محمد عبد الماجد : بلاك (النجمة) لا بتتعلى لا بتتدلى فوقها (هلال)

ناس الطيب مصطفى قالوا لينا الحكاية دي ممكنة – عادي جدا يكون في شمال بدون جنوب …وجنوب بدون شمال
“”””””””””””””””””””””””””””””””””
الليلة عاوزين تجيبوا المريخ براهو في استاد الخرطوم زي (الصينية) الما فيها (رغيف)
“””””””””””””””””””””””””””””””””””””
هل نحن هنا عندنا الى ذلك الزمان – الذي لم يبق فيه من القانون غير (القانون لازم ياخد مجراه)
“”””””””””””””””””””””””””””””””
الطريفي هو نائب رئيس اتحاد كورة القدم السوداني الذي تقلص دوره في (الرد على التلفونات)
“””””””””””””””””””””
• اتربينا وقمنا على منهج دراسي بقوم على (ما في شمال بدون جنوب وما في جنوب بدون شمال).
• جينا الخرطوم اتصدمنا بالواقع.
• جغرافية جديدة علينا.
• اتغيرت لينا كل شيء حتى (صحن الفول).
• ناس الطيب مصطفى قالوا لينا الحكاية دي ممكنة – عادي جدا يكون في شمال بدون جنوب …وجنوب بدون شمال.
• في شاي بدون شاي؟.
• قهوة بدون بن؟.
• كهربة بدون تيار؟.
• في نيل بدون موية؟.
• صدمتونا ..ونفطوا مشاعرنا.
• طلعنا من عيونا بي (هدوم المدرسة) – والوجعة تشعبط في رقبتنا.
• حكاية منقو قل لا عاش من يفصلنا طلعت كلام ساكت.
• كلام جرايد ساكت.
• كلام كتب – مدارس.
• فصلونا.
• وفي هلال مريخ لحقونا.
• نتواق للوجعة متل حمل ام الحسن البلاوي.
• مشينا معاكم شوية – لقيناكم عاوزين تعملوا لينا هلال بدون مريخ …ومريخ بدون هلال.
• ونحن ما اتعودنا على الحكاية دي.
• من قمنا الثنائية كانت عندنا ممثلة في هذا التوحد (الهلال والمريخ).
• حمد والديبة – وجمال ابوعنجة وابراهومة.
• بريمة والنقر.
• والي الدين والضو قدم الخير.
• حداثة وابراهومة.
• دا شنو؟..لخبطونا – دخلت غلط.
• رجعت تاني.
• لقيت الشارع رجع.
• فترت نعلينا.
• محمد وردي في (اقابلك) بقول (بلاك النجمة لا بتدلى لا بتتعلى فوقها هلال).
• الهلال دائما (فوق).
• نحن كدا.
• فوق بس.
• ما بنقبل بي اي لولوة وكسير تلج.
• الليلة عاوزين تجيبوا المريخ براهو في استاد الخرطوم زي (الصينية) الما فيها (رغيف).
• زي الكسرة البدون ملاح.
• حيرتونا.
• ان شاءالله ينور ليكم.
• والحكاية عندها معنى تاني ..وقصد براهو.
• مازال يبقى في الذاكرة ذلك الحوار الذي دار بين عبدالبديع العربي وفاروق الفيشاوي في احدى المسلسلات المصرية القديمة.
• = كلام اخوك الكبير يا صير يا حسنين.
• – ليه يا ابوي؟.
• = لأنو اخوك الكبير يا حسنين.
• حسنين كان فاروق الفيشاوي اما الاخ الاكبر فقد كان (نبيل الحلفاوي) وهو افضل من يقوم بدور (الصعيدي) في الدراما المصرية.
• بتقطع في الدور زي اسامة عطا المنان.
• هل نحن هنا عندنا الى ذلك الزمان – الذي لم يبق فيه من القانون غير (القانون لازم ياخد مجراه).
• عندما تسمع هذه العبارة اعلم ان القانون فارقكم فراق (الطريفي) لي جملو.
• وقعت سنونا.
• والطريفي هذا هو نائب رئيس اتحاد كورة القدم السوداني الذي تقلص دوره في (الرد على التلفونات).
• وفي بعض الاحيان يقوم بكتابة (التهاني).
• هذا كل ما يفعله نائب رئيس اتحاد كورة القدم السوداني.
• اما الرئيس فاننا لا نشهد له بوجود وحضور إلّا في (طائرة) جمال الوالي عندما تكون متجهة الى بيت الله الحرام.
• ليبقى اسامة عطا المنان وحده.
• يقرر ..ويخطط.
• ويهندس.
• ويجيبها من فوق.
• ثم يأتي مجدي شمس الدين لاخراج السيناريو المرسوم.
• زول الله ما اداهو اكتر من ان يكون الرجل الثاني.
• ما اكتر من (سكرتير).
• 20 سنة سكرتير ..لو الزول حرس ليه (ضفة) المدة دي كلها الضفة تزهج منو.
• هذا كل عهدنا بكورة القدم في السودان.
