د.عادل الصادق المكي : فضائياتنا..القحة ولا صمة الخشم

قنواتنا الفضائية مع الكمية الهايلة من الفضائيات.. زي الطالب الما حافظ النشيد.. والطلبة بيقولوهو جماعي.. وهو يفتح خشمو ويقفلو معاهم كأنو حافض وهو يكون ما حافض التكتح.. وشغالة “قنواتنا” شغالة بمثل القحة ولا صمة الخشم.. لكن صمة الخشم أخير من قحتهم.. حتى القحة دي شترا.. تسألهم يقولو ليك والله عندنا مشكلة انتاج وتمويل.. طيب يا اخي قفلو.. لحدي ما ربنا يفتح عليكم,,,, لكن في البشوف فيهو دا.. والفهم الماشين بيهو دا إن ملو ليكم القنوات دي قروش لمن دفقت ما عندكم شي.. كيسكم فااااااضي..!!!!. أتمنى أنكم تتفرجو في باقي قنوات خلق الله وتتعلمو.. وخلو المكابرة.. متكلين على عدم القروش ويجيبو في حاجات والله أخير منها يقفلو وكل زول يشيل أهلو.. ولي حسي ولي باكر لو دا حالكم بقول لملموها في قناة واحدة وريحونا وارتاحو انتو..

بعضها بقى يقابض من السهلة.. البيلقوهو قدامهم “يازول بتعرف تغني؟” يرد (لا..علا بعرف أشعر.. بقول شعر.. أسمعكم) يردو عليهو متفنجرين “لا يا أخي مصدقنك”.. ويقودوهو ويدخلوهو الاستوديو يلا يا زول طلع زيت الناس الفاتحين خشومهم ويعاينو ليك ديل.. (أأأأأأح القصيدة بتقول:-

في دعاش الهوى والسماء المقدود

إنتي عريشة..

بتنفسك عبير بلا دخان.. ومرات مرات بتنفسك شيشة

حلبة هوانا

أخ يا هوانا.. ثم أخ يا هوانا

حلبة هوانا أب نوبة درويش أنا وأنتي درويشة

يا درويشة

وأنتي جنبي أعيش الفرح المفرهد

وأفطس أكنكش ميت.. لما تكوني مافيشة

والله لا جاب يوم شكرك..)

الله جاب يوم شكرها؟.. اطمن تب.. يوم شكرنا نحن قبالها..!!!.

بعد هذه القصيدة العصماء.. يكون مقدم البرنامج مشغول بالتلفون في أثناء إلقائها وما سمع غير البيت الأول وفجأة يدخل “يا سلااام يا أستاذ.. إنها كلمات تسربت إلى دواخلنا فمست شغاف القلب.. وضمختنا حنين وتحنان وحنان.. وبلوبلو).. هذا عن عكاظ الفضائيات.. أما الغنا داك.. مخير الله.. أي زول أي زول يخطر ببال القارئ الكريم ممكن يجي أي قناة ويغني.. طالما هو بيغني مجاني وبي ساكت.. ولو ربنا داير يشقيها على غنية ربنا يهديهم عليها ويتلحوها.. خلال رمضان غنية “كم نظرنا هلال ما شاقنا غير هلالو”.. والله ما طالبني حليفة سمعتها أكتر من خمس مرات من خمسة غنايين مختلفين وفي قنوات مختلفة.. كل واحد يعوس فيها بطريقتو..

أما مقلدي الفنانين.. عاصرين علي ترباس الله يعظم أجرو.. وترباس أصل غير قابل للتقليد أو الاستنساخ.. ترباس حالة فريدة.. لن تتكرر.. أحدهم من “الترابسة” شفتو في قناة.. لابس عمة كبيرة جدا.. حضرت فاصل.. طول الفاصل وأنا مشغول ومهموم يا ربي الزول دا وشيهو وين؟.. الزول دا نسى يلبس وشيهو وهو جاي؟.. أخيرا لقيت الوشي.. الحمد لله هم ونزل.. وما عرفتو كان بيغني في شنو؟.. لكن شكرت الله أني طلعت من الفاصل بي وشي..!!!!!!!.

يا جماعة إنتو جاديييييين في البتسو فيهو في الفضائيات دي؟.

تعليقات الفيسبوك

تعليقات

الرد

لن يتم نشر عنوان بريدك الإلكتروني. الحقول الإلزامية مشار إليها بـ *