محمد عبد الماجد : (اللعب النظيف) .. بعد دا يا ابوشيبة!!

يا ابوشيبة واللـه الكلام دا تقولوه لحكم المباراة او المراقب او تلمحوا بيه ساكت ..إلّا ينزلوكم الدرجة التانية..يوفنتوس نزل!!
ألا يعلم ان هذا الذي يروج له ابوشيبة وينادي به وان سماه (اتفاق حلال) هو (تواطؤ) …و(تواطؤ) من امو كمان
· عندما هاجمنا احد اللاعبين واتهمناه بتحريكات (مريبة) لتحفيز لاعبي سموحة لكي يلعبوا بقوة من اجل الانتصار على الهلال ولنا في ذلك (دلائل) ..اعتبر البعض ان هذا الامر (خيالي) وانه لا يمكن ان يحدث.
· وفي ناس هاجمونا ..وقالوا الكلام دا ما ممكن ..ودي ما طريقة.
· خلوا كلامنا داك ..وتعالوا شوفوا الكلام دا.
· الكلام دا لا جبناه من تمرين ..لا من ونسة واتس آب.
· كلام كتبه رئيس تحرير صحيفة الصدى فى عموده امس.
· انظروا ماذا كتب مامون ابوشيبة الذي اعلن عن (تواطؤ) رسمي في مباراة المريخ والاتحاد ودعا اليه وحبب فيه.
· ولا كضب.
· ولا رمش.
· لم يجد الاخ مامون ابوشيبة حرج في ان يرسم (سيناريو) المباراة وان يصل حتى لحكم المباراة لتخرج المباراة بالشكل الذي يريده المريخ دون ان يتعرض لاعب للايقاف او الكروت الملونة.
· ألا يعلم ان هذا الذي يروج له ابوشيبة وينادي به وان سماه (اتفاق حلال) هو (تواطؤ) …وتواطؤ من امو كمان.
· الناس ديل بقوا يعملوها عديل كدا.
· واضحة وظاهرة ولا بدسوها.
· ديل وصل بيهم الحد ان يصفوا هذا (التواطؤ) الذي دعا ليه مامون ابوشيبة بانه (اتفاق حلال).
· لو الحلال كدا …الحرام يبقى كيف؟.
· ابوشيبة طبعا الحاجات البتكون بتتوافق مع المريخ كلها بسميها (حلال) حتى لو كانت في شكل ذلك (التواطؤ).
· حلال ..حلال ..حلال.
· والحاجات التى تكون في صالح الهلال وان كانت شرعية هي عند ابوشيبة (حرام).
· حرام ..حرام..حرام.
· وثكلتك امك.
· وهي الحرب اذن يا ابوجهامة القزعي.
· يا حزامة أمُر جيشك ان يتحرك نحو وادي الشيقلوان.
· هناك سوف نضع حدا لهذا الامر.
· ربما ابوشيبة يختلف عن الجميع في صدقه ونوايا دواخله نحن نعرف ذلك..لذلك هو يتحدث بصدق ..فيكشف ما يمكن ان يحدث وما يمكن ان يكون.
· يكشف ليك اوراق الجماعة وان كانت (نوايا).
· تعالوا نشوف ابوشيبة قال شنو؟ ..ونعلق على كل مقطع بي رواقة كدا ..ويا ريت كدا ناس قوون يدوني (موسيقي تصويرية) مع كل مقطع ..ترن ..ترررن ..ترن.
· الموضوع دا خطير ..ومحتاج ليه لي (موسيقي تصويرية) زي موسيقى مسلسل (رأفت الهجان).
· يقول ابوشيبة في عموده امس …(في صورة منو مرفقة مع النص)…لا مريخاب الجنوب ولا سكرتير اتحاد القضارف.
· بالصورة والمستند الرسمي.
· ابوشيبة كتب:
· (من مخاطر مباراة الجمعة الكروت الملونة والتي يمكن أن تفقد الفريق لاعبين أساسيين في ذهاب نصف النهائي يوم 25 سبتمبر باستاد المريخ (غالباً مع الهلال) وربما امتد الفقد لجولة الإياب في الثاني من أكتوبر).
· شفتوا الجماعة ديل خايفين من الهلال قدر شنو؟.
· من هسع برجفوا ليك (انظر من الغلاف للغلاف).
· بذكروني ليك الزول الببلع ليك حبوب الملاريا قبل ما تجيه الملاريا – يقول ليك عندي احساس كدا ح تجيني ملاريا عشان كدا احسن ابلع ليها حبوبها من بدري.
· ويقول ابوشيبة:
