محمد عبد الماجد : قفلنا بلف الشوق

السحابة الراحلة في (شوق دائم)..شوقها يجعلها في ذلك الترحال حتى (تهطل) فتروي شوقها او تروي ارضها
عند التجاني سعيد (الشوق) هو ما يجعلك تقوم بشيء بدون (مبرر) وبدون (زاد) فهو يقول (وزي وطن وقت اشتاق ليهو برحل ليه من غير زاد)
اسحاق الحلنقي عنده (سباق) في مضمار الشوق هذا ..فهو القايل ( لو وشوش صوت الريح في الباب يسبقنا الشوق قبل العينين)
الناس بقت تعتبر الكلام عن الحنين والشوق وكسير الضلع كلام فارغ ساكت وما في ليه معنى
عند الشاعر الراحل اسماعيل حسن حالة من حالات الشوق (البشحتف) فهو الذي وصف شوقه (توقيتا) بالسحابة الراحلة عندما قال : (اشتقت ليك شوق السحابة الراحلة).
دا شوق بجهجه الزول ساكت – لأنك انت ما قادر توصفه الوصف الدقيق.
شوق السحابة الراحلة ذاتو كيف؟.
مثلا يقول ليك والـلـه الزول دا طلع زي (النملة) القافلة على كرت كبير.
النملة القافلة على كرت كبير كيف؟.
او يقول ليك زي (الكديسة) – المتحزلقة.
الكديسة المتحزلقة كيف؟.
غايتو السودان دا فيه حاجات.
خاصة في رمضان.
بتشرعوا ليكم في (مواضيع) غريبة.
اكيد المذاهب والتفسيرات بتختلف في تفسير مذهب اسماعيل حسن عندما شبه شوقه بشوق السحابة الراحلة.
لكن الاكيد هو ان السحابة الراحلة في (شوق دائم)..شوقها يجعلها في ذلك الترحال حتى (تهطل) فتروي شوقها او تروي ارضها.
ملمح الشوق في المطرة ظاهرة ..خاصة اذا كانت (الواطة) عطشانة …تحس بذلك الشوق عندما تتنفس (الواطة) وتتطلع ليها (دعاش) بدون ما تشعر تلقى (شالك) في كتفك وماشي في الشارع تغني.
في شوارع كدا قدر ما تجي فيها بتلقى نفسك قاعد تغني.
والغريبة بتكون بتغني في اغنية محددة.
كل اغنية عندها ارتباط بالشارع الماشي فيه.
في شوارع عندها ارتباط بي عبدالرحمن الريح (حكمة والـلـه حكاية تشغل اذهان العباد).
وشوارع عندها علاقة بي خليل فرح (ما هو عارف قدمو المفارق).
وشوارع ترتبط بي محجوب سراج (ليه بتسأل عني تاني بعد ما بعت الاماني).
الحتة دي بتخيل لي كدا بتقطع (المصارين).
بتشعر بالحقارة العاطفية.
يعني بعد دا كلو بيسأل.
عند التجاني سعيد (الشوق) هو ما يجعلك تقوم بشيء بدون (مبرر) وبدون (زاد) – من غير منطق فهو يقول (وزي وطنا وقت اشتاق ليهو برحل ليه من غير زاد) – اذن هذا التعريف هو الامثل للشوق.
التجاني سعيد كان قد التقي في امر (السحابة) هذا – مع اسماعيل حسن حينما ابدع التجاني في وصف العيون وهو يقول (عيونك زي سحابة صيف تجافي بلاد وتروي بلاد) – لعل الوصف هذا اعتبر (قياسيا) في وصف العيون.
وهو وصف لا يخلو ايضا من (الشوق).
نحن طبعا واقعين في البلاد البتجافيها سحابة الصيف.
اسحاق الحلنقي عنده (سباق) في مضمار الشوق هذا ..فهو القايل ( لو وشوش صوت الريح في الباب يسبقنا الشوق قبل العينين).
