محمد عبد الماجد : لجنة الاستئنافات زي (برشلونة) بتقلب النتيجة في (5) دقائق

محمد عبد الماجد : لجنة الاستئنافات زي (برشلونة) بتقلب النتيجة في (5) دقائق

لجنة الاستئنافات زي (برشلونة) بتقلب النتيجة في (5) دقائق
• ايام عزام …والترجي و(ضربات الجزاء) البتظهر فجأة كدا.
• فجاة كدا تجيك (ضربة جزاء) طايرة.
• وبدون مناسبة كمان.
• الواحد يكون برة الخط – الحكم يصفر ليك (ضربة جزاء).
• ناس بكري المدينة بخجلوا منها.
• ضفر يتخلع ليك من حكم المباراة.
• الحكم يقول ليهم ألعبوا كورتكم بس.
• بركاتكم يا ناس لجنة الاستئنافات.
• الظاهر اسامة عطا المنان دا (شيخ) ضربات الجزاء.
• فجأة – وبدون مناسبة يحسبوا ليك ضربة جزاء.
• لمن (الاستغراب) يشقك نصين.
• ايام ضربات الجزاء (الهبطرش) ديك …في (تقليعة) ظهرت.
• ما عارفها ظهرت وين؟.
• في الكلاكلة وإلّا في الثورة؟.
• ما عارف بالظبط (التقليعة) ظهرت وين؟.
• التقليعة كانت بتقول المريخ كورتو زي كورة (برشلونة).
• ناس برشلونة طبعا لو سمعوا الكلام دا بقفلوا ناديهم ثلاثة ايام حداد.
• عليكم الله تموا العمود انا عارفكم ح تقولوا دي كبيرة شديد.
• اقيفوا – امشي (اضحك) برة في السهلة وارجع اكمل ليكم العمود.
• اصلو حكاية المريخ كورتو زي (برشلونة) دي كبيرة شديد.
• انتوا قاعدين تلعبوا كورة؟.
• لجنة الاستئنافات دي لو غابت (دقيقة) تلاتة مازيمبي بتظهر ليك.
• لجنة الاستئنافات غابت لحظة – المريخ انكشف.
• مازيمبي خلى ليك الجماعة ريحتهم طير – طير …(من الطيران).
• قاصد ريحتهم مطار – مطار.
• ايام ثلاثية مازيمبي ديك في مريخابي قال مجلس المريخ دا ما عندو (رأس) سايق ليه عشرة بودي قاردات – هو عاوز يلعب مع مازيمبي وإلّا عاوز يركب ليه (صيوان).
• تقول عاوزين ينزلوا ليهم لوري سكر.
• في واحد تاني ..قال لي بدل البودي قاردات – المريخ كان يسوق معاهو ناس لجنة الاستئنافات ديل.
• والله اصلو ما قاعدين يقصروا مع المريخ.
• المباراة كان عادي بتنتهي 3 / صفر لصالح مازيمبي …عادي يقلبوها ليك 1 / صفر لي صالح المريخ.
• ما بتلفتوا..ولا بتغلبهم حاجة.
• ديل قلبوا كورة الامل ..وهلال كادوقلي ..غالباهم كورة مازيمبي.
• بالمناسبة ناس المريخ ديل ح يسافروا عطبرة ..وينتظروا (15) دقيقة في الملعب الى ان يعلن الحكم انتهاء المباراة.
• ح يمشوا يعرضوا مسرحيتهم دي هناك…وإلّا ح يكتفوا بالعرض (الصامت) دا.
• موش بتتكلموا عن القانون.
• سافروا ..وانتظروا (15) دقيقة…وخلوا الحكم بعد كدا ينهي المباراة.
• عطبرة ترحب بكم.
• براكم قلتوا الامل ما انسحب – ابقوا قدر كلامكم دا.
• يلا ورونا شطارتكم.
• ناس الاتحاد من لولوتهم ..يكتبوا ليهم خطاب انسحاب ..يقولوا دا ما انسحاب ..جيبوا لينا خطاب منفصل براهو.
• الهلال والامل لو تابعوا الاتحاد …كانوا لي سنة 2020 ما بقتنعوا بالانسحاب.
• اها ان شاءالله امس تكونوا اقتنعتوا يا ناس الاتحاد.
• ان شاءالله ما يكون في واحد من ناس لجنة الاستئنافات قال ليكم في لاعب من الامل جاء (تاوق) ورجع.
• طبعا الليلة جرايد المريخ عادي جدا تقول ليك في مباراة تألق فيها بكري المدينة.
• والمباراة ما اتلعبت.
• زي حكاية (الصدى) مع (ولاءالدين).
• الشتل الفي الجرايد في الشمالية بقى مافي.
• عشان كدا ح يمشوا يلعبوا في (دنقلا).
• المريخ في كاس السودان مرة في الدمازين.
• ومرة في دنقلا.
• وفي كل المرات بمشوا براهم.
• هسع دي كورة وإلّا (ندوة).
• و
• (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
• حكاية المريخ بيلعب كورة زي (برشلونة) – ضيعت جهود وحقوق (لجنة الاستئنافات) ساكت.
• الكورة الفي المريخ داخليا بتلعبها (لجنة الاستئنافات).
• وخارجيا (اسامة عطا المنان).
• مع شويات (بكري المدينة وضفر).
• ميسي المريخ منو؟.
• ضفر؟.
• علي جعفر؟.
• راجي عبدالعاطي؟.
• ما بقدر احدد ليكم – عشان ناس المريخ ديل عندهم شطحات ..يعني ممكن يقولوا ليك (الريح علي) هو (ميسي).
• بعملوها.
• ميسي المريخ عمكم (سمير فضل) يقلب في النتائج زي الزلابية.
• طيب (ضفر) برشلونة منو؟.