· (ومن المخاطر أيضاً تعريض اللاعبين للإرهاق والإصابات.. علماً إن عدداً كبيراً من اللاعبين الأساسيين تعرضوا لإصابات متفاوتة في المباريات الأخيرة وآخرها مباراة المنتخب في الجابون حيث أصيب أمير كمال، وربما تكون إصابة رمضان عجب قد تفاقمت بعد إشراكه في مباراة الجابون وهو مصاب).
· واضح ان ابوشيبة مشكلتو مباراة المنتخب ..(واضعها في رأسه).
· يا ابوشيبة قول امير كمال ورمضان عجب اتصابوا في مباراة المنتخب ..في (شرف اعظم من ذلك).
· دي اصابة السرور البتكون من اجل الوطن.
· ونذكرك يا ابوشيبة ان مالك برضو اتصاب في المباراة وقد فشل في اكمال المباراة بسبب اصابته.
· وهذا يعني ان الهلال قد يفقده في مواجهته المصيرية – علما ان مساوي ايضا مصاب.
· جماعتكم عاوزين يعملوا مباراة المنتخب امام الجابون سبب في (الارهاق) – خلاص عاوزين يفتشوا ليهم (شماعة).
· بفتشوا (الشماعة) من الآن.
· وابوشيبة بقول:
· (من مصلحة فريقي المريخ والاتحاد عقد اتفاق لأداء مباراة تأتي في إطار اللعب النظيف، ويمكن أن يتفقا حتى على نتيجة المباراة لتنتهي بالتعادل السلبي أو التعادل الإيجابي 1/1 دون أن يفقد أياً من الفريقين لاعباً ببطاقة ملونة أو بالإصابة.. بل يمكن التحدث مع الحكم في الاجتماع التقليدي ليعلم إن الفريقين تأهلا لنصف النهائي، ونتيجة المباراة غير مؤثرة ولا يريد الفريقان فقدان لاعبين بالبطاقات الملونة.. مع وعد الحكم بأن المباراة ستأتي في إطار اللعب النظيف).
· لعب نضيف شنو يا ابوشيبة بعد كلامك دا؟.
· اتفاق على نتيجة المباراة لتنتهي بتعادل سلبي او تعادل ايجابي 1 / 1 ..وتقول لي (لعب نظيف).
· يا راجل …هو انتوا اللعب النظيف عندكم كدا؟.
· طيب اللعب الما نظيف كيف؟.
· بنسأل بس.
· بنسأل …عاوزين نعرف.
· مباراة يتم فيها حتى تحديد (النتيجة) وتأتي تحت اطار (اللعب النظيف).
· دي معقولة.
· ويقول ابوشيبة:
· (إذا حدث مثل هذا الاتفاق يمكن بعدها للمريخ إشراك اللاعبين الذين يحملون إنذارات مع الالتزام بالاتفاق مع المنافس وحكم المباراة وهو المصري جهاد جريشة وهو رجل مؤمن وتقي لا نحسبه سيرفض الخير للفريقين).
· جهاد ابوجريشة رجل مؤمن وتقي ولن يرفض مثل هذا (الاتفاق) …اكيد عشان المريخ بلعب في سبيل اللـه كدا.
· بلعبوا في الدولة الاسلامية.
· يا ابوشيبة واللـه الكلام دا تقولوه لحكم المباراة او المراقب او تلمحوا بيه ساكت ..إلّا ينزلوكم الدرجة التانية.
· يوفنتوس نزل!!.
· في حكم مؤمن وتقي كمان ..بقبل بالكلام البتعملو فيه دا.
· يا عالم.
· طيب لو كان ما مؤمن وما تقي بعمل شنو؟.
· نحن بنسأل بس.
· لو كان (لامبيتي) كدا – شن بسوي.
· ويقول ابوشيبة:
· (إذا لم يحدث مثل هذا الاتفاق الذي اقترحناه فلا سبيل أمام المريخ سوى ابعاد جميع اللاعبين الذين يحملون إنذارات واللعب بالصف الثاني.. وتقبل النتيجة بصدر رحب إذا خسر الفريق لا قدر اللـه).
· اقول ليكم حاجة يا ابوشيبة لو خسرتو لا قدر اللـه…اشتكوا.
· يعني انتوا بتغلبكم (الشكوى).
· اشتكوا احسن ليكم من (الجرجرة) دي.
· ابوشيبة في عموده ايضا .اعلن بصورة واضحة ان مجلس المريخ هو الذي فوض الجماهير لتتخذ ما تراه مناسبا.
