بابكر سلك : نتشفتن عشان ما نتبشتن

> الحبيب الشفت وليد يوسف ذكرني أمس بعمودي .. العمود العنوانو يا نتشفتن يا نتبشتن
> واتشفتنا وقتها.. فكانت ثنائيه راجي وهنو.. واتبشتن غيرنا
> اشكرك يا الحبيب وليد
> فأنت اليوم ملهمي
> ودي مرحلة شفتنه تانيه
> راعي الضأن في الخلا يعلم بان الزعيم هو بطل افريقيا هذا العام بإذن الله الزعيم هو عريس الاميره السمراء
> وبعد نجرتكها بالاحمر
> حانسميها الاميره الحمراء
> اميرتنا ونحنا حرين في تسميتها
> وعشان نمشي المطار
> لا بد ان نتشفتن
> وشفتنتنا في هذه المرحله
> هي الوقوف حول الكيان بنفس روح عزام ولي قدام
> وننسى قصص الممتاز التي يصنعها اداريون وتخرج روائحها نتنه من صافرات يستهجنها اي انسان لا يقبل الظلم
> فما يستعرضه سيحه من اخطاء تحكيميه يطمم البطن
> اتمنى ان يجد سيحه حالة خطأ واحدة في حق المظلوم لأجله
> بطولة كهذه لا تسوي شيئاً
> فكاس يمكنك ان تجلبه بصافرة حكم وراية مساعد وتقرير شالو الحكم سافر بيهو
> ببقي كاس مسيخ
> والكاس المسيخ بستحقوهو ناس السكري
> وناس السكري الجاب ليهم السكري
> الصفر البهري فيهم هري
> انتوا وييييييييييين همشري !
> خلوهم مع سكريهم ده
> يجب ألا نتباكي على قطعة خبز سقطت منا على قارعة الطريق
> ونضيع مطاحن الغلال التي نحن اقرب اليها من اي زول بشهادة الكاف
> ايها الناس
> شفتنتنا تعني في هذه المرحله
> ألا تؤثر فينا القرارات التي نراها جائره
> وألا نضيع جهودنا في معارك انصرافيه لا تسمن ولا تخرج عن صفر كبير
> ندخر الجهود ليوم موعود بنا وموعودون به
> ليوم المطار ونحن نتنسم ريحة المطار التي تميزنا عن صفرنا
> لنغني
> يا صفرنا يا صفرنا يا صفرنا ويا صفرنا..يا صفرنا
> انت تقبع في مكانك ونحنا نجني في ثمارنا
> ويا صفرنا يا صفرنا
> انت قاعد في مكانك ونحنا فتنا لي مطارنا
> ويا صفرنا ويا صفرنا
> المهم
> الشفتنه في هذه المرحله
> ألا يجهجهنا ما يحدث
> ان نتماسك ونتمسك بالاميره
> دايرانا ومكسره فينا
> حب ما من طرف واحد
> باقي في ناس سامنها المحببه
> يحبوا فيها العمر كلو
> وهي ولا على بالها
> بتضحك في مشاعرهم
> لانها تعلم فقها ان الكفاءة مطلوبه في الزوج
> بتضحك في صفرهم
> بتضحك لانهم يشطحون ولا يستحون
> بتضحك في حبهم البدون كرامه ده
> حب من طرف واحد
> وبتقول ليهم دايره اقرأ
> المهم
> نلتف حول فريقنا جيداً
> لاعبنا يعرف اننا ما لايمنو لاننا مفرغنو لي مهمه تانيه
> لجلب الاميره
> الجهاز الفني يعمل من اجلها وبس
> اما الاداره فلا تضيع وقتها في التصريحات
> ولا في اللقاءات مع الاذاعات التي تهدف الي تحطيمنا بكل حقد علني
> يشتغلوا في مهمتهم الاساسيه
> نجيب الاميره السمراء
> نجيبها ولو يرتفع السكري عند كل حاقد وحاسد
> نجيبها ولو يموتوا كمداً بالكوم
> نحن لا يهمنا غير الاميره التي تحبنا
> يبقى نعمل للهدف الاساسي
> يا حبي الاساسي يا النسيتني ناسي
> موعدنا المطار
> المهم
> مباراتنا ضد اتحاد الجزائر مباراة للاعصاب البارده
> لا توتر فيها من جانبنا ولا من جانب اتحاد الجزائر
> الذي نتوقع لقاءه مجددا في النهائي
> يبقي الجمهور يجي يشجع باعصاب بارده
> ولكن بشفتنه تجبر اهل الاتحاد على الاعجاب به
> كما اعجب به من قبل ابناء سطيف
> سطيف الشردوا منو الناس
> يبقي نجي كلنا لنكسر رقم الدخل الذي حققناهو يوم سطيف
> ومن غيرنا يسجل الارقام القياسيه
> نجي كلنا لنبدع في تشجيعنا
> لنطمئن اولادنا وجهازهم الفني
> اننا علي العهد
> اننا علي الدرب
> اننا لن نتنازل عن المطار
