بابكر سلك : شامي لي ريحة أرباب

> كالعادة اكتب قبل مباراة ابو الهل واهلي الارباب
> لان الانتباهة التي توزع اكتر من مية الف نسخه
> لازم تمشي المطبعه بدري
> المهم
> شامي لي ريحه الليله
> ريحة ارباب ارباب
> وعصيده وسيدا
> بس نتمني ان يكون التحكيم في رمضان ده اكتر دقه وحياديه
> يعطي لكل ذي حق حقه
> لا يخطئ ببشاعة كي لا يظلم
> الظلم ظلمات وفي رمضان بالذات
> وواهم من يعتقد ان رمضان بالنهار بس
> رمضان بالليل برضو
> وربنا يتقبل منا ومنكم ومن الحكام صالح الاعمال
> المهم
> ريحة الارباب وارده
> وعصيدة سيدا وارده
> وعماري لو كب التقليه
> يبقي الاذان اذن
> الله اكبر
> ايها الناس
> في كوستي
> برغم اي شيء لا خوف علينا
> ولن نحزن ان شاء الله
> فغرزه الذي جندل الترجي بسوسه
> لا اظن ان كوستي ستصعب عليه
> وديديه
> وبكري بو عقرب لازم يتشقلب
> بس الباب البجيب الريح لازم نسدوا عشان نستريح
> والمجموعات قربت
> الوضع لا يتحمل اي انكسار ينقص من حماسة الشفوت
> الجماهير جاهزه
> يبقى نخليهم استاند باي
> المهم
> قال الاهله انهم حايشركوا جدو
> جدو البرازيلي الاسمو جونيور
> جونيور بالبرازيلي يعني جدو بالسوداني
> مكتوب كده في السيستم
> والراجل ما كضب
> جاب معاهو لما جا بتو وولدها
> وطبعا اصابتو من نوع فريد
> عشان كده لا اتوقع ان يقعد في الملعب كتير
> جريه من عماري
> وعفصه من مالك
> ببقي مارق
> ايها الناس
> في رمضان الكضب حرام والقبر قدام
> والتحايل على الواقع ببقى كضب
> ولي عنق الحقيقه ببقى كضب
> والاتيان بالاعذار الواهيه كضب
> وايجاد مبررات للمواسير ببقى كضب
> سامعني يا رمضان
> اقصد سامعني في رمضان؟
> المهم
> استاد المريخ يحتاج لاعادة نظر يا دحيه
> مشكلة في الاضاءه والنجيل
> مشكله في السياج والمدرجات
> والكلام ده ما بشبه المريخ يا دحيه
> ونحنا ما بنعرف مسؤول عن الاستاد غيرك
> ان كانت هناك لجنه
> ده كلام بتعرفوهوا براكم
> لكن نحنا ما بنغفر لي اي زول لو يوم العلمه الاستاد ما كان بفصم
> الصبغه لأ يا دحيه
> خلي النجيله علي اصلها
> الورنيش لأ يا دحيه
> لان الكريمات لا تصنع للبنت جمالاً
> اول مطره وبتظهر علي حقيقتها
> عشان كده
> ابعدنا من الهجمه والرجمه والجيران انخلعوا
> الجيران اصلهم مخلوعين
> لكن ركز لينا علي جمالنا
> جمال استادنا وسيرتنا وسريرتنا
> ايها الناس
> جوليام حمام
> اخير منو الجزولي
> والشعله المسكين حايكون كبش الفداء ليثبت جوليام
> جوليام الماسوره
> وفارس حايثبت الكلام ده
المهم
> نتوقع شراسه من رابطة كوستي
> فأنا لا انسى لها يوم مباراتها ضد مريخ كوستي
> كان هناك طفل يلبس زي الهلال ويحمل علم الهلال ويجلس على دكة البدلاء
> حيرتونا يا ناس كوستي
> عملتوها ظاهره
> لكن المحرش ما بكاتل
> ايها الناس
> ان تنصروا الله ينصركم
> اها
> نجي لي شمارات والي الخرتوم
> كان شفت يا والينا
> بعد التراويح اتلمينا
> في الحله ما جمب البحر يا والينا
> ودار الحديث حول البحصل لينا
> ودلفنا للبحصل فينا
> ودخلنا في اشياء دفينه
> ناقشنا السحنه الفي وشوشنا حزينه
> وتوصلنا ووصلنا لاسباب الحاله الفينا
> ولقينا
> انو الموت هو الوحيد الشايف شغلو صاح في البلد دينا يا والينا
سلك كهربا
ننساك كيف ولو اشتغلنا زي الموت كان عشنا صاح
والي لقاء
سلك

تعليقات الفيسبوك

تعليقات

الرد

لن يتم نشر عنوان بريدك الإلكتروني. الحقول الإلزامية مشار إليها بـ *