احمد دندش : حلقة الكابلي كانت ناقصة (رامز جلال)!

احمد دندش : حلقة الكابلي كانت ناقصة (رامز جلال)!

*إنتو جادين يا جماعة في حلقة (أغاني وأغاني) بتاعت أول أمبارح دي؟
*دايرين تغنوا أغنيات الكابلي؟
*طيب إنتو عارفين إنو أغنيات الكابلي دي أصلو ما في زول قرب منها قبل كدا ولا ما عارفين؟
*طيب ما سألتو روحكم ليه ما في زول قرب منها؟
*إنتو جادين إنو الأغاني الغنيتوها أول أمبارح دي أغاني الكابلي؟
*معقولة دي أغنية (ضنين الوعد) يا طه سليمان؟
*معقولة دي أغنية (حنانك يا حالم) يا إنصاف فتحي؟
*يا مصطفي السني.. بصراحة أنا ما قدرت أقول ليك معقولة زي أخوانك الفوق ديل لأني أصلاً ما فهمتك بتغني في ياتو أغنية!
*غايتو حسين الصادق (باصر) حبك للناس و(جازف) ومرق منها.
*لكن برضو دي ما أغنيات الكابلي.
*يا ربي الكابلي بيكون حضر الحلقة دي؟
*إن شاء الله ما يكون حضرها.. قولوا آمين.
* السر قدور ذاااااتو كان الندم باين في وشو على إنو خصص الحلقة دي لأغنيات الكابلي.
*ما كان قايل الموضوع دا ببقى كدا!
*الراجل واثق من جماعتو.. بس جماعتو طلعوا (قاعدين في السهلة)!
*إنتو عارفين، حلقة الكابلي بتاعت أمس دي كانت ناقصة شنو؟
*والله كانت ناقصة (رامز جلال)!
*كنا محتاجين لي رامز عشان (يخلعنا) ويطير مننا (الذهول) الكنا عايشين فيهو دا.
*حلقة الكابلي كشفت المستور.. والمشاهد لحدي هسي (مذهول)!
*غايتو الدخلتوها في أغنيات الكابلي يمرقها رب العالمين!
شربكة:
*أنا البحيروني بالجد الناس البتشكر في (أغاني وأغاني) ديل؟.. يا ربي مالهم؟.. معقولة بس يكونوا مقتنعين بالنسخة الحالية دي؟.. ولا جايين (يطروا القعدة) وخلاص؟
شربكة ونص:
*يا ناس (أغاني وأغاني).. والله ما قاصدكم.. لكن بالبتعملوا فيهو دا يوم بتكتلوا ليكم زول!
شربكة ونص وخمسة:
*هو في تاني شربكة أكتر من الحصلت دي؟
ملحوظة:
*مفروض الليلة كنت أكتب ليكم عن (فرفور) بس الله يجازي الكان السبب.. غايتو بجيكم راجع تاني لموضوع (فرفور) دا.

تعليقات الفيسبوك

تعليقات

مقالات ذات صله

الرد

لن يتم نشر عنوان بريدك الإلكتروني. الحقول الإلزامية مشار إليها بـ *