> ايها الناس
> الكلام عن لاعب مريخي مشي مصر عشان يحفز ناس سموحه
> كلام غريب
> لكن لو المتكلم مجنون
> حقو البسمع يكون عاقل
> يعني سموحه افضل ليها تبيع بشرط تفوز
> ولا تبيع بشرط تنهزم؟؟
> هي بشرط وبدون شرط ما عندها شيء
> ولكن ما براها الما عندها شيء
> عشان كده كلو شيء متوقع
> وما اشاعة نجم المريخ البحفز ناس سموحه
> الا محاولة لايجاد العذر لو خبر الشوم خبر الروم تناقلنو في مصر الحروم
> ايها الناس
> فريقنا بقوة نقيف معاهو
> نفوت الفرصه على من يريد ان يصطاد في الماء العكر
> ليشتت تركيزنا
> ويبعدنا عن طريق المطار
> ايها الناس
> لو تأهل الزناطير اولاً للمجموعه ووووب
> بقابلوا الزعيم
> ووقتها لن يجدوا حكماً يصرف ضربة جزاء مستحقه كالتي صرفها الحكم مع كوفي
> وكالتي صرفها الحكم في مباراتهم ضد النسور في الدوره الاولي الدقيقه سبعه
> وغيرها من حالات تطمم البطن
> بل سيجدون حكما افريقيا يخاف من هذه المرحله
> ويحتسب عشرين ضربة جزاء مستحقه
> زي الحكم الادار كورتنا ضدهم في المجموعات يوم اديناهم تلاته
> اليوم داك بوي البلنتيات العملها اكتر من الباصات اللعبها
> اما اذا تأهلوا ثانيا للمجموعه فبرضو وووب وووب وووووووووب
> حايقابلوا البلايلي
> اتحاد الجزائر
> يا يطيروا يا يطيروا مافي حل غير يطيروا
> اما اذا خبر الشوم خبر الروم
> فووووووووووووووووووووب
> الكاتل الله و «الحاي» الله
> وعندها سيصرفون جماهيرهم عن الهزيمه
> بلواكة موضوع لاعب المريخ السافر مصر
> مصر سافروا الناس قبل شهر يا روشا
> والغريبه ما بغيروا مكانتهم اصلو
> نفس الشتله كانت مع النفطي
> كلم الصفاقسي وقال للترجي
> وبعدها فوووووو
> طيران الخليج
> ايها الناس
> المظلوم لاجله سيظل في صفره
> ربايت الدلع ما بتنفع
> وحرم الله الظلم على العباد
> وقال في محكم تنزيله
> بسم الله الرحمن الرحيم
> «وتلك القرى أهلكناهم لما ظلموا وجعلنا لمهلكم موعدا»
> صدق الله العظيم
> اذن كلو ظالم ليهو يوم
> في ناس يومهم يوم الخميس
> وفي ناس يومهم يوم التلات
> وفي ناس يومهم يوم سته
> وفي ناس يومهم يوم تسعه
> وفي ناس
> يومهم يوم اطناشر
> كلو ظالم ليهو يوم
> ايها الناس
> نتشفتن عشان ما نتبشتن
> بكري المدينه اهدافه الافريقيه اكتر من اهداف ناس كده
> حانمشي المطار
> ويا اخوتي غنوا لنا غنوا لنا
> ايها الناااااااس
> الناس بالناس والكل برب العالمين
> مريض يعاني ويعاني
> طريح العنايه
> لا يستطيع الخروج منها الا اذا توفر له جهاز اوكسجين
> اسرته لا تستطيع لذلك سبيلا
> ولكن العشم في اهل الخير كبير
> تلفون اسرته 0964766905
> سعر الجهاز سته مليون او سته الف جنيه كما يحلو للبعض
> وعشم الاسره في روح التكافل كبير
> ايها الناس
> ان تنصروا الله ينصركم
> اها
> نجي لي شمارات والي الخرتوم
> كان شفت يا والينا
> اظنكم المطره زاتها الكترونيه عملتوها لينا
> السحاب يتلملم يجينا
> نطوي المراتب ونؤجل مشاويرا لينا
> ننضف السباليك ومن خوف قطع الكهربا ننفض الرتينه
> والسحاب متلملم يعاين لينا
> ونحفر الخور النسوهوا ناس المحليه وما قالوا نسينا
> وبعد ده كلو تطش الشبكه والمطره ما تجينا
> مطره الكترونيه دي الغوها لينا يا والينا
> دايرين المطرة البي طينها رجعوها لينا
سلك كهربا
ننساك كيف ولما نشوف السحاب نجري نتلملم والكلب رااااقد ولا بقوم من مكانو.. زمان بجري يدخل جوه قبالنا
والى لقاء
سلك

تعليقات الفيسبوك

تعليقات

الرد

لن يتم نشر عنوان بريدك الإلكتروني. الحقول الإلزامية مشار إليها بـ *