الفاتح جبرا : الوصايا الذهبية

لا تندهش :
كل ما يثير الدهشة لديك كمواطن قد حدث .. تانى المندهش ليها شنو؟ الدولار فات الحداشر (ألف) جنيه .. والبصلة بقت بي (ألفين) والخمسين ليمونة بي ستين ألف (ضربوها بقى) وصحن الفول بي عشرة ألف .. ياااخ نحنا قاعدين نصنع (طيارات) وبنستورد (الصلصة) على كده مفروض تكون دهشتك خلاس كملت ومافى حاجه تانى تثير الدهشة فيك .

لا تحلم :
الحلمان ليها شنو؟ هو فى زول (ميت) بيحلم؟ وأفرض حلمت غير ما تحلم بى إنك زائغ بالشوارع وواحد لابس أبيض بيطارد فيك وشايل ليهو دفتر إيصالات أو تحلم إنك عاوز تعمل عملية لى ولدك وما عندك حقها .. أو (سيد البيت) طلعك منو عشان ما دفعتا .. ح تحلم يعنى بشنو؟ .. من أجل صحتك وحيلك المهدود أصلا .. لا تحلم !! إذا أردت أن تحلم نوم فى سرير طفلك الصغير حتى تحلم أحلام كرتونية بعيدا عن واقعك المرير !!
لا تلعب :
لأنك ما ح تقدر تلعب مع الكبار والدوليين ديل لأنو أصلا إنت ما عندك مساحه عشان تلعب فيها .. يبقى أحسن ما تلعب ؟؟ هو إنت عندك حيل تلعب بيهو البوش والطماطم ديل ما فيهم أى سعرات حرارية … خلى اللعب لى ناس الحليب البارد وتمر المدينه وفواكه لبنان والخرفان المشوية !! حريفين وبعرفو ليهو كويس .. ممكن غايتو تلعب ليك )عشرة طاولة( بس ما تدمن الشغلانه وتقعد كتير لأنو لو جاتك )بواسير( علاجا براهو عاوز ليهو مليون وشوية !!
لا تتظاهر :
أذا تظاهرت فلا أحد يضمن لك العودة إلى بيتك سالما مع العربات (أم من دون لوحات) ويمكن بكل بساطه أن تصبح )أسماء فى حياتنا( بغض النظر إن كنت تتظاهر فى ميدان أب جنزير أو (ميدان عقرب) أو شارع (الفيل) وبغض النظر إن كان موضوع التظاهر هو زياده أسعار السلع الضرورية أو اليوم الوطنى لبناء السدود ولا تعتمد على إنك بتتظاهر بصورة سلمية معتمدا على الدستور الذى يكفل لك ذلك … فالكفيل الله !!
لا تتردد :
لا تتردد فى قبول أى عمل تجده مهما كان متدنيا ولا يتناسب مع ما لديك من شهادات وخبرة وخلافه فوجود فرصة عمل شريفه مهما كانت أصبحت مستحيلة كما الغول والعنقاء والخل الوفى ، الوظائف يا عزيزي (مكتملة العدد) والجاية (محجوزة) عشان كده لو كنتا (عالم ذرة) ولقيت ليك عقد (راعي) فلا تتردد ووافق طواااالي !

لا تضحك :
الضاحك ليها شنو؟ أمشى كدى أول حاجه شوف )الجمرة( فاضل فيها كم؟ وأدى الأولاد الواقفين ديل حق الفطور والمواصلات وأدفع لبتاع النفايات ده قبلما يودوك الحراسة وجيب لى أم العيال )الراقده سلطه دى( دواء الملاريا … لو فى حاجه تضحك عليها أضحك على روحك !!
لا تأكل :
لا تأكل (حق الناس) لأنو الناس ما عندها حق من أصلو بعدين حتى لو عندها حق فهنالك هيئات ودواوين ومحليات تقوم بمهمة (أكل حقها خير قيام) .. إنت خليك بس فى الفول والبوش والطماطم بالدكوة إذا إستطعت إليها سبيلا أما باقى الأكل فهنالك عباد أختصهم الله بذلك .

لا تتألم :
بالرغم من إنو جلدك مفروض يكون تخن وما فيش حاجه فى الكون مفروض تألمك نسبة لما عانيته من آلام ومعاناة ومصائب أقلها أنك صابر على مرتبك الشهرى الذى يساوى بالتمام والكمال قيمة إيجار المنزل الذى تسكنه بالرغم من ده كلو فحاول الا تتألم لأنو إذا إتألمت أو ما إتألمت مش ح يحس بيك زول وحفاظاً على ما تبقى من مرارتك (لو هي لسه قاعدة) أسمع كلامي وإبتعد من الأشياء المؤلمة حقا كبرامج التلفزيون وتصريحات المسؤولين !!

لا تقرأ :
لا تقرأ لأنو القراية ذاتا بقت مستحيلة لو عاوز تشترى ليك كتاب إلا تدخل ليك (صندوق) ولو دخلت ليك صندوق الناس كلها لأنها متضايقه ح تقول عاوزة الصرفة الأولى وح يدوك الصرفه الأخيرة ولما تصرفها وتمشى تشترى الكتاب ح يلاقيك (بتاع النفايات) فى السكه يشيل منك القروش .. ريح دماغك وأبعد من القرايه بلا قراية بل غم ما من زمان وإنت قاعد تقرأ .. القراية عملت ليك شنو؟

لا تستعجل :
لا تستعجل فالعجله من الشيطان والمثل بيقول تجرى جرى الوحوش غير رزقك ما تحوش .. لكن في هذا العهد الزاهي النضير رزقك ذاااااتو إلأا تكابسو مكابسة !!
لا تتزوج :
أيوه لا تتزوج هسه إنتا روحك دي قادر عليها ؟ خلي الزواج ده لي ناس العقد في (سيدة سنهوري) و مسجد (الشهيد)

لا تسف :
لا تمارس السف فهو مضر بالصحة وبعدين إنتا بالذااات لو سفيت (مافيش تحلل) !

كسرة :
لا تسأل : لا تسأل عن موضوع الجمارك… عشان القصة (ماتت) .. ما تخليك زول (سغيل) !!

سرة ثابتة (قديمة):
أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+(وووو)+(و+و+و+و)+و+(و)
كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووو) +(وووو)+(و+و+و+و)+و+(و)

تعليقات الفيسبوك

تعليقات

الرد

لن يتم نشر عنوان بريدك الإلكتروني. الحقول الإلزامية مشار إليها بـ *