كسكته تحتها فكى

* أكتب قبل مقابلتنا وزامبيا
* وأتمنى ان لايحرج أولادنا النخله
* النخله زعلها كعب
* وما بنرضى زعل النخله
* مشينا ارض أهلنا الشوايقه
* هييييييييع
* أهلنا الشوايقه شلوخهم لا ورا
* أحسن من يبنى الطوف
* والطوف بتبنى لا ورا
* غناهم حنين وطمبورهم حنين
* ورقيصهم برضو لا ورا
* الكورس ذاتو بصفق لا ورا
* غايتو مع لا ورا الكتيره دى
* وكورتنا اللا ورا دى
* الله يسترنا
* لكن شموخ النخل إذا إستمدينا منو الكبرياء بننتصر
* وإذا شحننا نفوس أولادنا من إهرامات جدودنا الفى طرف كريمى بننتصر
* من البركل نستمد الصمود وأمل الصعود ونمشى لا قدام
* أمل الصعود
* ما الصعود
* بكسر الصاد
* جنكم صَعود
* بفتح الصاد
* المهم
* نلعب لى قدام
* ونغنى ونرقص لا ورا
* نصفق لا ورا
* ونبنى الطوف برضو لا ورا
* المهم ننتصر
* برغم فقدان الإعداد
* برغم إهمال أولادنا
* برغم إنو علوق الشدة ما بنفع
* لكن كمان الأمنيات ما بالإعداد
* الأمنيات بالعواطف
* ونحنا ناس عواطف
* وبالعواطف نتمنى النصر الكبير
* المهم
* إتنين فاطين سطر أصحاب شديد
* الناس البفطو سطر ديل ما قاعدين ساى
* برضو بصاحبو وبتونسوا وبسفوا صعود كمان
* عندهم رأى ورأى آخر
* صحيح ممكن يكون عند الواحد فيهم تلتين رأى
* لكن برضو ما بكون فاطى سطر ساى
* بكون فاطى سطر فوق راى
* وأعقل العقلاء بقولوا انو الناس الفاطين سطر ديل هم أعقل الناس
* لأنهم فهموها بدرى
* على الأقل لما الدولار وصل تسعه فطوا سطر
* وقلبوا الورقه
* أسى مقرطين على التسعه
* والله لو عرفوا الليله بى كم
* كان جنوا عديل كده
* المهم
* إتنين فاطين سطر بتونسوا
* جات سيرة زوغة الجماعه ونغمة الإنسحاب
* واحد منهم قال القانون ما بياخذ مجراهو
* لازم لازم لازم تلغى قرارات لجنة الإستئنافات العليا
* وبعدوا الإلغاء تحل لجنة الإستئنافات
* ويدوا الهلال الكاسين وكاس الشهيد فتحى خليل كمان
* وبعد داك يحلو الإتحاد ولجانه مع الإبقاء على لجنة التحكيم المركزيه فقط
* تعيين إتحاد جديد من الأهلة
* مع مراعاة تشكيله من جميع الأهلة الأحياء منهم والأموات
* التانى قال ليهو ده كلو يتعمل؟؟؟؟إنت قايل الكسكته تحتها فكى؟؟!!!
* المهم
* إعادة قيد أولادنا مسألة وكت ليس إلا
* لكن دعم صفوفنا ضروره ما بعدها ضروره
* وأنطونيو ما ملصق فى غارزيتو
* ممكن نتعاقد مع غرزه من دون أنطونيو
* وممكن نفرض على غرزه مساعدين من أولادنا المؤهلين الشطار
* وممكن نعمل حدود لى غرزه يعمل داخلها دون أنن عتدى على تلك الحدود ودون ان يتعداها هو
* لكن إذا خلينا أنطونيو يجب التعاقد مع معد بدنى مهول
* ومدرب الحراس مهم جداً
* فبعد ذهاب حكيم..الحال أصبح لئيم
* وما ضرورى مدرب الحراس أجنبى
* عندنا أولاد فى البلد دى مبدعين جداً فى تدريب الحراس
* والقصة إحتراف
* وممكن تجيب ثيردباك مصرى من أبييى
* وطرف شمال أفريقى من الرنك
* ونجيب أجنبى نسجلو فى كوبر ونستعيره بعد دقيقه من تسجيلو فى كوبر
* لازم ياخذ مجراهو
* أيها الناس
* أين بقية المناشط الرياضيه؟؟؟؟
* أين السله؟؟؟فى السله؟؟؟
* أين الطائرة؟؟؟طيرتوها وين؟؟؟
* أين اليد؟؟؟اليد الواحده ما بتصفق؟؟؟
* أين التنس الأرضى والطاوله؟؟؟
* أين السباحه؟؟؟ولَا سباحة فى شتا ده حاره شديد؟؟؟
* أين نحن؟؟؟؟
* من انتم؟؟؟؟
* من اين أتيتم؟؟؟
* سنخرج مناشطنا
* سنبحث عنها دار دار
* زنقه زنقه
* إهمال إهمال
* فكة عكس الهوا فكة عكس الهوا
* المهم أن نجد مناشطنا ونعيدها لأرض الواقع
* من سرق مناشطنا؟؟؟
* ومن سرق الروب؟؟؟
* السؤال ده بخلينا ندور فى ساقيه
* الدوله تقول أنا ماسرقوا هذا سرقوا
* والوزير يقول أنا ما سرقوا هذا سرقوا
* أعضاء الإتحادات العامه للمناشط يقولوا أنا وأنا وأنا وأنا ماسرقوا هذا سرقوا
* ويبقى السؤال
* من سرق الروب؟؟؟؟؟؟؟؟؟؟
* أيها الناس
* إن تنصروا الله ينصركم
* أها
* نجى لى شمارات والى الخرتوم
* أكان شفت يا والينا
* كنا بى مناشطنا ونشاطاتنا وناشطينا
* أسى مناشطنا دسوها علينا
* خليفه عمر لافى العالم بى شعله مدينه مدينه
* وكيجاب كان فى كندا مشرف لينا
* وناس وليم أندريه والإعيسر ناس جابت كاس العرب بى إيدينا
* والتنس كان لعبه محببه لينا
* أسى يا والينا
* أم الحفر قست علينا
سلك كهربا
** ننساك كيف والكلب لما يتذكر دورى السله بتحسر..يحت قرادوا ويعاين بى طرف عينو للسارينا الوراها برادو؟!
ﻭﺍﻟﻲ ﻟﻘﺎﺀ
ﺳﻠللللللك

تعليقات الفيسبوك

تعليقات

الرد

لن يتم نشر عنوان بريدك الإلكتروني. الحقول الإلزامية مشار إليها بـ *