القدامهم.
· شيء مشوي – وشيء محمر – وشيء شاورما – وشيء كوفتة – وشيء سلات.
· اي نظرية طبقوها ليك في (السمك) دا.
· ما فاضل ليهم إلّا يعملوا منو (شوربة عدس).
· فاضل ليهم بس ..يعملوا منو (الحقيبة المدرسية).
· الايامات دي في ثقافة (حقيبة مدرسية).
· اي واحد يقول ليك والـلـه نحن (الحقيبة المدرسية) دي ما خلت لينا حاجة.
· مكلفة شديد.
· وبعد ايام بيظهر طرد رمضان.
· او كرتونة موية رمضان.
· وفطور الصائم.
· المهم الجماعة – مشوا المطعم ونزلوا ليك (السمك) بالشكل القلتوا ليكم.
· اول ما الجرسون كمّل الطلبات …الكهربة قطعت.
· بعد (40) ثانية ..الكهربة جات.
· الكهربة لما جات التربيزة ما لقوا فيها ولا سمكة.
· تربيزة (نضيفة) ما فيها الحبة.
· تفتكروا السمك في الـ (40) دقيقة اختفى وين؟.
· ح تقولوا لي المحلية.
· تتخيلوا ما المحلية.
· بس ساكت عاوزين تسوها في (المحلية).
· السمك في الـ(40) ثانية رجع (البحر).
· سمك الزمن دا اصلو ما تثق فيه – بعد ما تطلع السمك من البحر وتقشروا وتنضفوا وتحمروا في الزيت ما عندو ضمان.
· ممكن يرجع في اي لحظة.
· يرجع بحرو.
· (الضرائب) بحر طبعا.
· بتشيل اي حاجة.
· ومين طفأ النور؟.
· في الهلال الايامات دي حاجة عاجباني.
· حاجة قلتها ليكم عرضا كدا.
· لكن انتوا ما مساعديني.
· ما عاوزين تستوعبوا لي (الفكرة).
· ناس المريخ …بسجلوا لاعبين من هلال 1987.
· وبسجلوا من هلال 2002م.
· وبسجلوا من هلال 2007.
· سجلوا المعز محجوب وبكري المدينة وعمر بخيت.
· وقبلهم سجلوا كلتشي.
· وريتشارد.
· وهيثم طمبل.
· بسجلوا من (ارشيف) الهلال.
· الهلال الحركات دي ما عندو.
· تتخيلوا نحن بنعيد في (الاهلة) السابقة بمنتهى الامانة.
· وبدون ما يكون عندنا قصد.
· يعني القاعد بحضر لمباراة للهلال الآن بفتكر نفسو بحضر في مباراة للهلال في التسعينات.
· او في بداية الالفينات.
· الهلال فيه بشه الكبير – وبشه الصغير.
· بشه تو.
· في داعي لتلتلة دي.
· ناس المريخ ديل (بشه) واحد بجهجهم.
· بشه واحد ..بفرقهم ليك على الاندية.
· نجم الدين عبدالـلـه في الخرطوم الوطني.
· موسى الزومة الاهلي الخرطوم.
· اكرم الهادي سليم الاهلي الخرطوم.
· سفاري الاهلي شندي.
· رمزي صالح رجع اهلو.
· عصام الحضري رجع مصر بي (حوض السباحة) بتاعو.
· التفرقة دي كلها عملها (بشه).
· تتخيلوا بعد (التلاتل) دي…المريخاب ظهر ليهم (بشه) تاني.
· غير (بشه) الكبير.
· اها يا جماعة …في ذمتكم الجماعة ديل بقدروا على (البشبشة) دي.
· خلوه بشه.
· الهلال ظهر فيه (ثعلب) تاني.
· الثعلب الكبير هاجر امريكا.
· ظهر لينا صهيب (الثعلب).
· دا شغل (عولمة).
· برمجة عالية.
· وتطبيقا لنظام الحاسوب الآلي.
· الهلال كان فيه خالد (الصيني).
· هسع جاء عماد (الصيني).
· دا غير الشركة الصينية الشغالة في (الجوهرة الزرقاء).
· فات سادومبا.
· ظهر سادومبا في فريق الشباب.
· يا جماعة – الكلام دا جماعتنا ديل ما بقدروا عليه.
· ولا بستوعبوه لينا.
· رحل والي الدين محمد عبدالـلـه …جاء (عمر الكسمبر).
