محمد عبد الماجد : ميسي ونيمار في الهلال بنفرزكم تاني كيف من برشلونة؟

أحمد ميسي دا مرة عمل ليك عملية في (علي جعفر) في تمرين المريخ – علي جعفر دا اهلو (14) يوم بفتشو فيه
قاموا وقعدوا ..وقالوا لي ناس السلطة وقت ما عاوزين تشيلوا (الكاردينال) بعد (الانسحاب) شيلوا لينا (الكسكتة)
مزمل ابوالقاسم جابوا ليك بعد الخبطة في قناة ام درمان مع عبدالباقي الظافر والطيب العباسي …ما عاوز اقول ليكم (اثار) الزلابية ظاهرة عليه
الكسكتة دي لو قعدت تلاتة يوم اضافية في رأس الكاردينال بتجيب ليكم (امير كمال)

الزول وقت يكون لعاب بكون ظاهر….ينزل ليك (لوري البطيخ) قدامك زي (جدول سبعة).
الموضوع دا ولا عاوز ليه (كسكتة).
الكسكتة دي لو قعدت تلاتة يوم اضافية في رأس الكاردينال بتجيب ليكم (امير كمال).
الكاردينال من لبس (الكسكتة) بقى اخطر زول.
الكسكتة دي كانت وين في التسجيلات الماضية؟.
اللـه لا يحرمنا من (الكسكتة).
قالوا ليك ناس المريخ اتحركوا (تحت – تحت).
قاموا وقعدوا ..وقالوا لي ناس السلطة وقت ما عاوزين تشيلوا (الكاردينال) بعد الانسحاب شيلوا لينا (الكسكتة).
الكاردينال حلف …وقال ليهم واللـه ديل (الكسكتة) ما بقدروا يشيلوه…خلوه مجلس الهلال المنتخب الذي جاءت به الجمعية العمومية للهلال.
الكسكتة جابت ولاءالدين.
وابوعاقلة.
وعمار الدمازين.
واحمد ميسي.
و(………………)…شاله المصحح.
الكسكتة خلت ليك الكاردينال يتخذ اقوى قرار في تاريخ الهلال في السنوات الاخيرة وينفذه.
الكسكتة شالت ليك جمال الوالي بي مجلسه.
وشالت نائب رئيس لجنة التسيير.
والامين العام في 72 ساعة.
والكسكتة دي لو قعدت شوية في رأس الكاردينال ..الجوهرة الزرقاء دي في (45) يوم ح نفتتحها.
نحن عاوزين الهلال يهز ويرز مع (الجوهرة الزرقاء).
اصلك ما قصرت في حاجة يا الكاردينال..وريتهم حاجة.
والسر في الكسكتة.
أحمد ميسي لاعب حريف وقادم من المريخ وصغير في السن واسمه (ميسي) كمان.
كل المواصفات (الهلالية) متوفرة فيه.
وقت تسأل منه اي زول بقول ليك واللـه الزول دا الزول القاعد في الكرسي ينزلو ليك في (الواطة).
بفتح من الجرة التانية.
الزول اللعاب بجر الخمسين بالدو.
احمد شيبة قال ميسي دا مرة عمل ليك عملية في (علي جعفر) في تمرين المريخ – علي جعفر دا اهلو (14) يوم بفتشو فيه.
علي جعفر 21 ببلع في حبوب الملاريا – وهو ما عندو ملاريا.
40 يوم علي جعفر بركب مواصلات الكلاكلة وهو ماشي ام دوم.
شهر ونص ما بعرف يرجع بيتهم.
الدرب رايح عليه.
لخبطة شديدة.
زول في التمرين بعملوا فيه كدا – تتخيلوا يعملوا فيه شنو في المباريات في حضور جماهير الهلال؟.
كمان الهلال عندو جمهور.
احمد ميسي ..امس اي زول سألتو منو ..قال لي واللـه الزول دا خطير – الكاردينال طلع فاهم كورة.
طلع عارف اي شيء.
حتى الزميل الحبيب معاوية الجاك شهد بي ذلك – لقيتو ليك في حالة صعبة…انا قلت ناس الهلال ديل خلصو على امير كمال.
ميسي بعمل فيكم كدا ..امير كمال ح يعمل فيكم شنو؟.
