بابكر سلك : إن شاء الله يستلمها الجيش

> حزنا كثيراً لخروج الخرطوم الوطني من سيكافا
> كنا نمني النفس بتقدمهم وحصولهم على سيكافا
> ليصبحوا تاني اعظم فريق في السودان
> فبعد أن سطر المريخ اسمه في سجلات العظماء
> فشلت كل الانديه السودانيه في اللحاق به
> فيهم انديه شاركت عشره مرات
> وعادت بالمرارات والاصفار
> كنا نتمنى ان يحصل الخرطوم على كأس سيكافا
> ليذهب غيرنا للمطار
> عشان نرتاح حبه من مشاوير المطار الكتيره البنمشيها برانا
> ومن غيرنا
> بالذات ونحنا راجينا مشوار مطار شامين ريحتو من عزام
> هاردلك الخرطوم الوطني
> وما تتحسسوا
> غيركم شارك عشرة مرات ما جاب شيء
> حاولوا تاني
> المهم
> البتفرج علي مباراة للمريخ افريقيه
> تمسخ عليهو اي مباراة تانيه
> والبشاهد مباراة للمريخ دوريه
> يمسخ عليهو باقي الدوري
> المريخ فات بعيد
> فات الناس مسافه
> شكل غير
> تشعر بانو في شغل
> وشغل كبير
> مهارات اصليه ما تامنها مويه وسامنها نيماريه
> واداء منضبط شديد
> فالشبل شيبون يؤدي بثبات وكأنه لاعب مخضرم
> ما شاء الله عليهو
> مهارة وقوه بدنيه وانضباط تكتيكي
> عشان كده كلو يوم بنشوف تيكي تاكا جديده
> والرقم القياس خمسه وسبعين باص
> ايها الناس
> مهارة كوفي واكرا وديديه يستحيل تلقاها في فريق واحد
> وقتال بكري واصرار ضفر وجدية علولو وفتوه جابسون
> في منتخب ما بتتلمه
> خبرة راجي والمصري وعمر بخيت
> بيت الخبره عديل كده
> اما يقظة جمال سالم فعالم تاني
> الجهاز الفني لا يوجد في المنافسات الافريقيه من ينافسه
> يبقي المريخ هو فريق البطوله هذا الموسم
> لأن كل ذلك من خلفه تقف جماهير تزأر
> تصر على المضي قدماً في طريق المطار
> جماهير اعلنتها واضحه
> من عزام ولي قدام
> ايها الناس
> عرفتوا ليه بقول ليكم شامي لي ريحة مطار؟
> المهم
> اليوم نلتقي مريخ السلاطين
> ومريخ الفاشر ما هين
> لكن يجب ان نقابله وعيننا على النقاط التلاته
> فهي مباراة بطولة الممتاز
> ننتصر فيها لنعلن تتويجنا بالبطوله
> عشان نتفرغ للمطار
> على الجميع ان يعلم
> ان من حق جماهير الفاشر ان تستمتع بالاداء
> والنتيجه
> دايرين يشوفوا الخمسه وسبعين باص لايف
> عشان كده نلعب بجديتنا المعهوده ونعطي كل زي حق حقه
> وحق جماهير الفاشر المتعه
> اها
> يا محمد عبد الماجد
> قول قابلتوا سطيف
> المشي للجزائر كيف ؟؟؟
> ولا برضو بتكبوا الزوغه !!!!!
> ناس سطيف قالوا بالانتربول يا حماده
> مافي داعي للفضائح يا ابو حميد
> اتغلبوا من تطواني وسموحه واحترموا روحكم
> مصاريف الانتربول بتكون علي المتهم يا حماده
> بالدولار يا اخوي
> ايها الناس
> نتمني اداءً رائعاً يشبهنا بالفاشر
> ونتيجه كبيره ترضينا
> واستمتاع لشفوت الفاشر
> ايها الناس
> ان تنصروا الله ينصركم
> اها
> نجي لي شمارات والي الخرتوم
> كان شفت يا والينا
> لي جاراً عيان العصر للسلاح الطبي قسم الطوارئ مشينا
> وقبل كده لي جداً لينا المغرب ودينا
> والسنه الفاتت مع ام العيال مشينا
> والشهر الفات لي زول وقع شلنا وودينا
> في كل المرات يا والينا
> ما حصل السلاح الطبي وسخان لقينا
> نضيف طوالي يا والينا
> والاناقه والشياكه لجميع العاملين يا والينا
> حتى التراب البجينا وكندكنا لمن قلنا ابينا
> في السلاح الطبي ما لقينا
> في زلط السلاح الطبي تراب ما لقينا
> نضافه وقيافه وحصافه وظرافه يا والينا
> اجمل من فندق وانضف من قصر وفي المرض يشهينا
> ليه باقي المستشفيات ما زيو يا والينا؟
> ولا ده عشان ماسكوا الجيش يا والينا؟
> باقي المستشفيات
> ان شاء الله يمسكها الجيش يا والينا
سلك كهربا
ننساك كيف والكلب زاتو زهج بقى ما بجينا
والى لقاء
سلك

تعليقات الفيسبوك

تعليقات

الرد

لن يتم نشر عنوان بريدك الإلكتروني. الحقول الإلزامية مشار إليها بـ *