محمد عبد الماجد : ما فضل ليهم إلّا يشيلوا السر قدور من (أغاني وأغاني)

برشلونة دي زي الزول العاوز منك قروش – يلاقيك في أي حتة بشيل منك حاجة
زي (ايلا) السر أحمد قدور دا على الأقل كانوا يشيلوه من (أغاني وأغاني) ويودوه (مطر الألوان) لحسين خوجلي
ود الشريف اعترف بصحة الأهداف الأربعة وبضربة جزاء الهلال وطرد ثلاثة لاعبين من شباب المريخ
انتظروا (مشاطيب) رديف الهلال وشبابه عشان تصلحوا فرقكم زي ما بتعملوا في الفريق الأول
· عمك قاعد – متل باقى الكلام.
· ما عاجباهو أي حاجة.
· أي شيء يجيبوه ليه – يعلق ليك عليها.
· أسهل تعليق عندو (بطيختك) دي مالها مسيخة كدا؟.
· دا لو جاملك.
· قالوا ليه برشلونة فازت بي دوري أبطال أوروبا.
· قال ليهم برشلونة مسختها.
· برشلونة دي زي الزول العاوز منك قروش – يلاقيك في أي حتة بشيل منك حاجة.
· ولو ما عندك ليه شيء – بتخلي ليه الشارع.
· عمك ..منشرح في التعليقات كدا.
· قالوا ليه التشكيل الحكومي ظهر.
· قال ليهم الحصل شنو؟.
· قالوا ليه : عبدالرحمن الخضر شالوه.
· وعلي كرتي شالوه.
· مصطفى عثمان إسماعيل شالوه.
· ودوسة شالوه.
· وكبر ذاتو شالوه.
· طبعاً نحن بنقدر نتكلم فقط عن الناس الشالوهم بس.
· عمك بقولوا ليه في الكلام دا …ناس قناة النيل الأزرق كان بستعرضوا في برنامج (أغاني وأغاني).
· زولك شاف (السر أحمد قدور) في الاستعراض.
· قال ليهم عمكم دا ما شالوه – البرنامج دا ليه عشر سنوات.
· قدور ليه ما شالو؟.
· ما قالوا في تجديد.
· في اللحظة دي واحد قال لي عمك …محمد طاهر ايلا شالوه من الجزيرة ودوه الجزيرة.
· هنا عمك اتعدل ..وقال ليهم السر أحمد قدور دا على الأقل كانوا يشيلوه من (أغاني وأغاني) ويودوه (مطر الألوان) لحسين خوجلي.
· لازم يكون في تجديد.
· بدل (التورتة) البعملوا لينا فيها دي.
· السر أحمد قدور (وزير) الأغنية السودانية.
· هو برضو وزير.
· وزير لكن بضحك.
· بعرف يضحك.
· المريخاب ديل حيرونا.
· بعملوا ليهم في (جرسة) ما بتتناسب مع عمرهم.
· جرسة بتاعة (رديف).
· ما جرسة فريق كبير أصلو.
· فريقهم ما جاهز للممتاز ..قالوا أجلوا لينا الممتاز.
· عشان نعسكر زي الهلال.
· ونلعب مباريات متلو.
· ما عندهم (رديف)…الاتحاد العام لغى دوري الرديف – وما عمل برمجة للمنافسة رسمية.
· عملوا دورة تنشيطية ..رديف المريخ في التنشيطي ما قاعد يجي.
· في فوضى أكتر من كدا.
· الأولاد الصغار ديل بتعلموا فيهم في (فوضى) عجيبة.
· عشان كدا فريق الشباب بتاع المريخ بقى يضارب.
· زي الكبار.
· ومباراة للمريخ في الشباب بقت ما بتكتمل.
· استوقفني أمس ما كتبه الأستاذ ود الشريف ..وهو مريخي أكتر من أي واحد في المريخاب ديل.
· ود الشريف متابع للأنشطة وبكتب من داخل الملعب.
· شوفوا ود الشريف كتب شنو؟..عشان تتأكدوا أن أقلام المريخ بتخادع في جماهير المريخ وبترهب في الاتحاد وقد شهد شاهد من أهلهم.
· ود الشريف شهد بالحقيقة وكتب في (ألوان) أمس :
