د. عادل الصادق المكي : الجن الفقيرو من هايتي

ذكرت بعض الدراسات.. إنو أي زول بيشوف أخبار في التلفزيون بيشوفها كتير وحريص عليها.. دا زول نفسيا ما إياهو.. في ناس حريصين جدا علي سماع الاخبار ويفرحوا لما يسمعوا خبر من العيار التقيل.. فيهو موت.. أو دمار.. أو أضعف الإيمان محاولة اغتيال شخصية كبيرة.. أما لو كانت النشرة عادية تلقاهو زهج وقام مشى وينقنق: “الليلة ما فيها أي حاجة.. أخبارهم بقت بايخة.. وزي الزفت.. رئيس قابل رئيس.. واجتماع وين ما بعرفو.. ووزير خارجية قال.. جني وجن النضم ساكت..!!!”.. أما لو سمع خبر كعب فتلقاهو اتبسط وختّ ليهو سفة وكوّع سمح..!!!!.
الأخبار بقت كلها موت وتفجير.. وعادي جدا تسمع مية ماتوا ميتين ماتوا.. وكأنو المات دا جراد.. ما ناس.. كل الناس بقت نفسيا ما إياها..!!!!
الحياة ذاتا مع التطور بقت تجنن ما نشرة الأخبار براها.. تركب طيارة إيدك فوق قلبك لمن الطايرة تنزل ترك، تكابس تلقى حجز وعارف إنك حتكون بين إيدين القدر ممكن في أي لحظة تقع لخطأ بسيط.. تركب عربية تقعد تسب وتسخط لي ناس الشارع لا تخلي سواق ولا زول ماشي بكرعيهو ولا غنماية ولا كديسة قاطعة الزلط.. وعشان تضغط زيادة تتعطل عليك في نص الكوبري ونص النهار والشمش حارة.. ما تلقى زول يلز معاك.. وما تقدر تمشي تخليها..!!!..
إن خليت المرقة وقعدت عند أهلك، تكون قاعد في أمان الله ناس “ناسا” يقولوا ليك بكرة في كويكيب داير يقع في الواطا.. تقعد تحارس وتهم ما يقع فوق راس بيتكم..!!.. وناس ناسا الله يدينا خيرهم كل يومين يقولوا لينا في نصيبة جاية من السما واقعة.. يخلونا حايمين وخاتين إيدينا في نص قنايقنا عشان نغطيها..
وخبر من عالم فيزيائي إسمو “هوكنج”.. أدانا بشارة الرحمة وقال في مخلوقات فضائية جاية.. إن ما الليلة باكر.. وما بتخلي جنس بشر قاعد في الواطا.. عشان كدا حقو البشر يشوفوا ليهم كوكب تاني يتكاملوا عليهو.. تقعد تفكر إنو الخواجات حيلقو كوكب يمشو عليهو.. ويخلونا نحن وراهم والمخلوقات تجي تعدمنا نفاخ النار.. و”هوكنج” القال النضم دا يعتبر أحسن عالم فيزياء على الكرة الأرضية.. يعني نضمو ما نرميهو البحر.. نبقى فرسان وشدعان ونرجا الراجيانا.. ونعصر علي غنية الكابلي “لا بيزح ولا بي يتُر.. قدام العينهم خُدُر”.. أها دي حالة تخلي لي زول عقل؟.. إلا زولا قلبو ميت.. لكن ميتة القلب أصبحت ضرورة حياتية..!!
تعاين تلقى دعاية محلول للشعر ضد الصلع.. تلقى الزول البي يعمل دعاية للمحلول أصلع.. صلعتو واصلة فقهتو.. وبعد دا كلو نصدق.. وتلقى البلد جت متمسحة بيهو.. أها دي حالة نصاح؟.. زول قدامك صلعتو واصلة فقهتو يقول ليك المحلول دا ضد الصلع تشيل وتتمسح؟؟؟..!!!.. بنياتنا الله يديهن العافية حد ومد يشخبتن في وشياتن.. وجنن الحواجبين جن.. مرة يقرننهن ومرة يرفعنهن فووووق.. ومرة يطيرنهن.. تجي الواحدة مارقة لو ما إنت براك صواميلك حالجة تقول ما نصيحة.. والشعراء يشيلوا ويكتبوا في الشعر!!!!
مافي زول في القرن الواحد والعشرين نصيح!!

تعليقات الفيسبوك

تعليقات

الرد

لن يتم نشر عنوان بريدك الإلكتروني. الحقول الإلزامية مشار إليها بـ *