· يعني يا مزمل الكلام دا ما تنكروه ورئيس تحرير اعرق صحيفة مريخية والاكثر انتشارا يقول في عموده : (جاءت قرارات اللجنة المنظمة الصادمة للقواعد المريخية برفض شكوتي النادي.. ليصل التوتر حد الإنفجار وانعكس ذلك في القرارات الخطيرة التي اعلنت في التنوير الصحفي لإداريي المريخ.. وأخطرها مطالبة جماهير المريخ باتخاذ ما تراه مناسباً للدفاع عن ناديها وحفظ حقوقه).
· ابوشيبة يقول ان اخطر قرارات اداريي المريخ مطالبتهم لجماهير المريخ لاتخاذ ما تراه مناسبا للدفاع عن ناديها وحفظ حقوقه.
· دعوة صريحة للبلطجة والخروج عن السلوك القويم.
· ولا برمشوا.
· ابوشيبة طبعا الفي قلبو في قلمو ..لا بدس ولا بعرف اللف والدوران بقول الحاجات عديل كدا.
· عشان كدا دائما بكشف لينا اوراق الجماعة ..وبورينا الجماعة ديل بفكروا كيف؟.
· ابوشيبة بفكر بي صوت عالي…نحن نحترم فيه وضوحه ونقدر ذلك ..ولم نفعل اكثر من التعليق على ما يكتب الاخ مامون ابوشيبة.
· يا ابوشيبة اقول ليكم حاجة – انتوا شغلكم دا جرسة عديل كدا من الهلال الذي لم يتأهل حتى الآن للمربع الذهبي.
· ما عارف وقت يتأهل تعملوا شنو؟.
· يا ابوشيبة كشفت (الجرسة) واللعب النظيف …ناسكم ديل اتاريهم كانوا بنفخوا ساكت.
· عاوز اسألكم سؤال اخير كدا قبل ما امشي على (الهوامش) وارسل العمود وانتهي من الموضوع دا.
· برشلونة؟؟.
· برشلونة مالها؟.
· برشلونة بتعمل البعمل فيه المريخ دا.
· يعني (اللعب النظيف) عند البارسا زي اللعب النظيف عند ناس مامون ابوشيبة.
· الزول بيسأل بس.
· بقى عندنا شك في (اللعب النظيف).
· ……….
· ملحوظة : اللعب النظيف طلع اي كلام يا رجالة.
هوامش
· مازدا تلاتات ..رقوه بقى مازدا اربعات ..بدون حياء وبدون خجل طلع يهاجم في نزار حامد في البرلمان.
· يعني مشكلة المنتخب بقت في عدم سفر نزار حامد.
· واللـه ما قايلين نزار حامد خطير للدرجة دي.
· مازدا طلع ليه بي مرتب وحوافز من البرلمان ..اكيد بعد كدا يتخلي من المنتخب.
· خلاص لقى ليه (حنفية) اخرى.
· وبهاجم كمان في نزار حامد.
· يا راجل شوف ليك شماعة تانية.
· البتعمل فيه دا ما شغل (برلمان).
· شغل (الفة) ساكت.
· همد ومتوكل أحمد علي مفروض السلطات تدعيهم للتحقيق.
· الدعوة الصريحة الى ابورسعيد اخرى وداعش ..يجب ان يحاسب عليها مجلس المريخ.
· الاتحاد العام اذا استجاب لهذه الضغوط ..يعني ذلك ان الاتحاد يفتح ابواب الفوضى والارهاب على مصراعيه.
· ما في حق بيأخذوه بالجماهير.
· ولا بالضغط الاعلامي.
· اذا لان الاتحاد وخضع لجماهير المريخ …يبقى اللـه يستر على الموسم الرياضي.
· احسن تبطلوا كورة اذا ما قادرين تنفذوا القوانين واللوائح.
· مباراة الغد يجب ان يكون الحضور الشرطي فيها كبير.
· اعلام المريخ (نفخ) في عواطف الجماهير.
· والثمن يمكن ان يدفعه المريخ في حالة اي تفلتات يمكن ان تحدث في المباراة.
· …………….
· عاجل : اذا كان ابوشيبة بكتب عن اتفاق في مباريات افريقية – ترى كيف هو الحال في الممتاز عندما يكون الطرف الآخر لا تهمه نتيجة المباراة ..فيها برضو (اتفاق حلال).

تعليقات الفيسبوك

تعليقات

مقالات ذات صله

الرد

لن يتم نشر عنوان بريدك الإلكتروني. الحقول الإلزامية مشار إليها بـ *