· (حرصت كل الحرص على مشاهدة مباراة المريخ والهلال في دوري الشباب التى جرت عصر أمس الأول بدار الرياضة لأقف على مستوى فريق المريخ وبدأت المباراة قوية ومثيرة وتقدم المريخ بهدف جاء من ضربة ثابتة وأدرك الهلال التعادل من ضربة رأسية قبل نهاية الشوط الأول وفي بداية الشوط الثاني أحرز الهلال الهدف الثاني من ركلة جزاء تسبب فيها المساك الشمالي للمريخ بفشله في إيقاف مهاجم الهلال وبعدها بدقائق استلم أحد مهاجمي الهلال الكرة من وسط الملعب ورواغ ثلاثة من مدافعي المريخ ووضع الكرة بهدوء شمال الحارس وقبل ذلك قام الحكم بطرد لاعب من المريخ ولاعب من الهلال وطرد لاعب ثاني من المريخ بعد إحراز الهلال الهدف الثاني وكذلك طرد الحكم مدرب المريخ عاطف منصور ورفض الخروج من الملعب وتدخلت الشرطة وأبعدته وقبل دقيقتين من نهاية اللقاء قام الحكم بطرد لاعب ثالث من المريخ استخدم يده في إبعاد الكرة وكان منذراً بالكرت الأصفر وعند هذه اللحظة اقتحم الأخ صلاح بجبج عضو الجهاز الإداري بالمريخ وكاد أن يشتبك مع الحكم وتبعه عدد من مشجعي المريخ وبالمقابل اقتحمت أعداد من جماهير الهلال من الناحية الشمالية وجالت القصة واختلط الحابل بالنابل ودارت معركة استخدمت فيها كل أنواع الأسلحة الخفيفة من عصى وسيخ وأحزمة وسياط وأيضاً حجارة وأصيب البعض إصابات خفيفة ودافع الحكم عن نفسه بقوة وبسالة وانتهت المهزلة بتدخل الشرطة ورددت جماهير الهلال بعض الهتافات المعادية للمريخ).
· هذه شهادة ود الشريف واضحة.
· يضيف ود الشريف : (هذه هى الحقائق مجردة عما حدث في مباراة شباب المريخ والهلال وحقيقة تحسرت على المستوى الهزيل والضعيف لشباب المريخ والمريخ أظهر مستوى متواضعاً للغاية ولا يوجد لاعب واحد يلفت النظر في الخطوط الثلاثة).
· براكم بتقولوا كدا مستوى هزيل وضعيف ومتواضع للغاية ولا يوجد لاعب واحد يلفت النظر في شباب المريخ.
· كلهم موسى الزومة.
· كلنا موسى الزومة.
· انتظروا (مشاطيب) رديف الهلال وشبابه عشان تصلحوا فرقكم زي ما بتعملوا في الفريق الأول.
· ويؤكد ود الشريف في عموده : ( حكم المباراة لم يكن سيئاً والأهداف الأربعة في المباراة صحيحة وركلة الجزاء التى احتسبت للهلال صحيحة واللاعبون الأربعة الذين تم طردهم من الفريقين يستحقوا الطرد ونأخذ على الحكم عدم احتسابه ضربة جزاء للمريخ).
· نتفق مع ود الشريف في كلامو كلو عدا في (ضربة جزاء لم تحتسب للمريخ) خلاص عاوز تعمل لينا حركات مأمون أبو شيبة يا ود الشريف.
· ما كتبه ود الشريف يثبت أن ردود فعل المريخ في الملعب وفي الصحف ردود كاذبة وانفعال لا مبرر له …وقد انتقل سلوك الإعلام والمجلس إلى الملعب ..بل انتقل إلى المدرجات وأصبحنا نشهد عنف وانفلات وثورة في كل مباريات المريخ.
· لا ننسى ما حدث في مباراة المريخ ومريخ الفاشر والتى أخرج فيها اتحاد الكرة بياناً مشتركاً مع الشرطة – بعد أن تم إخراج الشرطة من الملعب.
· نذكر أن اللاعب الذي راوغ مساك المريخ وعمل معه ضربة جزاء هو عمر الكسمبر.