معاوية الجاك عاوز يروح فيها.
يشيل ويشكي.
ومعاوية الجاك دا خطير في التقديرات وما عندو نظرية في لاعب بتقع في الواطة.
ومزمل ابوالقاسم جابوا ليك بعد الخبطة في قناة ام درمان مع عبدالباقي الظافر والطيب العباسي …ما عاوز اقول ليكم (اثار) الزلابية ظاهرة عليه.
لكن عاوز اقول ليكم اثار الصدمة واضحة في عيونو.
مزمل ابوالقاسم قرب يعلن الانسلاخ من المريخ والانضمام للاهلي شندي.
شفتوا عشان فصاحتكم دي …الكاردينال السنة دي ناوي عليكم.
فرتكة شديدة.
من ميسي لي امير كمال.
احمد ميسي دا قالوا بطلع (السمنة) من (الباكات).
السمنة ما بطلعها من اللبن.
ابدا…
كلام زي دا ما عندو.
أحمد ميسي بطلعها من (رُكب) الباكات ..تاني يا ناس المريخ الرباط الصليبي عندكم ح يبقى كتير.
ح يكتر.
عنبر العظام …ح تمشوا ليه كتير.
أحمد ميسي (الزبادي) عادي بطلعو ليك من حارس المرمي.
يعني حارس المرمي لو ما قال (الروب) ما بمرق منو.
ميسي ولا بجامل في الحاجات دي.
هو عليكم اللـه لو ما بركة ..زول اسمو (احمد) وفي نفس الوقت اسمو (ميسي).
والشيء الغريب ..الهلال جاب من المريخ وليد علاءالدين (نيمار).
وجاب من المريخ برضو احمد (ميسي).
يعني الهلال بقى فيه ميسي ونيمار.
والاتنين جونا من المريخ.
نيمار جابو البرير وميسي جابو الكاردينال.
صلاح ادريس بقى ما جايب لينا شيء غير (المشاكل).
الموسم القادم …ح تحصل لينا لخبطة في المباريات – الهلال من برشلونة ما بنعرفو.
العجب للناس البحضروا في المباريات في الاذاعة.
ح يتجهجوا جنس جهجهة.
ميسي ونيمار في الهلال.
وميسي نيمار في برشلونة.
شفتوا العلم.
الحمدلله الكاردينال (شفت) سودّن لينا الموضوع وجاب لينا (ابوعاقلة).
ابوعاقلة دا كمان حاجة تانية.
ناس المريخ قالوا ليك الى الآن بفتشوا في الدرب.
زول يقول ليهم شفناهو في الكلاكلة.
وزول يقول ليهم شفناهو في ام بدة.
وزول يقول ليهم شفناهو في الكدرو.
وزول يقول ليهم شفناهو في الصافية.
المساكين قلبهم اتقطع.
غايتو الزول وقت يكون عندو زول رايح ..بعمل اي شيء.
نيمار وميسي في الهلال.
وعشان الموضوع يبقى سوداني خالص – سوداني قاطع ..ابوعاقلة ذاتو جابوه من (ام بدة).
وام بدة هي عنوان السودان المصغر.
فيها ملامحنا كلها – في شوارعها وبيوتها.
غايتو السنة القادمة الهلال من برشلونة بنفرزو بـ (ابوعاقلة).
ابوعاقلة الاسم سوداني ..والقلب حار.
نحن سعداء بهذا الاسم الذي اعاد لنا اسم افتقدناه كثيرا في ملاعبنا السودانية.
اسم حقنا.
ابو عاقلة عديل كدا.
علم واللـه.
ابوعاقلة لاعب بامكانيات مهولة – هذا هو لاعب الوسط الذي نفتقده.
لاعب مع المجهود يمتلك للمهارات – فهو يجمع بين القوة والمهارة.
قوة وجسارة وحوامة ومهارة.
اصلو ما قصرت يا الكاردينال.
انسحاب وتسجيلات مية المية.
ابوعاقلة – لو وجد مدرب عرف يوظف امكانياته فان ابوعاقلة مكانه الاحتراف في الدوريات الاوروبية.
هذا اللاعب سوف يكون مفاجأة الموسم القادم.
ح يعمل نقلة عديل كدا في الكورة السودانية.