• شوفوا برشلونة دي انا بتابعها منذ ان كان اسمها (نجمة فكتوريا) يا خلف الله ابومنذر ..ما شفت لي فيها (ضفر).
• منذ سيدة فرح…ما لاقينا فيها (ضفر).
• لكن يتخيل لي كدا ..(الفاتح خضر) ممكن يكون (سواريز) مع مراعاة فروق العمر.
• الشبه ظاهر.
• الفاتح خضر اخطر من (سواريز) في تغيير نتائج المباراة.
• ممكن يحولها ليك في (لحظة).
• وناس (نيمار) يتموها ليك طلبات فحص.
• طلبات بتاعة تمثليات كدا – عشان يكسبوا بيها وقت.
• و
• (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
• لكن اتخيلوا الهلال مرر قرار لجنة الاستئنافات هذا …اتخيلوا ح يحصل شنو؟.
• يمين كان حصلت كوارث ..لا يعلم بيها إلّا الله.
• تاني (المطرة) دي تصب قدام عيونا ..ناس لجنة الاستئنافات يقولوا ليك لا ما صبت.
• عادي جدا تاني المريخ يسافر يلعب في الابيض يقوم يخسر من هلال الابيض 0 / 4.
• لجنة الاستئنافات تجتمع …(حتى لو المريخ لم يشتك)…وتنظر لجنة الاستئنافات في شكوى المريخ التى لم تقدم وتقرر اعتبار نتيجة المباراة 2 / صفر لصالح المريخ.
• نقوم نحن (الشفوت) نسأل ليه يا جماعة؟.
• لجنة الاستئنافات تقول لينا اللاعب رقم (11) في هلال الابيض عندو (ملاريا).
• نقول ليهم : لكن الملاريا بتفقد الفريق نتيجة المباراة.
• الفاتح خضر يقول لينا طبعا.
• نقول ليه طيب (راجي عبدالعاطي) دا ما عندو (ملاريا).
• الفاتح خضر يقول لينا ملاريا راجي عبدالعاطي ما (خبيثة).
• ممكن.
• المادة بتقول كدا.
• المادة يعني المال.
• لو الهلال ما اوقف هذا العبث …عادي الحاجات دي تحصل.
• المريخ يلعب في الفاشر امام مريخ الفاشر يقوم يخسر صفر / 3.
• لجنة الاستئنافات تاني يوم تجتمع بي اوامر من اسامة عطا المنان.
• نقول ليهم الحاصل شنو؟.
• يقولوا لينا في مشجع اشتكي – دخل المباراة شرب ليه شاي …(نسى الباقى) عند ست الشاي ..وست الشاي ما رجعت ليه المباراة.
• معقولة.
• هي حصلت كمان.
• هذه المادة في لائحة سمير فضل بتفقد مريخ الفاشر والخرطوم الوطني نتيجة المباراة – عليه فقد تم اعتبار النتيجة 5 / صفر لصالح المريخ العاصمي.
• ممكن تحصل.
• المريخ يلعب مع الاهلي شندي …يخسر نتيجة المباراة 6 / صفر ..(من غير ما يتدخل صلاح ادريس).
• لجنة الاستئنافات تاني يوم تجتمع.
• نقول ليهم في شنو؟.
• يقول لينا عاوزين نشوف لينا مخرج للسداسية دي.
• يقعدوا يفكروا كدا.
• والاتحاد يقدم طلب فحص.
• مع نهاية الموسم يقوموا يقلبوا ليك النتيجة من خسارة المريخ 0 / 6 الى فوز المريخ 6 / صفر.
• نقول ليهم دا شنو؟.
• يقولوا لينا الحكم غلط في نتيجة المباراة عندما كتب تقرير المباراة – ونحن قررنا نعتمد تقرير الحكم.
• ناس الاستنئافات ديل … (عقودات) الزواج لو ما اوقفهم الهلال ممكن يتدخلوا ليك فيها.
• بس يلقوا ليهم اشارة من اسامة عطا المنان.
• بعملوا اي شيء.
• ………..
و
• مجلس الهلال قال كلمته.
• في انتظار ان تقول جماهير الهلال كلمتها.
• وذلك بدعم المجلس ومساندته في قراراته القوية.
• مجلس نادي الهلال عليه ان يعلن منذ الآن انه لن يشارك في الموسم القادم.
• يعني ما معقول الهلال تخلى من لقبه ورفض يلعب ثلاثة مباريات وتمنحه اللقب ..ويأتي يلعب في الموسم القادم.
• نفس البحصل الآن ..بعملوه لينا في الموسم القادم.
• في نهاية الموسم بتحصل نفس الكوارث.
• لاحظو ان قضية بكري المدينة حصلت في الاسبوع الخامس ..وحسموا شكاويها مع نهاية الموسم.
• عارفين انسحاب الهلال وقتها ح يدخلهم في ديون ..ويفشل عليهم الموسم.
• لذلك يجب ان يعلن الهلال انسحابه مبكرا من اي منافسة يشرف عليها الاتحاد العام.
• كورة مع ديل لا بتتلعب ولا حاجة.
• في ظل هذه الاوضاع …بطلوا كورة.
• روابط الهلال وجماهيره الليلة يفترض ان تحتفل بالاغاني والشعارات والعروض.
• و
• (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
• ………..
• السيدة (ل) – لمسح (الضمير) اضغط على (اعادة) المباراة.
• وقرط على كدا.

تعليقات الفيسبوك

تعليقات

مقالات ذات صله

الرد

لن يتم نشر عنوان بريدك الإلكتروني. الحقول الإلزامية مشار إليها بـ *