الوشوشة (فعل) يتناسب مع حركة (الشوق) لا حركة (الباب) لذلك يحدث التداخل هذا واللخبطة بين صوت الريح وصوت الزائر.
وهي لخبطة قصدها الشاعر.
قبل فترة قصيرة كنت قد إلتقيت بالشاعر اسحاق الحلنقي ..سألته وقلت له انتوا الان شعراء تكتبوا بدون (شوق).
هذه جيل يفتقد للشوق.
غاب الشوق من الشعر الحديث وتلاشي حتى بين المحبين – لأن وسائل التكنلوجيا الحديثة عطلت هذا الاحساس.
يعني ما في زول في هذه الايام ممكن يقول ليه لي زول (مشتاقين).
إلّا مجنون.
بضحكوا عليك.
شوق شنو كمان؟.
عليك الـلـه دي سخانة (شوق).
الناس ذاتها بقت تعتبر الكلام عن الحنين والشوق وكسير الضلع كلام فارغ ساكت وما فيه ليه معنى.
ثورة الاتصالات جمعت كل الناس على اتصال …ما في زول مهما كان بعيدا (بغيب) عن الزول البهمو.
بقى ما في غياب.
بقى ما في بعاد ..مهما بعدت المسافات.
حكاية البعيد عن العين بعيد عن القلب ..بقت ما صادقة …ولا حقيقية.
البعيد عن العين الزمن دا معاك في الواتساب وانت شاعر بي وجوده اكثر من الزول الواقف قدامك دا.
عشان كدا الصورة اتعكست …وسائل الاتصالات قربت الناس البعيد ..وابعدت القراب..وفي ذلك خطورة..لأن الاسرة الصغيرة والقريبة ..هي الاكثر تضررا من الحصار الخارجي الذي يضرب بالعزلة بين افراد البيت الواحد.
زولك الفي البيت ما بنشط معاك إلّا لمن يبعد عنك ويبقى تواصلك معه بالواتساب.
زمان كان الزول المسافر بملأ وجوده بذكراه وبي طيفه لذلك يأتي الشوق ويظهر الحنين وتخرج قصائد الولع والحب.
كانت الاشياء حقيقية.
الآن ما في كلام زي دا …الاصدقاء ممكن يكون واحد في استراليا وواحد في كندا وواحد في بريطانيا وواحد هنا في السودان..مع ذلك ممكن يكون في حوار مشترك.
ممكن يجمعهم موضوع واحد.
الواتساب جعل الناس شركاء حتى في وجبة (ام شعيفة) البياكل فيها زول في السودان مع مجموعة في هولندا.
انتوا تعالوا هنا موضة ارسال صور (الاكل) دي شنو؟.
والـلـه كرهونا العيشة …لو ما صوروا (الصينية) ما بخلوك ايدك تمشي عليها.
الخالات يعرفن.
والعمات يعرفن.
والاخوات يعرفن.
يجيبوا ليك (فرخة) قبل ما تنزل عليها ..يثبتوك ..يصوروا (الفرخة) اول حاجة تقول عاوزين يطلعوا ليها (رقم وطني) ويرسلوها في الواتساب.
الفرخة تلف الواتساب كلو.
يجيبوا ليك كباية لبن ..قبل ما تشربها يصورها …عشان تمشي ليها لي زول في ابوظبي.
لكن من كرامات (العدس) ما في زول بصوره.
ما في زول بثبتك في (ملاح القرع).
تاكل بدون صورة.
الزمن دا (الاكل) بقى زي استخراج (جواز السفر)..لو ما صوروا (الاكل) اول حاجة ما بخلوك تاكل.
الغداء بقى زي الاستمارة.
تقول عاوز تقدم لي وظيفة.
او كأنك عاوز ليك (فيزا).
