بابكر سلك : اندرزينهو طلع اندر قراوند

> وزي ما قال دكتور عمر محمود خالد
> اي زول سمح مريخابي
> واي زول وسيم مريخابي
> اي زول شاطر مريخابي
> اول امس كرم المريخ السمح اشطر زوله
> فكان تكريم للسبعه الاوائل
> ومدرستهم
> وناظرتهم
> ووكيلتهم
> كلهن مريخابيات
> قلنا ليكم اي زول شاطر مريخابي
> وهرول الإعلام الهلالي ليسرق انجاز المريخ
> كعادتهم يحاولون لي عنق الحقيقه وتزييف التاريخ
> اصلو الماعندو قديم ما عندو جديد
> والمريخ قديمو باااااتع
> من سنة الف وتسعميه وتمنيه
> المهم
> الأولى بتنا
> وحقتنا يا روشا
> وأبت تغير لونها
> اصلو الاحمر ما بتغير يا روشا
> ايها الناس
> كان احتفالاً شرفه وزير التربية الاتحادي
> وناس تعليم محلية كرري
> ورموز المريخ وكباراته
> والجماهير والروابط
> وكانت ساس
> ساس وتاج راس
> وشاركت في تكريم المكرمات
> كان يوماً يشبه المريخ
> يوماً سجله التاريخ
> يوما عرفوا الناس فيهو منو السمح ومنو الشاطر
> ومنو الطفى النور
> شكراً بتنا عائشه
> وشكراً بناتنا المكرمات
> وشكراً الوزير الذي شرفنا
> وشكراً كباراتنا
> وشكراً الدنيا التي سمحت لنا ان نتباهى
> المهم
> شفنا كورة الهلال والخرطوم
> الهلال مدافع بي جماهيرو
> كلهم ورا
> جمهور الهلال تعب تعب شديد
> يدافع ويصفر مستهجناً سوء المظهر والمنظر
> ايها الناس
> قلت ليكم اندرزينهو ماسورة
> ما صدقتوني
> دسوهوا من معسكر تونس
> ولما ظهر
> قبل الكورة تبدأ الماسورة بدت تنقط
> ياخ ده طلع اندرقراوند
> ماسورة مدفونه
> الزول ده كان جري
> جريتو زي عمك الطاهر بتاع الدكان الجمبنا
> الكان بسكنا لما كنا صغار
> نشغالوا ونجري
> عشان يسكنا ونضحك في جريتو
> اندر قراوند ده بجري زي عمك الطاهر
> ايها الناس
> كونو انو تجيب محترف زي ده
> دي اشانة سمعه للبلد
> حقو القانون ياخد مجراهو في مواجهة الزول الجابو
> معقوله زول زي ده بدولار مع سعر الدولار ده؟
> النتيجه العادله مفروض تلاته للخرطوم
> لكن في شيء غريب
> غريب جداً
> ولو دي الطريقه
> سموحه حايتصدر مجموعتو في المرحله التانيه كمان
> حقيقة
> الهلال فقد بكري
> كان على الاقل بفك الحصار العليهم ده
> ناس محاصرين تسعين دقيقه
> حيرتونا
> حصار القسطنطينيه ما كان تسعين دقيقه
> المهم
> اولادنا اسي في بلدا طيرها عجمي
> ماشين نلعب كورتين
> بي سته نقاط
> صدقوني بنرجع بي نقاط منها
> فجمال في المجلس
> وجمال في المرمى
> وجمال في تكتيك الدفاع
> وجمال في بكري الجميل
> وجمال ضفر ظاهر
> والأجمل قعدت غرزه في البنش
> ايها الناس
> ريحة المطار فاحت
> حقو نتنسمها بوقفتنا مع الزعيم
> بمجهوداتنا الكبيره
> بثقتنا في ناسنا
> بدعواتنا
> وصدقوني
> بنتلاقي في المطار
> ايها الناس
> الكوكي هزم الخرطوم بالصدفه
> قال دي كورة بي سته نقاط
> فهمتوا حاجه !!!!!
> المهم
> يا طارق المعتصم
> استغل غياب المريخ بالجزائر
> وابدأ في قطاعك
> كونوا
> حدد الاداريين والفنيين
> حامد بدوي وعصام طلب وغيرهما
> محمد موسى وجمال ابو عنجه وغيرهما
> دايرين شفوت في الادارة
> وشفوت على دكة الفنيين
> وكلنا معاك
> ايها الناس
> مبادرة قروب صفوه بلا حدود في ما يتعلق باعادة تأهيل النادي
> مبادرة طيبه وجيده
> وتحتاج لوقفة بقية القروبات
> وايد علي ايد تجدع بعيد
> يا صديقي معاويه الجاك
> ابدوا والباقي علي الله
> النادي لازم يشبه المريخ
> مدخل اجمل من مدخل روتانا
> قلادن زي القلادن
> وحدائق
> وتغيير جذري في المبني
> النادي لازم يعد اعداداً جيداً حتى يستطيع ان يستقبل الاميره الافريقيه
> شامي لي ريحة مطار
> المهم
> قالوا اهلي الخرطوم اشتكانا في بكري
> ليهو حق الاهلي
> وحايكسب الشكوى
> بكري جنى على الاهلي
> وجننهم جن
> جرى بيهم قطع قلبهم
> وجاب قون «بدون عقربة»
> وشقاهم شقة سكين لي بطيخه ولعب باص القون لي مصعب
> اها دي ما حقاره تستوجب الشكوى؟
> لكن يا ناس الاهلي
> كان تشتكوهو في الامم المتحده
> الزول ده لوزان ما قدرت عليهو
> ايها الناس
> تاني لو بكري غلب زول
> امشوا النيابه عديييييييييييييييييل
> الزول ده مجرم كبير
> ايها الناس
> إن تنصروا الله ينصركم
> أها
> نجي لي شمارات والي الخرتوم
> كان شفت يا والينا
> صلينا والمويه ابت تجينا
> ما اتوضينا
> اتيممنا عشان المويه قاطعه يا والينا
> وبعد صلينا برضو ابت تجينا
> اها يا والينا
> نصوم ليها ولا نتجهد ولا الا عمره ياوالينا؟
سلك كهربا
ننساك كيف والكلب بجي قبل العربية
والى لقاء
سلك

تعليقات الفيسبوك

تعليقات

الرد

لن يتم نشر عنوان بريدك الإلكتروني. الحقول الإلزامية مشار إليها بـ *