بابكر سلك : عبد الباسط وصل قبال مازيمبي

> كم أنت عظيم يا مريخ
> وكل يوم يثبت جمهورك إن قدرك عالي جدًا
> فبعد أن طبق أولاد اولتراس الجوارح مقولة لن ندعك تسير وحيدًا على أرض الواقع
> مشياً على الأقدام من الخرطوم الى شندي
> اسمعوا كل الصحاري والبيد وضفاف النيل
> أهازيج الزعيم الخالدة
> وبعد أن أدهش جمهورك لاعبي وفاق سطيف
> وبعد أن زأر جمهورك أمام عزام فانهار في دقيقه ونصف.
> وبعد أن عرف أهل الترجي إن راداس لسه بدري عليهو ليصل مرحلة الشفوت في قلعة الخلود
> بعد كل ذلك
> سطر التاريخ حادثة حب وعشق وجنون
> هاهو الشفت عبدالباسط يتحرك بدراجته مرتدياً لبس خمسة
> مرتدياً لون النار أحمر وأصفر
> قاصدًا بدراجته القلعة الحمراء
> ليشارك في معركة اقصاء مازيمبي..
> بالعجلة وعكس الهواء
> والعجلة عكس الهواء مابسوقها إلا زولاً معطون في الهوى
> عبدالباسط وصل قبال مازيمبي
> أيها الناس
> لسه الحدث ما انتهي
> عبدالباسط لما وصل الخرطوم
> وجد دعوه استضافة بإلحاح من ساس ورابطة العشرة وتجمع الروابط
> كلو زول ماسك من يد متيمن يستضيف عبدالباسط لي يوم الكورة
> ولن ننسى عثمان سيكا عضو رابطة العشرة
> وهو طريح الفراش مكسور ومجبر
> وهو يصر على تكريم عبدالباسط
> نحن في المريخ أكتر من أخوة
> نعشق النجم ونهوى
> ونعشق بعضنا بجنون
> هكذا الشفوت دائمًا
> مبادئ وقيم وتفاني
> ايها الناس
> من اصول الشفتنه ان لايضر العاشق بمعشوقه
> واجبنا هو التشجيع بجنون وفنون وقوة
> لكن نعمل حسابنا
> اي تفلت محسوب علينا
> وعقوبات الكاف ستطال اي نادي يتفلت جمهوره ولا يلتزم بالقوانين
> ومامعقول يصدر قرار يحرمنا من دخول الاستاد لنصرة الزعيم
> لذلك نحذر التفلت
> نحذر التصرفات التي تسئ لنادينا
> نجلب الاحترام لنادينا
> ايهاالناس
> همنا ان يفوز المريخ بالاميرة السمراء
> ويجب ان يقترن هذا الهم بهم آخر
> ليه ما يفوز جمهور المريخ بجائزة افضل جمهور ؟؟؟
> ماصعبه
> يمكننا ان التزمنا القوانين ان نفوز بالجائزه
> وزي ماناس الجزائر في صحفهم قالوا لجماهيرهم يجب ان تتعلموا من جمهور المريخ السوداني
> دايرين افريقيا تعترف لينا باننا افضل جمهور علي الاطلاق
> ويا حبذا لو نافسنا علي جائزة الجمهور المثالي جمهور الهلال
> عشان يشتهر هذا البلد بان جمهوره الرياضي واعي وملتزم ولكنه صعب المراس في تشجيعه
> عشان نبقي مضرب مثل للعالم كلو
> التحية لعبد الباسط الذي صحى فينا قيماً لم تفارقنا ولكنها نعسانة
> أيقظ فينا انتماءًا لم يبارحنا ولكنه شارف على النوم
> اشعل فينا وقودًا ندخره دوماً لدعم الزعيم
> ومعاً للمطار
> بي عجلتك با عبدالباسط الشافك في المطار ما كضب
> عجلة زول جاد ما بتقيف مع أمجاد جمب جاد
> بتخش المطار تووووش
> زي ما دخلت القلوب تووووش
> عبدالباسط احبك
> المهم
> أكتب قبل لقاء الخرطوم الوطني
> أتوقع مباراة رائعة من الطرفين
> الخرطوم الوطني ما ساهل
> لكن خمسة هلال الأبيض ما كتيرة عليهو
> أتوقعها بروفة مطمئنة لإقصاء مازيمبي.
> خاصة وعبدالباسط بي عجلتو في الأستاد من عصراً بدري
> أيها الناس
> بجي اليوم البتتباع فيهو عجلة عبدالباسط في المزاد
> بمليارات
> أشهر عجلة في التاريخ
> أشهر من عجلة الزمن
> عجلة تحتضن إن شاء الله الأميرة السمراء
> حانخت الكاس الأفريقي يا عبدالباسط في العجلة
> ونمشي وراها كلنا
> وقال ليك عبدالباسط من كوستي ما لفة الميزان
> العجلة التقول فيها بوصلة
> ماشة براها على القلعة الحمراء
> أيها الناس
> إن تنصروا الله ينصركم
> أها نجي لشمارات والي الخرتوم
> والينا فرد مطيرة والباعوض مالينا
> يعني لو يومين في الأسبوع بتصب لينا
> كان فحطنا وفرتقنا ولا شنو يا والينا
سلك كهربا
ننساك كيف والكلب أكتر حاجة بتتعبو الضبانة ,,,بقول في سرو الجبخانة ولا الباعوضة والضبانة
والى لقاء
سلك.

تعليقات الفيسبوك

تعليقات

الرد

لن يتم نشر عنوان بريدك الإلكتروني. الحقول الإلزامية مشار إليها بـ *