الاحباب بقوا على اتصال دائم عبر وسائل التواصل الاجتماعية ..تلقى ليك زول عندو علاقة مع زولة ..متابع فيها بالثانية.
مشت الجامعة.
دخلت المحاضرة.
الاستاذ عندهم وفاة.
مشت الكافتريا.
ضربت ليها سندوتش طعمية.
طلعت من الجامعة.
ركبت المواصلات.
في الكوبري الآن.
متابعة شديدة.
تقول اوبرا.
هذه الامور والتفاصيل المملة بالتأكيد بتضعف (الحب) – وبتخلي ما في حاجة اسمها (شوق).
يعني شوق على شنو؟.
زمان كانت (الحبيبة) بتشوفها في العيد …والعيد ذاتو يا عيد الفطر يا عيد الضحية ما مسموح ليك تشوفها في العيدين.
وكان الواحد لمن يلقى ليه (مناسبة) كدا في العائلة او في الحلة ممكن تجمعك بمن تحب ما بتصدق.
الفرحة تظهر على قميصك.
كانت في ندرة كبيرة في (الشوفة).
الشوفة ما كانت بالساهلة.
عشان كدا كان في سهر ..وولع ..وعذاب …وشوق.
هسع الحاجات دي كلها بقت ما في.
كلها (طشت).
غياب (الشوق) وخروجه من دولاب العواطف …جعل ادب الغرام يضعف ويتراجع لأن اهم مقومات ذلك الادب انتهت.
يعني هسع في زول ممكن يجري على الباب لو وشوش صوت الريح الباب.
ابدا.
تقلة شديدة.
الزول ما بجيك فجأة كدا زي (الريح) – بكون عندك معاهو اتصال ووعد..ما في (وشوشة) في الباب إلّا تكون عارفها.
سيد اللبن.
سيد البيت.
ود الجيران.
كلهم (جداولهم) بتكون نازلة في برنامجك.
غايتو نحن (قفلنا بلف الشوق).
انتوا قايلين عبدالصمد براهو البقفل البلف.
اقفل.
اقفل يا كابتن.
…………
ملحوظة : لو بقت على الشوق هين.
هوامش
يوم الاثنين يلعب الهلال مباراة مهمة اخرى.
مباراة سوف تجعل (الممتاز) هلاليا بالشمع الاحمر ان شاءالـلـه.
الخرطوم الوطني افقدتنا في الدورة الاولى نقطتين.
ما عاوزين تجربة الاهلي شندي تتكرر.
الاهلي فقدنا امامه في شندي.
وفقدنا امامه في ام درمان.
لذلك وجب الحذر من الخرطوم الوطني.
خاصة وان الخرطوم الوطني يعتبر من افضل واقوى اندية الممتاز هذا العام.
الانتصار على الخرطوم الوطني يوم الاثنين ان شاءالـلـه سوف يكون جواز عبور فريق (سموحة).
نجضوا الشغل.
وما تقعدوا تتلفتوا.
وألعبوا امام الخرطوم الوطني بالتشكيلة الاساسية.
ما عاوزين تنظير.
ولا اي حاجة.
المباراة سوف تكون مشهودة جماهيريا.
سوف تأتي الناس للاستمتاع.
الايامات دي كمان قايم فيها (كيبي).
كيبي خلاص فتح.
تاني ولا بقعد ليكم.
مباريات المريخ في الممتاز في البداية كلها سهلة.
من الرابطة لمريخ كوستي للاهلي الخرطوم.
بينما يلعب الهلال امام الاهلي شندي والامل عطبرة والخرطوم الوطني.
انتوا القرعة دي البختها منو؟.
إلّا رامز جلال.
……………..
عاجل : ان شاءالـلـه بكرة تكون في مطرة …(وانتوا عارفين السبب)

تعليقات الفيسبوك

تعليقات

الرد

لن يتم نشر عنوان بريدك الإلكتروني. الحقول الإلزامية مشار إليها بـ *