محمد عبد الماجد : مازيمبي بقى يفكر في (سيكافا)

في الإعلان …الراجل ينوم ..ويشخر ..ويخش في أحلام سعيدة ..تدخل عليه زوجته وتقول ليه : (نمت؟؟)
اي زول عارف دا العريس ودي العروسة ..(واضحة ما عاوزة ليها استاذ جغرافيا)
· الممثل المصري (عمرو عبدالجليل) في موسم رمضان هذا يقدم اعلان عن شاي (العروسة) يملأ الفضائيات المصرية.
· الاعلان بغض النظر عن السلعة التى يروج لها – فيه فكرة وطرفة ..وهو اعلان يمكن ان تستمتع به (لو الكهرباء ما قطعت).
· الاعلان يدور حول (الاسئلة) التى تأتي في شكل (اجوبة).
· وهذا امر المصريون يحسبه عندهم براهم …نحن برضو عندنا مثل هذه الاسئلة.
· الاعلان يأتي على هذه الشاكلة ..الراجل يجي من برة في سخانة مبالغ فيها …(المرا) تقابلو في خشم الباب وتقول ليه : (انت جيت؟؟).
· وعمرو عبدالجليل يعلق في الاعلان ونعلق نحن : (أُمال القدامك دا وزير الثروة الحيوانية).
· طبعا انتوا ح تخلوا اي حاجة.
· وح تقعدوا تقولوا لي اشمعنا (وزير الثروة الحيوانية).
· وتفكيركم ح يمشي لي بعيد ..(في السخانة دي).
· وفي الاعلان …الراجل ينوم ..ويشخر ..ويخش في احلام سعيدة ..تدخل عليه زوجته وتقول ليه : (نمت؟؟).
· أُمال بجسد دور الفريق طارق في مجلس المريخ.
· نايم على طول.
· قالوا ان الممثل المصري محمود المليجي مات بطريقة غريبة ..اذا كان المليجي يشارك في احد الافلام السينمائية عندما رحل من هذه الدنيا.
· مات في الاستديوهات.
· في فترة الراحة …جلس محمود المليجي على سجادة وقال انه يريد ان يمثل شخصية زول بموت.
· رقد المليجي ثم (شخر)…شخرة حقيقية.
· ظنه زملاؤه في الفيلم ان المليجي بمثل في الدور الذي اعلن عنه (بهظر يعني)..لكن كان المليجي يموت فعلا.
· هبشوه ..وجسوا نبضه فوجوده قد فارق الحياة.
· وفي الاعلان الكهربة تقطع.
· وواحد من الجماعة يسأل : (قطعت؟؟).
· أُمال كملت اللاين وعكست.
· وممكن تشرب ليك موية …واحد من ناس البيت يقول ليك (شربت؟).
· لا اتيممت.
· في السودان عندنا في عيد الضحية …تطلع الخروف برة البيت.
· وتشرّبو موية.
· وتشقلبو.
· وتكتفو.
· وتضبحو.
· زول يجيك ما في.
· وبعد ما تضبحو – تعلقو في خشم الباب.
· وتسلخو.
· وانت بتسلخ فيه كدا – يجيك واحد من ناس الحلة ..(من الجيران) ويقول ليك : (ضبحت؟؟).
· لا بنصور في فيلم عربي.
· ومن الحاجات الغيّاظة ..وما بنستحملها ..وممكن الزول يضارب فيها عديل كدا…تكون قاعد مع عروستك في الكوشة.
· انت بي بدلتك وهي بي زفافه.
· اي زول عارف دا العريس ودي العروسة ..(واضحة ما عاوزة ليها استاذ جغرافيا).
· ولا حتى استاذ بيئة.
· يجيك واحد من الاصحاب يبشر فيك ..ويقرب على (اضانك) ويقول ليك : (دي عروستك؟).
· أمال ح تكون (سيد معوض).