· واللاعب الذي قال عنه ود الشريف أنه مسك الكورة من منتصف الملعب وراوغ ثلاثة لاعبين ووضع الكورة بهدوء شمال الحارس هو أيضاً عمر الكسمبر.
· عاوزين ليكم (27) سنة يا مريخاب عشان تسجلوا (عمر الكسمبر) دا.
· اقعدوا أحسبوا من الآن يا مزمل أبو القاسم.
· السنين هسع بتجري.
· والزمن ماشي.
· الشيء الغريب أن الاتحاد العام لكرة القدم السوداني بقى بكل قوة عين و (بجاحة) كمان بنوب عن المريخ.
· ناس أسامة عطا المنان (الما بخجلوا ديل) بقوا يقوموا ما يفترض أن يقوم به صديق علي صالح ومصطفى توفيق.
· هو وين الاسم دا.
· أسامة عطا المنان واتحاده اختار أن يمثل المريخ في قضية الهلال مع بكري لوزان.
· وقد جاء في الأيام السابقة أن وكيل المريخ وممثله في لوزان هو أسامة عطا المنان.
· الجماعة نكروا.
· الشينة منكورة.
· الشيء الذي لا يمكن انكاره هو أن الاتحاد العام بي ناس أسامة عطا المنان ديل مثل المريخ وأناب عنه أيضاً في قضية مباراة المريخ والأمل عطبرة عندما قررت لجنة الاستئنافات إعادة المباراة.
· عارفين الاتحاد العام عمل شنو؟.
· الاتحاد العام خاطب لجنة الاستئنافات وطالبها بفحص القرار ومراجعته ..وهذا أمر يفترض أن يقوم به المريخ وليس الاتحاد وقد ردت لجنة الاستئنافات بهذا.
· في (فضائح) أكتر من دي.
· …………………
· ملحوظة : صغاركم اتعلموا الخروج عن النص.
هوامش
· بالمناسبة ود الشريف كتب أيضاً عن الإعادة قائلاً : (مباراة المريخ والأمل معادة معادة بأمر لجنة الاستئنافات العليا وكل ما يحدث مجرد تسويف ومضيعة للوقت).
· انتوا (العقلانية) البكتب بيها ود الشريف الأيامات دي طالعة من وين؟.
· عقبال لمأمون أبو شيبة.
· وليد الشعلة عاوزنو يكمل لقبو في الهلال ويصبح هدافاً للدوري الممتاز.
· أصلاً هو عندو 6 أهداف مع الأهلي الخرطوم – رغم عدم مشاركته في عدد من المباريات بسبب إصابته.
· أحلى ما في معسكر تونس عودة نيلسون.
· نيلسون أفضل محترف في السودان.
· لكن ناس جوليام واندرزينهو يكون عندهم رأي تاني.
· عودة الهلال يوم الأربعاء قرار موقف.
· ما في داعي للمعسكر في غياب لاعبي الهلال في المنتخب.
· بعدين الهلال محتاج يستقر شوية في البلد عشان مباراة الأهلي شندي في الممتاز والأمل عطبرة في كأس السودان قبل السفر للكنغو.
· الأهلي شندي بيستعد تحت تحت.
· وشادي حيلو …بعد كتابات سيلا الأخيرة.
· أقصد بعد كتابات صلاح إدريس.
· الأهلي شندي لعب أمام مريخ كوستي وانتصر عليه في كأس السودان.
· ولعب عدداً من المباريات الودية أمام أندية الممتاز وانتصر فيها أيضاً.
· ودا كلو عشان مباراة الهلال.
· اعملوا حسابكم يا ناس الهلال.
· وفتحوا عينكم كويس.
· الأهلي شندي انتصر على الهلال الموسم الماضي في الخرطوم.
· ابقوا عارفين.
· وجمهور الهلال في الانتظار.
· عمر الكسمبر وطارق نادر منصور يجب أن يجدوا فرصة مع الفريق الكبير.
· …………..
· عاجل : وليد الشعلة شال رقم ضفر …(رقم الفانلة ما رقم التلفون).

تعليقات الفيسبوك

تعليقات

الرد

لن يتم نشر عنوان بريدك الإلكتروني. الحقول الإلزامية مشار إليها بـ *