محمد عبد الماجد : المجموعات السنة دي زي العريس الخالتو ماتت في حنتو

بكري المدينة (شايت) الكورة في (المرمي) وداها (الكشافات)…مدافع العلمة عاوز يطلع الكورة في (الكشافات) دخلها (المرمى)

فريق سموحة ظل يلعب لاكثر من اربع سنوات بدون جماهير…حضور الجماهير في مباراة الهلال سوف تكون نقطة ضعف سموحة

عاوزين نعيد السنة دي بعدد من (الاهداف) الغزيرة في شباك الفريق المصري

متل طبيب الاسنان …وقت مشى يعرس ..قال ليهم انا (فتح الخشم) ما عندي فيه مشكلة ..لكن لا عندي قروش عقد ولا قروش عرس

· بعد ان شاهدت فريق (العلمة) فريق (درجة تانية) بلعب في المجموعات وبسجل كمان (اهداف عكسية) في مرماهو – قلت السنة دي المجموعات جابت ليها (حمام) اروش بشكل.

· نحن الحمام بنعرفو من (اهدافه العكسية).

· لكن حمام زي دا اول مرة يصادفنا.

· الحمامة تكون عاوز تدخلها القفص …تطلعها منو.

· الحمامة تكون عاوزة تزوغ من القفص تدخل فيه.

· هدف (العلمة) العكسي بيثبت ذلك.

· بكري المدينة (شايت) الكورة في (المرمي) وداها (الكشافات).

· مدافع العلمة عاوز يطلع الكورة في (الكشافات) دخلها (المرمى).

· هسع المفروض يتشقلب منو؟.

· بكري المدينة وإلّا مدافع العلمة.

· وبابكر سلك يقول ليك الكورة كانت ماشه المرمى…يا سلك كورة بكري دي لولا مدافع العلمة لو كانت قريبة هسع تكون في (مصفاة الجيلي).

· مجموعات (درجة تانية).

· فريق في دوري بلدو ما قادر يثبت …البيجيبو (المجموعات) شنو؟.

· وقت شفت (العلمة) في المجموعات ..اتذكرت المغترب …الماسك الحلة في ايدو.

· عامل ليهم فيها (مغترب).

· السجائر عالمية.

· والكلام فيه شوية (انجليزي).

· وكل سنة يجي البلد ويقول ليهم عرسي في اجازتي القادمة.

· يجهجه ليك بنات الحلة ساكت.

· البنات يشيلن ويغسلن في ملابسه.

· يغشغش في بنات الناس ساكت.

· قروش الصابون ما قاعد يدفعو.

· انت مغترب شنو انت؟.

· صاحبكم مغترب في (الصومال).

· زول يغترب في الصومال إلّا (قرصنة).

· يعني عاوز يشتغل شنو في الصومال غير القرصنة؟.

· في مغترب تاني في (ليبيا).

· ما عندو علاقة بالمغترب الاول.

· ولا بعرفو.

· ناس الحلة عذبوه بالمسكول.

· كل مرة يضربوا ليه ويقولوا ليه رسل لينا حاجات من ليبيا.

· ناس الحلة اصلو ما ريحوها.

· التلفونات – الجوابات – والوصايا الساكت …كلها بتقول ليه رسل لينا (حاجات) من ليبيا.

· العيد ماشي علينا.

· ورمضان السنة دي قطعنا ..ما خلي لينا حاجة.

· زولكم وقت الطلبات كترت عليه رسل ليهم (ذخيرة حية)..قال ليهم انتوا قايلني مغترب في (امريكا)..شنو رسل لينا ..رسل لينا ..رسل لينا.

· ردمهم ليك بالذخيرة الحية.

· ليبيا فيها شنو غير (الذخيرة الحية)؟.

· متل طبيب الاسنان …وقت مشى يعرس ..قال ليهم انا (فتح الخشم) ما عندي فيه مشكلة ..لكن لا عندي قروش عقد ولا قروش عرس.

· استاذ لغة عربية مشى (يخطب) كلم اهل العروسة عن عمرو بن كلثوم.

· سواق قندران مسكوه فريق الحلة ..قالوا ليه انت ما في زول بفهم كورة قدرك في الحلة.

· زولكم صدق.