· ومرات تكون قاعد ليك في حفلة ..مبسوط لغاية شارع الوادي.
· ومحمد الامين بي صلعتو.
· واضحة زي تقاطع عبيد ختم مع الشرقي.
· وبدلتو السوداء نفسها.
· والكرفتة (الرمادية) ديك..
· ونضارتو ذاتها.
· وفوق دا قاعد يغني في (قلنا ما ممكن تسافر).
· ووراء محمد الامين خمسين عازف فيهم اسامة بيكلو وزرياب برعي محمد دفع الـلـه.
· وفي جماعة في الحفلة كل (10) ثواني بقوم منهم واحد وبقول بي صوت عالي : (الـلـه عليك يا ابواللمين).
· بعد دا كلو يجيك واحد ويقول ليك : (دا محمد الامين؟).
· أُمال ح يكون (كمال عمر).
· المريخاب (الحركات) دي بعملوها.
· اصلو ما بخلوها.
· تكون قاعد في الاستاد بتحضر في مباراة الهلال والمريخ ..(بشه) كالعادة كدا يجيب ليه (قون).
· موسى الزومة يمشي الاهلي الخرطوم.
· اكرم يمشي الخرطوم الوطني (قبل ما يجي الاهلي).
· وسعيد السعودي يمشي الاهلي شندي.
· وجمال الوالي يقدم تاني استقالتو.
· ومزمل ابوالقاسم يحتجب.
· وبابكر سلك يمسك (اسلام) يضربها بدون سبب.
· يطلع اكرم الهادي سليم يضربوا (اسلام).
· يسرح موسى الزومة يضربوا (اسلام).
· يغلط سعيد السعودي ويطلع الكورة من القون ..يضربوا (اسلام).
· قون بشه المعروف.
· الحاجات دي كلها مشهودة ..وعندنا ليها (فيديوهات) مسجلة.
· واحد من المريخاب القاعدين جنبك ..يتلفت عليك بعد الحاجات دي كلها ويقول ليك (قوون؟).
· امال (عالم النجوم).
· اسئلة غريبة.
· تخش مباراة للهلال ..الهلال يكون غالب فيها 6 / صفر…يلاقيك مريخابي يسألك ..يقول ليك الكورة كم؟.
· تقول ليه 6 / صفر للهلال.
· تقول ليه كدا بي كل حسن نية.
· المريخابي يقول ليك : (غلبتو؟؟؟).
· امال بعد الستة دي تفتكر حشينا لينا قمح.
· هسع لو في واحد حريف.
· لو عندو (عجلة) ساكت ..بلم ليك في ناس (مازيمبي) ديل ويقول ليهم : (طيرتوا).
· طلعتوا.
· الهلال اتعادل مع مازيمبي في حضور 50 الف مشجع ..ومع حكم (مجنون).
· ضربات الجزاء عندو زي (الجدعات).
· ما بتلفت فيها.
· خلاص انتوا طيرتوا يا ناس مازيمبي..او على الاقل كدا – ما تفكروا في (الصدارة) تاني.
· الهلال سيطر على الاوضاع تماما.
· ما في اي شاردة او واردة.
· عشان كدا ناس مازيمبي ديل مفروض هم وجماعتنا ديل …(ما عاوز اقول ليكم ناس المريخ) يستفيدوا من وقتهم.
· مفروض يبقوا خفاف.
· يبقوا حُراف.
· يشوفوا ليهم (سيكافا) مستعجلة كدا – ويقوموا ينظموها.
· ناس المريخ (طالعين).
· اقصد ناس المريخ (جاهزين)..بشاركوا معاكم في (سيكافا).
· استفيدوا من زمنكم.
· انتوا تاني ما بتاكلوا معانا عيش.
· لا بنعرف مازيمبي ولا بنعرف سموحة ولا تطواني.
· اتحرفنوا.
· اعملوا ليكم (طابق تاني).
· اتصرفوا ما تقعدوا لينا كدا.
· ان شاءالـلـه تعملوا ليكم (مؤتمر صحفي).
· شوفوا ليكم اي لاعب يقدم فيه (اعتذار).