• لم يعد في الكورة شيء – حتى نتحدث عنه – منذ اكثر من سبعة شهور ونحن نتحدث عن قضية الامل.
• سبعة شهور والحديث عن قضية بكري المدينة.
• ضرب ليه حكم بونية.
• بالله شوف نحن متخلفين كرويا كيف؟.
• لغاية الآن بنتحدث عن قانون اللاعب لمن يضرب ليه حكم (بونية).
• دا (الفطير باللبن) ذاتو البجيبوه ليك بدون مناسبة.
• العالم اتقدم.
• كورتنا بقت كدا.
• من اللجنة المنظمة الى لجنة الاستئنافات ..(من القون للقون)..يسافر مجدي ثم يعيد بالمزيد من (النثريات).
• ويحسب اسامة عطا المنان عوائد تذاكر رحلة المنتخب الوطني.
• هؤلاء هم.
• كل احلامهم – كل مطامحهم اضحت مختصرة في احلام شخصية واهداف خاصة.
• اسامة عطا المنان بقى اهتمامه بالمنتخب الوطني في حدود ارباح وكالته التى تخرج من رحلات المنتخب.
• من اجل ذلك حتى مباريات المنتخب الداخلية اصبحت تنقل الى (كريمة).
• اما مجدي شمس الدين فهو يكفيه ما يحصده من نثريات في اسفاره الكثيرة وهو رئيس لجنة الحكام وعضو الجمعية التنفيذية للاتحاد الافريقي.
• اهدافهم ..المزيد من الارباح والمكاسب.
• الكورة وين هنا؟.
• بتغشوا في منو انتوا؟.
• معتصم جعفر ذهب الآن ليكون رئيس لاتحاد سيكافا في الوقت الذي يقبل فيه منتخبنا القومي في كل يوم خسارة جديدة.
• في ظل هذه المطامع الشخصية – كيف تتقدم الكورة السودانية؟.
• طبيعي مع تلك (النجاحات) والمناصب التى يصلوا لها في الاتحادات القارية والاقليمية ان يتراجع المنتخب الوطني (44) درجة.
• وان يخسر المنتخب الذي يعزف له (السلام الوطني) خمس مرات على التوالي – ولا حس ولا وجود للبرلمان غير ان يصدر البرلمان بيانا يحيي فيه قادة الاتحاد العام.
• الى هذا وصلنا.
• وبلغت كورتنا ذلك المستوى.
• برلمانا السوداني لا يناقش قضية حلايب ولا قضايا السودانيين في مصر.
• لا ينافش ازمة الغاز.
• ولا العطالة.
• ولا الحاويات.
• ولا الاغذية الفاسدة.
• ولا اطفال المايقوما.
• برلمانا السوداني يناقش قضية رياضية ويكون لها (لجنة) – ثم لا نعرف حتى وقتنا هذا ما هو القرار الذي وصل له البرلمان.
• القضية دخلت البرلمان – اقنعوا منها زي قضية الاقطان.
• المفوضية رفعوا لها (القضية) ..فما اعطتنا عواد نافع – لا نعرفه ان كان قرار ترقيع لجنة الاستئنافات قانوني ام غير قانوني.
• ليس هناك لجنة تملك من الشجاعة ان تعلن عن قرارها ..كلهم اكتفوا بهذا الدور السري والعمل في المكاتب المغلقة.
• لتظل الازمة معلقة لاكثر من سبعة شهور.
• نحن فترنا من (السك) دا.
• لا الاتحاد العام ولا السلطة بمختلف مسمياتها من (لجنة رآب الصدع) التى كونها وزير الشباب والرياضة الى (المفوضية) ثم (البرلمان) – ثم ..وثم ..وثم ، عملت حاجة.
• كل هؤلاء لم يكن لهم دور في الازمة – فشلوا في ان يحلوا قضية رياضية عادية.
• بل زادوا تعقيدها.
• قضية لاعب يكسر الايقاف ويشارك في مباراة بصورة غير قانونية…وما في زول يسألو.
• هذا اللاعب منح فريقه نقاط مباراة هلال كادوقلي.
• وقدمت له نقاط مباراة الامل عطبرة في طبق من فضة عندما عادوا له المباراة.
• اما اللاعب الذي كسر ايقافه في اقل من اسبوع فقد قرر اتحاد كورة القدم ان يمنحه جائزة نجم الموسم.
• هو وسمير فضل ايضا نجم الموسم ..سمير الذي لا علاقة له بالقواعد والقوانين غير (لا اذكر).
• هذا الرجل الذي ادخلكم في الازمة الآن لا يعرف ان كان فريق برشلونة فريق اسباني ام هو من اندية الكنغو الديمقراطية.
• قاعدين ساكت.
• حفظوهم (النشيد) ودخلوهم اللجنة.
• هكذا اصبح الوسط الرياضي …رحل منه الطيب عبدالله وعبدالمجيد منصور وابوالعائلة وشاخور …واتوا امثال جمال الوالي واسامة ونسي الذين ادخلتهم (السياسة) وأتت بهم ليلخبطوا الموسم الرياضي بهذا الشكل.
