د.عادل الصادق المكي : هدى عربي.. و.. مية ناقة مهر

د.عادل الصادق المكي  : هدى عربي.. و.. مية ناقة مهر

من الأخبار التي استوقفتني الأسبوع.. الفايت.. سحب مجلس المهن الموسيقية البلاغ المفتوح في النجمة الصاعدة بقوة هدى عربي.. وقالو فيهو إنها بتغني بدون ترخيص.. وجا على لسان رئيس الاتحاد أو المجلس أو النقابة.. إنو سحبوهو لأن الأستاذة هدى جات واتعضرت وقالت تاني من بتغني إلا تطلع الرخصة العامة للغنا.. وإنها طلعت ملتزمة وح تمشي فوق العجين وما تلخبطوش.. وتمشي زي السكة حديد.. طيب يا ناس المهن الموسيقية مش كان ترسلو ليها قبال البلاغ وتجيبوها وكانت ح تقول نفس الكلام.. شيل الحال والبوليص والجرجرة لزوما شنو؟ من اللول؟ صراحة النضم دا ما داخل راسي.. لكن برضو بارك الله فيكم العفيتوها وبقيتو أخير منها!! المواهب الزي هدى ما بيكسروها بيساعدوها وبياخدو بيدها.. بشجعوها.. واللا نضمي دا كيفنو ليكم؟
في الأخبار أيضا.. صدور قرار بإيقاف غنية ندى القلعة خبر الشوم.. نان بعد شنو؟ بعد ما السودان كلو حفظها صم؟ صغار على كبار؟ أها عاد أبقوا عشرة وبارو حفلات القونات.. القونة من ديل.. تشل دلوكتها وتهبكها “وخبر الشوم وخبر الروم”.. وناس خبر الشوم يجبجبو.. وتختمها بالختمة المسموح بها ختمة “ورا.. ورا” وتشكك أي زول في الحفلة في إمكانياتو.. تشتكوها تقول لكم “يخربني الخط ما بفكو.. لا بقرا لا بكتب.. دلوكتي وراسي دا أحفظ وأجي أغني.. ويطرشني ما سمعت بقراركم دا”..
في الأخبار برضو.. استدعاء الأستاذ طه سليمان.. وتحذيرو من الغنا الهابط.. وطه قال لهم من إيدكم دي لي إيدكم دي.. وأشادو بيهو.. لكن عليكم الله استثنو غنية (لا حول الله).. الغنية دي سمحة والله.. شخصيا عاجباني بتخيل إنهم قبضو ليهم حرامي ومتلمين فيهو، وكل زول داير يتفرج في الحرامي.. “ما عارف الناس بحبو يتفرجو في الحرامية ليه؟”.. زمااااان في سوق أمدرمان قبضو نشال.. وكنا تلامذة صغار معاي صاحبي ما قدرنا نشوفو من الزحمة.. جرينا وراهم والحمد لله ربنا وفقنا وشوفناهو في نقطة البوليص.. لو ما شفناهو كان المغصة شقتنا!!
في الأخبار برضو.. سوداني مقيم في السعودية اسمو (عثمان أبو الطيب).. أها أبوعفان دا قال عاجباهو إعلامية أردنية اسمها (علا الفارس).. وقال داير يعرسها وح يديها مية ناقة من أجود إبل السودان علا سمعت النضم واتعضرت، وقالت حبوبتها موصاية قالت لها أوعك تعرسي برا من أهلك (جد والله قالت كدي).. عثمان.. قال عندو شوية إبل في السودان ويلملم عليهن باقي قريشاتو الفي السعودية ويشتري بيهن نوق يتمهن مية ناقة يوديهن مهر لي (علا) دي.. والله يا أبو عفان عفيت منك.. هيع.. تبيع الوراك والقدامك وتسويهن نياق.. وتديهن لي علا.. وتعرسها وبعد داك الرزق على الله.. إنت عارف يا أبو عفان الرجال السودانيين ديل تلاتة أرباعهم مكسرين في المذيعات والممثلات ديل.. ولو كل واحد ودا مية ناقة نصبح ولا ناقة ما عندنا.. وبعدين يا أبو عفان إنت ما عندك خبر انو تصدير إناث الإبل ممنوع؟!

تعليقات الفيسبوك

تعليقات

مقالات ذات صله

الرد

لن يتم نشر عنوان بريدك الإلكتروني. الحقول الإلزامية مشار إليها بـ *