· كلموا رئيسكم يا ناس مازيمبي…وروهو الخطة (ب).
· خلوه يزعل شوية.
· ويقفل التلفون.
· ويقدم استقالتو.
· بحنسوه.
· ما تخافوا.
· ما تشفقوا…بجيبوه راجع تاني.
· ما تشيلوا هم.
· اقول ليكم حاجة – جيبوا كاظم الساهر.
· انتوا ناس المريخ ديل ..موش مرة غشوا الناس وقالوا ح يجيبوا (كاظم الساهر).
· عاوزين تنكروا.
· قالوا ح يجيبوا كاظم الساهر عارفين جابوا منو؟.
· جابوا صلاح ولي وتموا الباقى (افراح عصام).
· بتتكلموا ساكت.
· الزول وقت يكون (طائر)..ظاهر عليه.
· بتلقاه بيفرح بالتمريرات.
· وما مصدق.
· بغالطوا الحكم في (الهدف العكسي).
· عشان كدا يا مازيمبي احسن اتخارج من بدري ..وابدأ اتصالاتك.
· ابدأ ترتيباتك من الآن.
· ونظموا سيكافا.
· ما فيها شيء.
· انتوا قايلين (سيكافا) كعبة.
· في ناس كتيرين ..سيكافا دي ماشه عليهم.
· مصيركم تنظموها تاني.
· خاصة بعد (المليار) التى دعمكم بها جهاز الامن يا ناس المريخ.
· جمال الوالي قالوا قال لي ناس ادروب (المليار) دي ما تهبشوها.
· قال ليهم ما في زول يمشي عليها.
· جمال الوالي قال ليهم (المليار) دي خلوها بعيد ..بنحتاج ليها في تنظيم (سيكافا).
· سيكافتكم طلعت.
· ملياراتكم ظهرت.
· ما عندك اي مشكلة.
· بس اتصلوا بي مازمبي ونسقوا معاه على انطلاق البطولة.
· وعليكم الـلـه المرة دي طلعوا لينا (اسامة عطا المنان) منها.
· نحن الزول دا فترنا منو.
· ما معقولة – كل ما تنظموا (سيكافا)..تجيبوا لينا اسامة عطا المنان.
· ……………….
· ملحوظة : الـلـه لا اشركنا في سيكافا.
هوامش
· في واحد قال لي العيد في الجزائر كيف؟.
· قلت ليه العيد في الجزائر 6 / صفر بس.
· عليكم الـلـه ما تنسوا شيلوا ليكم معاكم (مش).
· الظروف هناك ما معروفة.
· اعملوا احتياطاتكم.
· لقيتوا لي (العلمة) دي وقعدتوا تفرحوا بالاهداف العكسية.
· بكري المدينة كمان عاوز يتسلبط في الهدف.
· حركاتو دي من الهلال ما عاوز يخليها.
· مباراة سموحة تبقى ليها (11) يوم.
· جهزوا جمهوركم.
· طلعوا روابطكم.
· وصلحوا مدرجاتكم.
· بكرة ان شاءالـلـه ح يكون هناك ظهور خاص لـ (اندرزينهو).
· ان شاءالـلـه الجهاز الفني يعرف يستفيد من وليد الشعلة والعناصر المبعدة من مباراة مازمبي …بتكون اكثر جاهزية.
· خوفا من التعب والرهق.
· مع التشديد على اهمية المباراة ..ودخلوها بالتشكيلة الاساسية.
· نيسلون اذا عاد ..تبقى ما في اي مشكلة على الهلال.
· نيسلون عندو عدد من الحلول.
· وهناك وليد علاءالدين.
· مباراة الغد ..مباراة في غاية الاهمية للهلال.
· لذلك يجب ان يدخل الهلال المباراة بكل جد ومسؤولية.
· ……….
· عاجل : عطبرة دائما في الموعد.

تعليقات الفيسبوك

تعليقات

الرد

لن يتم نشر عنوان بريدك الإلكتروني. الحقول الإلزامية مشار إليها بـ *