بابكر سلك : رمضان ورمضان وجلاكسي

> أكتب قبل لقاء الزعيم بالأهلي
> أمني النفس بسهرة رائعة
> نستقبل الشهر الكريم بابتسامة النصر الكبير
> ولأن محمد عبدالماجد أشار أمس لخسارة المريخ
> حانزيد أهدافنا هدف هدية لمحمد عبدالماجد
> هديتنا ليك يا ابو حميد قون بكري بو عقرب
> ومحمد قصدو كورة قفلة المولد
> -كعادة الأهلة أتى ببعض الكتاب وزاغ من بعض
> كورة قفلة المولد يا أبو حميد
> هي المباراة التي أوقفت متواليات ماجد
> تمنية مباريات على التوالي نغلب في الزبون
> الرقم القياسي
> المهم
> أتوقع أداءً جميلاً وراقٍ
> أتوقع نصراً كبيراً قدرنا
> أتوقع ظهوراً مشرفاً لديدي
> المهم
> في رمضان لو قابلك زول طاشي شبكة
> الناس بتقول رمضان دخل عليهو
> وأستاذنا الرائع رمضان أحمد السيد
> رمضان دخل عليهو قبل يبدأ
> رمضان دخل على رمضان
> قبل يبدأ رمضان
> مانشيت جوهرة رمضان كان
> حكم الجلاكسي يدير مباراة المريخ والعلمة
> لما قريت المانشيت ده
> قلت حمادة حا يحكم الكورة
> حمادة الذي أدار مباراتنا ضد الهلال بالمجموعات
> حمادة الطرد أحمد الباشا
> حمادة المن الإستاد للمطار
> حمادة النشرنا صورو في صالة المغادر باللابتوب والجلكسي
> بي أكياسهم
> لأنو حمادة هو حكم الجلاكسي
> لكن لقيت المشار ليه تحت
> حكم تاني
> وقالوا كمان احتسب بلنتيين للمريخ مشكوكات فيهن
> معقولة يا رمضان؟!
> هضربة قبال رمضان
> بلنتيين عاملن بويا
> بلنت ينطح بلنت
> تقول لي مشكوكات
> أمال بلنت الأمل أول أمس موثوق فيهو؟؟؟
> بلنت النسور الما اتحسب في الشوط الأول موثوق منه
> بلنت النسور الما اتحسب في الشوط التاني مشكوك فيهو؟؟؟
> بلنت كوفي الاتأكلنا فيهو على عينك يا تاجر
> موثوق منو ولا مشكوك فيهو؟؟؟
> عزيزي رمضان
> رمضان كريم
> ولو نسيت حمادة جلكسي
> الصور طرفنا في أرشيف الزعيم
> ممكن نعيد نشرها تاني
> عشان الناس ما تلخبط ساااااي
> وصديقي محمد عبدالماجد يسأل
> برازيلي وليد ولا جوليام
> برازيلي القاعد بره بإصابة مدهشة داك يا حمادة
> إصابة فريدة من نوعها
> اللعب ضد الأمل ده ما برازيلي
> دي مواسيري
> جوليام طلع حمام!
> أيها الناس
> رمضان شرفنا
> نتمنى أن نحسن الصيام والصلاة والقيام لنشرفه
> أن نعيد الحسابات مع النفس
> نستغفر
> نجتر الذكريات
> نعتذر لمن أصابهم منا رشاش
> نسامح من أصابنا منهم رشاش
> نبتهل لله
> أن يحفظ هذا الوطن
> يكرم هذا المواطن
> ينعم علينا جميعاً
> المهم
> جماهير المريخ أعدت العدة للمجموعات
> بروفات التشجيع متواصلة
> والدفزف جااااهزة في الرفوف
> وريحة المطار فايحة
> يا ربي في رمضان ده برضو الريحة طير طير؟؟؟
> طير طير مع السخانة دي ما بتفطر دحين؟؟؟؟
> المهم
> يا حليل رمضان
> ما فضل فيهو شيء
> الخميس دور الليلة خليهو
> الخميس البعدو ما تعدو
> الخميس الوراهو طوالي ليهو واحد وعشرين يوم
> فضل فيهو شنو يا حليلو
> شهر الصيام اوحشتنا
> أيها الناس
> الشفع الماعليهم صيام
> نستغل الفرصة ونعلمهم
> البصوم لي إطناشر مكسب
> بكرة يصوم لي اتنين
> والبصوم للعصر مكسب
> نقول ليهو (ري تراي )
> أكيد بتم اليوم البعدو
> اذا غلبو
> تاني ري تراي
> يمسك في ري تراي دي
> لمن يظبط معاهو
> وكت ما حانورثهم حاجة في الدنيا دي
> حقو نجهزهم للآخرة
> ما ممكن يطلعوا كيت هنا وهناك
> المهم
> مكسيم مصر شديد
> البرة الخط برة العقد
> أول أمس قون عطبرة برة الخط برضو
> لكن المشكلة
> قالوا ناس مازيمبي في رمضان بشوتو من برة الخط كتير
> خطتهم كده
> في الكنغو لعبوا جمعة
> مع البرة الخط الكتار ديل
> مكسيم بلحقهكم أمات طه
> المهم
> عندنا صاحبنا إيهاب بر الله يطراهو بالخير
> بخاف من الصيام شديد
> كنا شلة كبيرة
> الضهر بنمشي البحر
> وكلو يوم بنفطر في بيت زول
> يوم كان الفطور في بيت صديقنا طارق مهدي
> اليوم مسخن شديد
> غاطسين في الموية من اطناشر لي ستة
> ستة القديمة ديك
> التقيلة وسمحة
> ما زي ستة الزمن ده
> المهم
> المغرب ستة وربع
> جرينا جري على بيت ناس طارق
> لما وصلنا لقينا الكهرباء قاطعة
> والمويات بالهبل
> والصواني تتطاقش
> وراديو مافي
> أذن ولا ما أذن؟
> مافي زول عارف
> بر رفع الجك وقال أذن وشرب
> بعد خمسة دقائق سمعنا صوت أذان بعييييييد
> بر قال ماقلت ليكم أذن
> وشرب تاني معانا
> أيها الناس
> «إن تنصروا الله ينصركم»
> آها
> نجي لي شمارات والي الخرتوم
> كان شفت يا والينا
> رمضان جانا ورضينا
> بي كهربتكم دي يا والينا
> بنمشي البحر جبرينا
> نحمد الله كان منو جينا
> وكان ما جينا
> شكينا ناس الكهربا لي الله يا والينا
> وناس الكهربا ما تشكونا بقولوا لينا
> عينكم للفيل ترفعوا أكفكم علينا؟؟؟
سلك كهربا
ننساك كيف وعيننا للفيل نشكي في ناس الترحيل
والي لقاء
سلك

تعليقات الفيسبوك

تعليقات

مقالات ذات صله

الرد

لن يتم نشر عنوان بريدك الإلكتروني. الحقول الإلزامية مشار إليها بـ *