وغير كدا ابوعاقلة فصل لينا بين الهلال وبرشلونة.
لكن ابوعاقلة دي ممكن يمشي برشلونة ..(الزول دا امكانياته كبيرة).
اتخيلوا ابوعاقلة في برشلونة.
حتحصل لينا لخبطة تاني.
الهلال من برشلونة ما بنعرفو.
قادر اللـه.
الهلال دا تاني في (النيلين) حقتكم دي ما بتشوفوه.
إلّا في بي ان سبورت.
واللـه نحن ذاتو مفروض ما نلعب في الدوري الملخبط حقكم دا.
مفروض نلعب في الدوري الاسباني.
دوري شغال بـ (الزلابية) دا لا دوري ولا حاجة.
اطلعوا من الممتاز دا.
دا لا ممتاز ولا حاجة.
من مكاسب الهلال الكبيرة ايضا اللاعب (ولاءالدين) وهو لاعب ايضا صاحب اسم مميز وذو نكهة مختلفة.
ولاءالدين ..مثل ابوعاقلة خلى ليك المريخاب يتجاروا من قبل ثلاثة شهور.
قدر ما اجتهدوا واتحركوا عشان يحولوا مساره ما قدرو.
ولاءالدين موهبة مختلفة في كورة القدم السوداني.
نحمد اللـه ان الكاردينال نجح في لملمة كل المواهب.
يا الكاردينال بعد الجماعة ديل عاوزين ليهم (خبرات).
افهموها.
عاوزين لينا خبرات مع بشه والشغيل وكاريكا ومساوي.
خبرة زي امير كمال مثلا.
الهلال اكمل امس اتفاقه ايضا مع مدافع الامل ..مدافع فريق المواقف عمار الدمازين.
ونحن فرحانين بي عمار مرتين.
مرة لأنه جاء من الامل.
ومرة اخرى لأنه يحمل اسم (الدمازين) وهي مدينة حبيبة لنا جميعا.
الدمازين اخيرا يمثلها لاعب يحمل اسمها في الهلال.
كنا سعداء بي محمد حسين كسلا.
الدمازين تظهر اخيرا في خارطة الهلال.
بعد الانتهاء من الملف المحلي ..عاوزين مفاجآت سعيدة في ملف المحترفين الاجانب.
يا الكاردينال مع (الكسكتة) دي …بقينا نعشم في اسماء كبيرة.
من حق هذه الجماهير التى دعمتك ووقفت معك فى اقوى قرار تتخذه ان تفرحه.
تستحق جماهير الهلال ذلك.
وقد كان الكاردينال في الموعد.
…….
ملحوظة : ألحقني يا جمال الوالي ألحقني يا جمال.
هوامش
يفترض ان يصدر مجلس الهلال بيانا يؤكد فيه انه لن يشارك في منافسات الموسم القادم ما لم تحل ازمة هذا الموسم.
يعني ما معقول ..نشارك في الموسم القادم لنصل في خواتيمه لنفس الازمة.
السلطة والاتحاد مفروض يكونوا عارفين موقف الهلال في الموسم القادم.
وكاس السودان في ظل هذه الاوضاع ..ولا تجيبوا سيرتو.
اذا كانت السلطة غير قادرة لأن تحل الازمة يبقى ليس لها ان تجبر الهلال على المشاركة في كاس السودان.
منافسات تدار بهذه الطريقة بعيدا عن القانون لا تشرف الهلال.
مزمل ابوالقاسم امس في قناة ام درمان اثبت فساد الاتحاد واكده.
الطيب العابسي كان حاضرا بالحجة والقانون واللوائح.
اي زول شاف فساد الاتحاد وتأكد منه.
اذا استمرت الاوضاع على ما هو عليه الآن فان الكورة السودانية سوف نشيعها الى (احمد شرفي).
موقف الهلال والامل يتجدد يوميا.
مبروك.
الكبير كبير.
………….
عاجل : الفرق بين الاندية الكبيرة والاندية الصغيرة ..(المواقف).

تعليقات الفيسبوك

تعليقات

الرد

لن يتم نشر عنوان بريدك الإلكتروني. الحقول الإلزامية مشار إليها بـ *