• نعم السلطة هي التى افسدت الرياضة السودانية ..وذلك عندما ادخلت هذه الاسماء الى الوسط الرياضي.
• سمير فضل.
• والفاتح خضر.
• وجمال الوالي.
• ومعتصم جعفر.
• واسامة عطا المنان.
• السلطة التى آتت بهذه الاسماء فشلت في ان تحل القضية ..ومنحتنا قيادات رياضية هم نواب في البرلمان.
• مع ذلك البرلمان فشل في حل الازمة.
• مجدي شمس الدين عضو البرلمان وعضو المكتب التنفيذي للاتحاد الافريقي ورئيس لجنة الحكم في الكاف ورئيس اللجنة المنظمة.
• خليت شنو للدوري السوداني والمنتخب الوطني وانت موزع على هذا النحو بين المناصب والحوافز.
• اسامة عطا المنان ..عضو الحزب الاتحادي والنائب البرلماني ..وكمية من المناصب التى يشغل فيها منصب (المساعد)..ورافع الايقاف عن بكري المدينة.
• ازهري وداعة الله رئيس المفوضية وعضو البرلمان ..غير انه مازال يعمل بماكنية عضو مجلس المريخ السابق.
• كل الاسماء الموجودة في الساحة الرياضية الآن سوف نجد مهامها سياسية ، فهم اما اعضاء للبرلمان السوداني ام اعضاء لحزب سياسي.
• طبيعي في ظل هذه الاوضاع ان تحدد نتائح المباريات (لجنة الاستئنافات).
• طبيعي ان تكون المفوضية هى التى تمنح البطولة.
• وطبيعي جدا ان يفتي لنا اهل البرلمان في الشأن الفني في كورة القدم.
• هذا هو اتحادنا – ودي كورة القدم في السودان.
• قضية معلقة منذ سبعة شهور بدون حل.
• واندية انسحبت منذ شهر بدون ان نصل الى نتيجة.
• طبيعي ان تصبح لغة الرياضة في وجود همد (مسوؤل ولائي) واسامة ونسي القيادي البارز في الحزب الحاكم هي لغة (لن نذل ولن نهان ولن نطيع الامريكان).
• كورة القدم التى تسيرها (اللجان) لا تعطي غير الازمات والمشاكل والجراحات التى لا تنتهي.
• الآن يمكن ان نقول ان كورة القدم في السودان انتهت – وان تجميد النشاط الرياضي افضل من هذا الوضع الذي نحن فيه الآن.
• لا يعقل ولا يقبل ان يدفع اشرف الكاردينال اكثر من (60) مليار جنيه لبناء الجوهرة الزرقاء ثم يهدده (الحل) وهو الذي آتت به الجمعية العمومية.
• يقعد اسامة ونسي الذي آتت به (السلطة) ودعمته ..ويذهب اشرف الكاردينال الذي يدفع من جيبه للجوهرة الزرقاء (60) مليار جنيه.
• مؤسف جدا ان يدفع مجلس الهلال الحالي ورئيسه اشرف الكاردينال اكثر من (15) مليار في تسجيلات هذا الموسم – ونتائج المباريات يحددها اسامة عطا المنان وسمير فضل.
• نتائج المباريات تحدد بـ (التلفون) بعد نهاية المباراة.
• حق للمنتخب الوطني ان يتراجع (44) درجة في الليلة التى كان يحتفل بها معتصم جعفر بالفوز برئاسة اتحاد سيكافا.
• ذلك الاتحاد الذي لا يسوى (بصلة).
• ……….
• ملحوظة : ادخل علينا على الهوامش عليك الله ما تفقع مرارتنا ساكت.
هوامش
• وصلنا الى قناعة تامة ان كورة القدم في السودان لا جدوى منها.
• كضبة ساكت.
• وغشغشة في الناس.
• دي كورة شنو دي؟.
• دي لا كورة ولا حاجة.
• هسع ليكم شهر شفتوا ليكم كورة …والدوري شغال.
• بقينا ما بنلعب ..ويقولوا ليك الدوري شغال.
• الله يكون في العون.
• الليلة اقيفوا حداد على الكورة السودانية.
• قفلوا موبايلاتكم.
• كورة شنو؟.
• امس شفتوا مباراة ريال مدريد وبرشلونة شفتوا ليكم (لجنة) واحدة.
• شفتوا ليكم (تمديد موسم).
• عليكم الله – انسوا الموضوع دا.
• والعاوز يغترب يغترب طوالي – البلد دي بقى ما فيها الكورة.
• والله انا الكورة من دخلت (البرلمان) قنعت منها.
• لكن سكت ساي.
• قلت اشوف آخرها شنو؟.
• دي منيلة في ستين نيلة.
• ………..
• عاجل : ما تقلبوا الصفحة!!.

تعليقات الفيسبوك

تعليقات

الرد

لن يتم نشر عنوان بريدك الإلكتروني. الحقول الإلزامية مشار إليها بـ *