بابكر سلك : مكسيم بيضقر

بابكر سلك  : مكسيم بيضقر

> البلد اتطورت كتير
> وعندنا شركات تصنيع لحوم كتيره ورائده
> كلها ممتازه وتقدم مستوى عالمياً
> ناس لولي ومكسيم والقوصي والوجبه وغيرها
> منتجات لحوم زي الورد
> الهوت دوق زي البيتزا
> والبيرقر يقول يا ليل
> ومن اشهر انواع البيرقر
> مكسيم بيرقر
> حلو حلا
> ولكن فوجئنا في عطبره في ظهور منتج جديد
> مكسيم بيضقر
> حلو حلا
> مكسيم بالبيض يا عمك
> مش حاتقدر تقول شبعت
> مكسيم بيضقر
> لا تعرفوا هوت دوق
> ولا تعرفو كوفته
> ومرات يجيك طعمو بيتزا بيتزا
> جرب مكسيم بيضقر ومش حاتقدر تدي الجمبك
> المهم
> زماااااان
> ايام دوري الخرطوم
> فريق من فرق القمه شال الدوري
> كعادته الغالبه
> شالو بي طريقه من طرق الظفر بالدوري خارج الملعب
> المهم شال الدوري
> والتاريخ نسي الطريقه لكنه احتفظ للفريق بانه شال الدوري
> قال ليك لاعبين الفريق ده شبكوا ليك رئيس الفريق
> دايرين الحوافز
> دايرين الحوافز
> جننوهوا جن
> يوم قالوا ليهو دايرين الحوافز
> قال ليهم حوافز شنو؟
> قالوا ليهو حوافز شيلتنا للدوري
> قال ليهم الحوافز انا دفعتها
> ادفعها مرتين يعني
> قالوا ليهو يا ريس جابت ليها غلاط كمان
> متين دفعت الحوافز لينا؟
> قال ليهم دفعتها لي قون الفريق الفلاني
> ولي ثيردباك الفريق العلاني
> ولي رأس حربة الفريق الفلتكاني
> انتوا قايلين روحكم غلبتوا؟
> فسكت اللاعبون عن الكلام المباح حتي الصباح
> لانو رأس حربتهم اتذكر انو القون الجابو في آخر دقيقه ما بجي
> الحارس نطه بهناك للكوره
> زاد الكهربا حبه
> والثيردباك اتذكر
> لما رأس حربة احد الفرق حاورو وختاهو في الواطه
> ما كان في مبرر يختها بره الشبكه
> وخجلوا
> وقالوا للرئيس
> والله يا ريس تتجازى
> طيب جيب اي حاجه
> ايها الناس
> شفتوا كورة الأمل؟
> مدافع في تلاته دقائق غلط غلطتين
> ياخ في تسميع الزول ما بغلط غلطتين في تلاته دقائق
> لكن تقول شنو؟
> اظنوا اضطرب
> في تلاته دقائق اضطرب مرتين
> يجوز
> كلو شيء جائز
> ايها الناس
> قال الشاعر الكبير في وصف الزناطير
> المريخ زعيم وعقربنا سمو خطير.. انت القامه وانت وسامه وانت كبير
> ريحة المطار في الجو مسك وعبير… ده خاص بالشفوت وين بتشمها يا زنطير
> وللشاعر الكبير كلام كتير في وصف الزناطير
> سنقوم بنشره قدر المستطاع كي تعم الفائده
> ابقوا معنا
> المهم
> انهيار الأمل في تلاته دقائق ما بشبه فريق كبير زي الامل
> حقو ناس الأمل الشرفاء يعالجوا القصه دي
> الرصه شنو يا ناس الامل؟
> زهجتوا من الممتاز ودايرين تفارقوا ولا شنو؟
> تلاته دقائق؟
> بالغتوا
> انهيار حيطة جالوص واقفه في نص السيل في عز الخريف ما بكون في تلاته دقائق
> الحاصل شنو؟
> ما علينا
> المهم
> البعض منزعج من عدم مشاركة علولو ضد اتحاد الجزائر
> لكن مافي داعي
> غرزه شاطر ومليان بدائل
> وصدقوني
> غرزه لو طلع المدرجات
> وشال حداشر شفت
> بعرف يوظفهم كيف
> وبعرف كيف يعود بهم من الجزائر ظافرين
> غرزه يا عمك
> ود الظافر
> المهم
> سرنا تعيين الاخ طارق سيد في قطاع الشباب
> الرجل بيخدم الكيان
> وله مواقف كتيره نشهد عليها
> وأول من ناقشه للمنصب كنت انا
> لثقتي فيه وفي عطائه وولائه
> الرجل وقتها قبل التكليف
> وكتر خير المجلس اشركنا في الرأي
> واصدر قرار التعيين
> بالتوفيق يا طارق
> وعندك من الاداريين الاستاذ حامد بدوي
> ومن الفنيين الشفت محمد موسى
> ومنا كل الأمنيات بالتوفيق
> وابقى عشره على الشباب والرديف
> بالذات لاعب اسمو حمدتو
> حمدتو ده داهيه يا طارق
> ابقى عشره
> ايها الناس
> قلت ليكم قصة الفريق الشال دوري الخرطوم؟
> نسيت
> قلتها ليكم فوق
> ريس النادي قال ما بدفع حافز مرتين
> المهم
> لو لقينا مجموعه في التطواني والزناطير وسموحه
> والله ننسحب من اربعه مباريات ونصعد برضو
> بختك يا مازيمبي
> ولسه ماراح شيء
> مجموعه زي مجموعة درس التقويه
> مجموعة درس التقويه البعملوها للطلبه الضعفاء
> مجموعه كلها زناطير
> غير مازيمبي ما فيها زول ما زنطور
> ايها الناس
> ان تنصروا الله ينصركم
> اها
> نجي لي شمارات والي الخرتوم
> كان شفت يا والينا
> البلد كلها مقدم يا والينا
> الكهربا مقدم يا والينا
> المويه مقدم رغم انها ما بتجينا
> لو داير تشتري بالقسط تدفع مقدم يا والينا
> مقدم طواااالي واصلو ما ببقي عقيد يا والينا
> البقترح المقدم وبفرضو علينا
> ما بحترم العقد البينا
> متين يحترموا العقد والمقدم يبقى عقيد يا والينا
سلك كهربا
ننساك كيف والمقدم اول ضابط عظيم قالوا لينا
والى لقاء.
سلك

تعليقات الفيسبوك

تعليقات

مقالات ذات صله

الرد

لن يتم نشر عنوان بريدك الإلكتروني. الحقول الإلزامية مشار إليها بـ *