د. عادل الصادق المكي : أخبار اللحم حول العالم

أم درمان:
قبال يومين شوهد شاب مخستك.. يسك كلب في أم درمان ويلحقو ويكتلو.. ويعلقو في صينية المهندسين بأم درمان.. ويسلخو.. قدام أعين الجمهور.. نص النهار.. تحت شعار “كيف تسلخ ضحيتك”. ناس البوليص لحقوهو وضايروهو.. قطع شك الشاب دا شاف زول قبال كدي ضبح كلب وسلخو.. وكان صبرو عليهو شوية كان جاب مكرفون وقعد يكورك “الضان بي خمسة وأربعين”.. قبال كدي السنة الفاتت قابضين كلب مسلوخ في الخرتوم.. لحقو اللحم غايتو.. لكن الجلد والراس والكوارع اشتروهن جماعة.. لي حسي لا لمو فيهن.. ولا لمو في الجماعة!!!!!.. في دلوكة حايمة في الفضائيات السودانية دي.. شايف لي جلد مشدود فيها.. شاااااااكي يكون دا جلد الكلب الكايسين ليهو..!!!!
بكين:
من ناحية أخرى طارت إلينا أخبار من الصين.. أن زوجة زهجانة من زوجها.. باللوال كانت قاعدة تدقو.. لقت الدق ما جاب نتيجة معاهو.. قامت بقتله.. وتقطيعه إربا إربا.. وسلقو في حلة بريستو.. بنية تقديم الرحمتات لفقراء تلك الديار المكتظة بالسكان.. قالت أصلو وقت ما منو فايدة في الدنيا، تقدمو لي دارا ماها دي.. لعل وعسى في ميزان حسناتها.
القاهرة:
جزار.. قتل مرتو.. قطعها.. وباع لحمها في محل الجزارة.. أحد الزبائن اشترى نص كيلو وقال يمشي يهيص بيهو.. شك في اللحمة.. بلغ.. جو ناس البطري وناس البوليص.. اكتشفو إنو لحم المرا ملخبط مع اللحم التاني.. بس إن شاء الله يكون عندو ذمة وباعها عجالي.. ما يكون غش الزبائن وباعها ضأن.
كنشاسا:
تنظر المحاكم في قضية غش تجاري.. عندما قام أحد مواطني البلد دي بفتح بلاغ.. ضد جزار.. بأنو غشاهو.. لما المواطن مشى ليهو وقال ليهو أوزن لي اتنين كيلو لحم قرد من الفخدة (عليكم الله القرد دا حسي، النطيط البي ينطط فيهو دا بيدي فرصة لي فخدة تتربى؟).. المهم الجزار وزن ليهو.. ومشى البيت.. مرتو في البيت اكتشفت إنو دا لحم ماعز.. حمرت فيهو وقالت ليهو “سجمك غشوك.. يععععععععع.. دا لحم ماعز ما لحم قرود.. نحن نسوي عليك كيفن؟ نجدعك في البحر؟ ديمة يغشو فيك” اتحمق الزوج وفتح البلاغ.. الجدير بالذكر أن كيلو القرود بما يعادل سبعة دولار.. بينما كيلو اليعععععع الماعز بما يعادل دولار وااااحد.. غايتو الله لا قسم لي معايش في بلد زي دي.. ما خايف من أكل لحم القرود.. خايف علي تولا.. حسي زول بياكل قرد، باقي لكم إن اتضايق ما بياكل زول؟.. وياكلوني ويجي خبري هنا.. الناس البيموتو نعيهم في الجرايد.. (إثر علة لم تمهله طويلا).. (مات بعد صراع مع المرض).. (راح في حادث مرور).. ولو ماتوا برا سوف يصل الجثمان غدا الساعة كدا.. وأنا النعي حقي يقولو الذي أكلوهو السحاحير؟؟؟!!!!!

تعليقات الفيسبوك

تعليقات

الرد

لن يتم نشر عنوان بريدك الإلكتروني. الحقول الإلزامية مشار إليها بـ *