د. عادل الصادق المكي : أريتا زنقة العدو

ابتلاني الله بأن أكون من مصاقري قنواتنا الفضائية.. أزح من قناة لي قناة.. ألقى ناس ينضمو في السياسة نضم لا بيودي ولا بيجيب.. أمشي شوية ألقى واحد يتعصّر ويغني في غنية لا تعرفها حب ولا تعرفها مناحة.. من العصير البتعصرو ايدك فوق قلبك ما تحصل لو نصيبة.. أمشي شوية.. قناة تانية ألقى جماعة متلمين وينضمو في الثقافة أعاين لهم مسافة من عامني قايل نفسي مثقف أسمعهم شوية كدا وما أفهم التكتح اكتشف انو الثقافة في الشرق وأنا في الغرب وتاني أصلو لما يجيبو طاري المثقفاتية ما اتنفخ وأعمل نفسي معاهم.. يقعدو ولا يتلفتو وبيجيبو مفردات ويلصقوها مع بعض ويقول ليك كان راجل أعرف دي شنو؟.. أزح منها لقناة غيرها ألقى شيخ وواحدة تشتكي من راجلها بالتلفون وهو يهدي فيهم.. ومرات هداية يقرب يقول لها “انتن زااااااتكن تلملمن تعرسن في الكرور.. أها خُمي وصُري”.. أزح منها ألقى زول يمدح.. أزح منو ألقى تلاتة وشمطة قايمة والفساد والفساد والفساد.. الغريبة فيهم ناس هم والفساد أصحاب ويجو يشتوموهو لينا في التلفزيونات.. ناس ما عندها خوة.. ولا عندها عُشرة!! أزهج قاعد أمشي علي (توفيق عكاشة).. توفيق عكاشة صاحب ومدير ومقدم برنامج وضيف في قناة الفراعين المصرية حقتو من عرق جبينو.. قدر ما تفتحها تلقاهو ينضم.. لا يكل لا يمل.. مرات يجيب مقدمة برنامج اسمها (حياة).. ويختها قدامو ويقعد ينضم.. وهي شابكاهو (اهـــ.. اهــــ.. طبعا طبعا) آخر حلقة شفتو هي مسكينة اظنها القعدة والمصاقرة طولت قعدت تتململ في الكرسي.. قال لها “قرى ايه يا حياة ألأنة ليه؟”.. يعني في شنو يا حياة قلقانة مالك قالت ليهو لا قلقانة لا حاجة بس ضهري وجعني من الكرسي.. قال ليها نغير لك الكرسي.. قالت ليهو لا نطلع نشوف التقرير دا ونرجع.. قال ليها لا اتم كلامي.. وقعد ينضم وهي مسيكينة تتحرقص شكلها (محصورة).. زنقة العدو.. وهو ينضم ودايرها تنتبه.. لكن حياة غلتانة داخلة برنامج مع توفيق عكاشة ما تشرب موية خالص.. توفيق زي البصات السياحية.. اقرب محل يقيف فيهو بعد تلاتة ساعات.. والله حننتني.. ولو كنت في مصر اركب تكسي وامشي ليهو واشحدو “يا توفيق خسمتك بالرسول بنت الناس دي تفكها.. يمكن ماشة الحمام؟”.. وإن بقى فعلا وجع ضهر من قعدة الكرسي الطويلة اقترح علي (حياة) دي تجيب ليها عنقريب وتكوّع وتقابل توفيق وتخلي ينضم من الليلة لي باكر وتشبكو “صُح.. صُح.. نضمك صُح”.. توفيق عكاشة عندو المقدرة يتكلم في أي حاجة.. من البعوضة لحدي امريكا.. شفتهم جايبين شريط ينضم فيهو مسجل شهر سبعة قال شهر تسعة ح تحصل نصيبة في السعودية.. وناس القناة كتبو لينا حصلت يقصدو سقوط الرافعة في مكة.. وقال السنة الجاية الحج ح يتلغي مافي حج كلوكلو.. تب.. علا رمضان ما جاب طاريهو وما ادانا رايو فيهو السنة الجاية في واللاّ مافي؟!

تعليقات الفيسبوك

تعليقات

الرد

لن يتم نشر عنوان بريدك الإلكتروني. الحقول الإلزامية مشار إليها بـ *