· في اول مباراة اشرف عليها (سواق القندران) …كان عاوز يعمل (غيار) في النص…عمل غيار زيت.

· فهمو كدا.

· الجمهور كلو هتف ضدو.

· لكن دا كلو ما بحلكم من المجموعات الضعيفة دي.

· مجموعات منتهية.

· مجموعات فيها فريق درجة تانية.

· المجموعات بقت اي كلام يا رجالة.

· المجموعات انتهت.

· نحن اتخدعنا يا رجالة.

· المجموعات السنة دي زي العريس الخالتو ماتت في حنتو …(حفلة مافي).

· والفرحة ما قادرة تطلع عشان (الحزن) مسيطر على الموقف.

· الشفع في المناسبة ما قادرين يأخدوا راحهتم في (الطعمية).

· طبعا في ظاهرة عجيبة في المناسبات.

· ظاهرة ما قادر استوعبها.

· في اي مناسبة الشفع بتفتحوا ليك في (الطعمية) انفتاحة غريبة ..اي واحدة تجي جارة شافعها وتقول ليهم احشوا ليه بس (سندوتش طعمية).

· الشافع يحشوا ليه سندوتش الطعمية (15) مرة.

· يدوروا ليك في (الطعمية) متل تمرين الرماية.

· شناة طبع بس.

· في واحدة من الستات مع (الحزن) العام اللخبط ليهم المناسبة تجيب ليها (ضلعة) وسلطة اسود وصحن فاصوليا وطعمية وجبنة وزيتون و (7) رغيفات وفتح ليك فيهن.

· الست بتاكل في الحاجات دي …وتضامنا مع حالة الحزن العائشة فيها – تقول ليهم و اللـه الاكل دا ببلع فيه زي (الطوب).

· وهي تملص في (الضلعة).

· وتضرب في سلطة الاسود.

· وتلملم في الفاصوليا.

· يتخلل ذلك لملمة سلطات من جميع انحاء الصينية.

· والست عاملة فيها بتاكل بدون نفس.

· انا ما عارف لو كان عندها نفس كانت عملت شنو؟.

· المجموعات السنة دي مسيخة كدا…فيها حزن العريس الماتت خالتو يوم الحنة.

· لا قدروا يعملوا حفلتهم ..لا قدروا يلغوا (الحنة).

· المجموعات كدا.

· فيها فريق درجة تانية.

· تقول نحن عندنا (سيكافا).

· جايبين لينا فريق درجة تانية.

· درجة تانية في المجموعات…نحن عندنا (مهرجان).

· بالمناسبة فريق (سموحة) برضو ما قدر كدا.

· نعم الفريق استطاع ان يغلب تأخره 0 / 2 ..بفوز 3 / 2 ..ولكن هذا لا يعني ان الفريق (خارق).

· او صعب.

· نتيجة مباراة سموحة والتطواني اعطتنا قدر الفريق المغربي.

· فريق كان متقدم 2 / صفر ويأتي ويخسر المباراة في (15) دقيقة ..هذا يعني ان التطواني على اقل الفروض فريق ما محترم.

· ويعني ان الهلال ومازيمبي …فرصهم الاعلى والاكبر في التأهل على حساب سموحة والتطواني.

· الهلال عليه ان يركز في صدارة مجموعته …لا ينبغى ان يكون الطموح منحصر في التأهل فقط.

· التعادل امام مازيمبي في الكنغو ..يمكن ان يكون جواز صدارة المجموعة الاولى.

· الهلال سوف يلعب الاحد القادم امام سموحة ..اي بعد سبعة ايام فقط ..سوف ينازل الهلال سموحة.

· المباراة في المقام الاول ..هي مباراة (جمهور).

· مباراة جمهور قبل اي شيء.

· لا نقول ذلك من اجل تحميس الجماهير الهلالية او شحنها – فهي لا تحتاج لذلك.

· نقول ذلك لأن الكرت الرابح في مباراة الاحد ..هو كرت الجمهور ..وذلك لسبب منطقي جدا.

· فريق سموحة ظل يلعب لاكثر من اربع سنوات بدون جماهير ..ولا بد ان حضور الجماهير والمساندة القوية سوف تجعل (سموحة) يذوب تماما امام الهلال.

