احمد دندش : طه والفحيل…(اللبس دا بتجيبوهو من وين).؟

*من غرائب البرامج التلفزيونية الغنائية في السودان ان الفنانين يجبرونك على ترك (مضمون العمل) والتركيز في مضمون (مايرتدون).!
*اي والله.
*يعني مثلاً (اللبسة) بتاعت طه سليمان الظهر بيها في اول حلقة من (اغاني واغاني).!
*(اللبسة) دي لامعروفة بلبسوها ولا (بتلبسك) براها.!
*اما ود الفحيل…فدا (كوم براهو).!
*يافحيل…(اللون) دا جبتو من وين..؟
*ياخي دا (لون) عجيب…وحير العدو والحبيب.!
*في ناس بيقولوا الفنانين ديل بيسافروا بلاد (الفرنجة) عديل كدا عشان يشتروا ملابس (اغاني واغاني).
*المزعلني ماسفر الفنانين عشان يشتروا (الهدوم) دي.
*المزعلني انهم مالقوا غير (الهدوم) دي..؟
*الشكية لي الله والرسول غير (الاشكال) و(الالوان) دي مافي تاني..؟
*معقولة اسواق بلاد (الفرنجة) مافيها (ذوق) للدرجة دي..؟
*غايتو انا ماعارف…بس لو كانوا سألتوني قبل ماتسافروا كان وصفت ليكم (سوق امدرمان).
*اي والله…بالحالة الشفتها دي…(سوق امدرمان) البضاعة الفيهو ماسائلة في (اجعص) بضاعة في اسواق (الخواجات).
*يعني قاطعين تذاكر…ودافعين مصاريف اقامة…واكل…وشراب…ومرافقين…ورسوم (كرت حمى صفراء) ورسوم مغادرة…(عشان تجيبوا الهدوم دي)..؟
*غايتو انا ماعارف…لكن لو كنت في (الجمارك) علي الطلاق (الهدوم) دي مابخليها تدخل البلد.
*دي (هدوم) بتجيب (الهموم).!

شربكة:
*الظريف في الموضوع انو الفنانين ديل لما يلبسوا (الحاجات الغريبة دي) بفتكروا انهم (استايل)، وهم ماعارفين (الاستايل) بي جنبة، وهم بـ(الجنبة التانية).

شربكة ونص:
*غايتو الاستايل…عامل (عمايل).!

شربكة ونص وخمسة:
برضو مافي زول قال لي (اللون) الكان لابسو شريف الفحيل دا اسمو شنوووووو..؟

تعليقات الفيسبوك

تعليقات

مقالات ذات صله

الرد

لن يتم نشر عنوان بريدك الإلكتروني. الحقول الإلزامية مشار إليها بـ *