بابكر سلك : قلعة كردنة

> أيها الناس
> الحرب التي يشنها الإعلام الززرق طيلة طلطاشر سنة على جيمي
> ما حرب نصاح
> وما حرب ساي
> حرب لأغراض كيدية
> وقيام الإعلام الأزرق بفتح صفحاته لمعارضي جيمي
> ما ساي
> لكن صاحب العقل بميز
> هي في حقيقتها اعتراف وقناعة من الإعلام الأزرق بقوة الرجل
> وقوة المريخ في عهد الرجل
> وامكانية تحقيق المعجزات اذا استمر الرجل
> أيها الناس
> كان الإعلام الأزرق يسخر من هتاف الجماهير الحمراء
> جمال الوالي رئيس طوالي
> والآن يكتب الإعلام الأزرق قلعة كردنة
> سمعتوا ليكم زول قال قلعة جمال ؟؟؟
> برغم الطوابق التي حسدوها وكسروها وتاني قامت
> والكشافات نور طويل وقصير
> وبرغم المقصورة
> جمال زاتو بقول القلعة الحمراء
> لأننا في المريخ لا نجعل رجل أكبر من الكيان
> ولكن في الهلال
> حفرتين لسه سيخهم ما طلع
> شبكونا ليك قلعة الكاردينال
> الفرق كبير بين الكيانات
> أيها الناس
> الليلة نجي كلنا
> لنشكر أولاد غرزة علي ما قدموه يوم العلمة
> أولاد البروف غرزة
> لنؤكد علو كعبنا
> لنؤكد صدارتنا وجدارتنا
> أيها الناس
> الممتاز والأميرة الأفريقية
> قطبان سكك حديدية
> بمشي عليها قطر واحد
> قطر أحمر يجر من خلفه العربات
> وأفريقيا نحن بطل المجموعتين
> بدون منازع ولا مشارك
> وأفريقيا نحن الآن في شارع المك نمر
> داخلين على شارع افريقيا
> شارع أفريقيا إسمو
> وإسمو برضو شارع المطار
> شارعنا وحافظنو كويس
> نجي كلنا
> لنحسب الباصات
> الجماعة ديل بغالطونا
> يوم العلمة لعبنا خمسه وتمنين باص
> قالوا ما خمسة وتمنين
> قالوا اربعة وتمنين بس
> عشان ما يغالطونا
> نجي ونحسب بالصوت العالي
> واحد، اتنين، تلاته، اربعة
> سبعين واحد وسبعين
> تمنين واحد وتمنين
> تسعين
> لما نصل تسعة وتسعين
> تاني ما نعد
> بل نهتف
> قولولو ماشاء الله
> ماشاء الله ماشاء الله
> غالاطين خلاص ناس محمد عبدالماجد ديل
> ياخ ديل كتبوا الشعب يريد إخراج الشغيل
> الليلة البكتبوهوا عن الشغيل ماعندو علاقة بي كتاباتهم السابقة
> وبكرة لما يرجع الشغيل لي ناسو
> حايرجعوا لي الشعب يريد إخراج الشغيل
> المهم
> أمل عطبره قال زعلان من التأجيل
> ورونا زعلكم ده بكرة
> مع العلم بأن موقف الأمل لا يتحمل أي خسارة
> الأمل لو نزل
> تاني الدولار ما برفعوا
> والطاهر حماد قالوا زعلان شديد
> والطاهر لما يزعل شديد
> بشوت شديد
> المهم
> دايرين نغير إسم القلعة الحمراء
> ما دايرين نسميها قلعة جمال
> حانسميها الميناء البري
> باصات قدر دا ما ميناء كيف بس ؟؟؟
> أيها الناس
> جهود الجماهير والمحبين والأنصار كبيرة
> يجب أن تستمر كذلك
> لأن ريحة المطار فاحت
> وعمت القرى والحضر
> أيها الناس
> جماهير المريخ مبدعة
> ومن ابداعاتها
> شفوت المناقل أطلقوا على الشارع بتاع جامع الفكي علي الماحي
> إسم شارع العقرب
> المناقل كلها أسي بتقول شارع العقرب
> بتاع الركشة لو ماقلت ليهو شارع العقرب ما بوصلك
> ونحنا زاتنا هنا
> سمينا شارع العرضة شارع العقرب
> وإتعقربي
> أيها الناس
> الليلة كلنا من عصراً بدري
> بس داير أذكركم
> أبو الهل لما غلب مازيمبي في الكنفغو
> مازيمبي غلب أبو الهل هنا خمسة
> مازيمبي بالكنغولي يعني عربية الجاز
> بتسخن لي قدام
> أيها الناس
> كلنا خلف الكيان
> حتى نتخطى آخر جزائري
> خلف الكيان حتي نطير مازيمبي
> خلف الكيان حتي نلقن وفاق سطيف في النهائي درساً عقربياً كبيرا
> والكأس كاسنا ونحنا أهلو ونستاهلو
> أيها الناس
> بطل المجموعتين اليوم يوعدنا بسهرة رمضانية رائعة
> ماتفوتكم
> وماتنسوا تعدوا
> لما تصلوا تسعة وتسعين
> قولولو ماشاء الله
> أيها الناس
> إن تنصروا الله ينصركم
> أها
> نجي لي شمارات والي الخرتوم
> كان شفت يا والينا
> رمضان دخل علينا
> باقيهو ده يا تأجزوا لينا
> يا تتهجدوا لينا يا والينا
سلك كهربا
ننساك كيف ورمضان دخل العضم وريحة المطار دخلت الخياشيم
وإلى لقاء
سلك

الرد

لن يتم نشر عنوان بريدك الإلكتروني. الحقول الإلزامية مشار إليها بـ *