· نقطة ضعف (سموحة) الجماهير ..فهو يملك مجموعة من اللاعبين لا تعرف اللعب امام الجماهير.

· وتتلاشى تماما في حضور الجماهير.

· لذلك يجب ان يستغل الهلال هذا العنصر ..ويجب ان تعلم الجماهير انها هي (السلاح) الذي يمكن ان ينتصر به الهلال على الفريق المصري.

· لا بد من تفعيل الدور الجماهيري ..والاستفادة الكاملة من (المدرجات).

· نحن في المباراة القادمة لا نحتاج بشه.

· لا بشه لا نزار حامد.

· لا نحتاج مساوي ومكسيم.

· المباراة القادمة نحتاج الى جماهير الهلال ..عبر (مدرجات) استاد الهلال يمكن ان يحقق الهلال اكبر انتصار في المجموعات.

· هدف الهلال يجب ان يكون تحقيق انتصار كبير على سموحة ..هذا افضل توقيت لتحقيق اكبر انتصار على سموحة.

· هذا افضل وقت يمر فيه الهلال في هذا الموسم.

· لذلك يجب الاستفادة من هذا (التوقيت)..بتحقيق انتصار كبير على سموحة.

· لن يكفينا امام سموحة هدف او هدفين.

· نريد مجموعة من (الاهداف) في الشباك المصرية ليعلن الهلال احقيته باللقب.

· لا تدعوا الفرصة تفوتكم.

· اجعلوا طموحكم اكبر من الهدف.

· اكبر من الانتصار فقط.

· نريد عددا من الاهداف في شباك سموحة.

· سموحة مع حالة الرعب التى يعاني منها الفريق في حضور الجماهير ..يعاني ايضا من عدم استقرار فني.

· سموحة في بداية الموسم اطاح بالمدرب حمادة صدقي..ثم جاء واطاح مجلس ادارة سموحة بالمدرب الاجنبي الذي كان يشرف على الفريق.

· بعد المدرب الاجنبي اشرف على الفريق فنيا المدرب حلمي طولان الذي تمت الاطاحة به ايضا.

· ليشرف على الفريق مؤقتا المدرب (ميمي).

· اذن كل العوامل والعناصر تأتي في صالح الهلال ..وسعوا مواعين طموحكم ..وانزلوا اكبر هزيمة بالفريق المصري.

· هذه فرصة تاريخية ومثالية للهلال..يجب الاستفادة منها.

· زي دي تاني ما بتلقوها يا بشه.

· الكوكي يمكن ان يحقق نتيجة قياسية في تاريخه امام الاندية المصرية.

· سموحة لا قدرة له على الصمود (5) دقائق امام جماهير الهلال.

· فقط فلتكن جماهير الهلال في الموعد.

· ………..

· ملحوظة : صدقوني سموحة وقعت وما سمت.

هوامش

· عاوزين نعيّد السنة دي بعدد من (الاهداف) الغزيرة في شباك الفريق المصري.

· انزلوا اكبر هزيمة بالفريق المصري.

· خلوهم يفهموا حاجة.

· مباراة الغد امام الخرطوم الوطني يجب ان يدخلها الكوكي بحسابات دقيقة وبالتشكيلة الاساسية.

· مباراة ما بتستحمل اي تهاون او استهتار.

· مشاركة نيسلون من البداية فيها فائدة كبيرة للهلال.

· على الاقل المشاركة سوف تجعل (نيسلون) جاهز للمباراة الافريقية.

· فلتبدأ حملة شاملة لتحقيق اكبر انتصار.

· لا هدف ولا هدفين ولا تلاتة.

· نحن طمعانين في الخمسة ولي فوق.

· بلا سموحة بلا لخمة معاكم.

· فرق زي دي نحن ذاتو ما عاوزنها في المجموعات.

· فلتكن مباراة الاحد ..مباراة تاريخية للهلال في الاداء ..والنتيجة وفي الجماهير.

· الانتصار (الساحق) تحقيقه سوف يكون عبر (الجماهير).

· يلا اهدروا وسكتوا الخشامة.

· ……….

· عاجل : سموحة دخلت (المقبرة) بي كرعينها وما سمت.

تعليقات الفيسبوك

تعليقات

الرد

لن يتم نشر عنوان بريدك الإلكتروني. الحقول الإلزامية مشار إليها بـ *