· نسخة تانية من (الوالي).
· الوالي حقنا.
· الوالي الاصلي – ما تلخبطوا لينا (الولاة) ساكت.
· نحن ذاتو ما عندنا (والي) بيستقيل.
· الشيء الغريب …هلال 2015 ظهر فيه (الشعلة).
· تاني جبنا لينا (شعلة).
· بعد الفنان انور الشعلة – ظهر الفنان وليد الشعلة.
· يعني الزول القاعد بحضر ليه في مباراة للهلال الليلة …بقول بحضر في مباراة قديمة.
· نحن بنعيد التاريخ باجيال جديدة وبمواهب صغيرة بتشيل نفس الجينات.
· ناس المريخ ما مواكبين.
· ما قادرين يدخلوا في المرحلة.
· بمشوا بعد العمر دا يجيبوا المعز محجوب.
· وعمر بخيت.
· ما في اي ابتكار.
· ما في اي فكرة.
· فات المهندس محمد موسي ..هل ظهر مهندس جديد في المريخ؟.
· في سفاري تاني.
· في بريمة.
· ما في.
· ديل بعيدوا في لاعبين الهلال – عشان عارفين نفسهم ما عندهم تاريخ.
· ولا عندهم لاعب ممكن يخلدوه زي ما بعمل الهلال الآن.
· الهلال هسع قالوا ظهرت فيه (رسالة) جديدة.
· تقنية حديثة.
· وليد الشعلة – امس قالوا جاب ليه قون في (الملعب التونسي) …خلى ليك (الملعب التونسي) زي (الملعب المالي).
· ما فاهمين اي حاجة.
· قالوا ليك وقت وليد الشعلة جاب قونو ..ناس الملعب التونسي كلهم قالوا (مين طفأ النور؟).
· بقوا يشوفوا (طشاش) – طشاش.
· المباراة كانت عصر ..هم فاكرنها (ليلية).
· الشمس في نص السماء – وهم بقولوا في (مين طفأ النور؟).
· نور شنو؟.
· انتوا ما نصيحين.
· وليد الشعلة دا طبعا من دخل كشوفات الهلال …ناس الاتحاد حاولوا يعرقلوا الموضوع.
· قالوا وليد الشعلة ما بتسجل.
· خايفين على جمال الوالي – يقوم تاني يصوم ليه تلاتة ايام.
· جمال الوالي صام ليه تلاتة ايام في تسجيل نزار حامد الصاقعة في الهلال.
· واكيد يكون صام ليه تلاتة تانية بعد تسجيل وليد الشعلة في الهلال.
· الشيء الما عاوزين لينا فيه غلاط.
· ولا فاضيين للكلام دا.
· ناس المريخ ما يطلعوا ويقولوا ليكم الملعب التونسي كان لاعب بالرديف.
· ناس بشه الصغير واطهر الطاهر ومعتصم والصيني والثعلب ويونس الطيب بلعبوا في (ريال مدريد)؟.
· ديل برضوا بيلعبوا في (الرديف).
· ما تقعدوا تشرعوا فينا ساكت.
· ………..
· ملحوظة : في ريحة سمك …الواحد اصلو ما يجيب ليه سيرة للسمك في العمود – ريحتو تضرب.
هوامش
· مية مرة يقولوا ليكم.
· الهلال غير قابل للهزيمة.
· لا ودي.
· لا رسمي.
· ما عندنا خسارة.
· نشوف جماعتنا يوم الخميس.
· جمال سالم الى الآن في الخرطوم.
· بعمل في شنو؟.
· بعد كدا لو عاوز يسافر تونس ..كلموه يشيل معاه (كاميرا).
· السياحة حلوة.
· معسكر في تونس.
· زي (كشف البكا).
· واحد – واحد.
· وليد الشعلة حاضر الهلال.
· عمر الكسمبر مستقبل الهلال.
· لو بقى ما في ادارية فنية فاهمة ..وقادرة على استوعاب مواهب الهلال في كل قطاعاته – المواهب دي بتروح ساكت.
· الحمدلله ان قطاع الشباب يقف عليه فوزي المرضي.
· ما بتجيكم عوجة.
· ………….
· عاجل : البلد مشتاقة للهلال.

تعليقات الفيسبوك

تعليقات

الرد

لن يتم نشر عنوان بريدك الإلكتروني. الحقول الإلزامية مشار إليها بـ *