بابكر سلك : ماذا يحدث مع غرزة؟

بابكر سلك : ماذا يحدث مع غرزة؟

> أمس انعقدت الجمعيه العموميه للاتحاد السوداني لكرة القدم
> طبعاً هي اعلى سلطة لادارة نشاط كرة القدم في السودان
> وطلعت بقرارات
> منها اعتماد المريخ بطلاً للموسم
> وده ما جديد
> وطلعت بقرارات اخري رأت انها تحقق مصلحة النشاط في البلاد وللعباد
> ونحن باعتبارنا محترمين لدى القانون والقانون محترم لدينا
> ليس امامنا سوى القبول بقرارات الجمعيه احتراما لها كسلطة عليا لادارة العمل الكروي
> ولكن ننادي وبالصوت العالي بمراجعة قوانين الرياضه في البلاد
> وعلى الجمعيه العموميه للاتحاد السوداني ان تعمل على تقييم اللوائح التي تنظم النشاط ومراجعتها وجعلها ملائمه لما نعايشه
> حتي تجنبنا الكثير من الهفوات والاخفاقات والتفلتات والخروج على قواعد تآكلت اطرافها بعامل الزمن وجرف نهر العناد شواطئها
> ايها الناس
> القانون يتغير دوما ً
> لا يتغير عبطاً او من اجل التغيير
> بل لأنه يوضع لمصلحة المجتمع
> ومصالح المجتمع متغيرة ومتطورة بين الفينه والاخرى
> تتغير لأن المعطيات حولها تتغير بسرعه جنونيه في عالم اصبح التطور فيه لحظياً
> وفقهاء القانون يقولون ان تطور الجريمه السريع يستوجب تطوير القواعد القانونيه للتجريم والعقاب
> وكلما تطور القانون وتطورت وسائل مكافحة الجريمه اضطر المجرمون لتطوير مستوى الاداء الاجرامي لديهم
> الأمر الذي يدفع اهل القانون ومكافحة الجريمه للتسابق حول تطوير القوانين بما يلائم تطور الجريمة والنشاط الاجرامي
> ايها الناس
> من خصائص القاعده القانونيه انها مصحوبه بعقاب
> وهذا ما يميزها عن غيرها من القواعد الاجتماعيه كقواعد الاخلاق مثلاً.
> والعقاب في القانون يحقق شقين من المصالح
> شق منها هو تحقيق مصلحة الجماعه والمجتمع
> والشق الثاني هو تأديب وردع من يخالف تلك القواعد
> وبالرغم من فاعلية العقاب واعتباره ميزه تميز قواعد القانون
> الا ان القانون نفسه اسقط وجوب العقوبه بشروط وفي حالات محدده
> منها اذا كانت مصلحة المجتمع لا تتحقق بتلك العقوبه
> بالطبع في حالة اقتناع المخالف بجرمه
> في هذه الحاله تصبح العقوبه اصراراً على التشفي فقط لا تحقيقاً لمصلحة اجتماعيه
> وعرف القانون موانع العقاب
> كما عرف حالات اخرى يسقط فيها العقاب
> واقر بالحق في تخفيف العقاب وتشديده بحسب حالة كل مخالف على حده
> لذا لا نتدخل في قرار اسقاط العقاب الذي صدر من الجمعيه العموميه كسلطة اداريه عليا
> فقد تكون قد رأت ان مصلحة المجتمع ليست في توقيع العقاب على هذه الحاله
> ولكن ننادي بالاستفاده من الموقف عموماً
> وبمراجعة ما يحكم العمل الرياضي من قوانين ولوائح
> فضعف اللغة التي يكتب بها القانون قد تضعفه بجعله يقبل الاجتهاد واختلاف التفسير
> وتفتح باباً يستغله من يريد ان يتحايل على القانون والحق
> ايها الناس
> مبروك لينا دوري وكاس
> عقبال الكاش
> المهم
> غرزه ما بين مؤيد ومعارض
> ناس تقول الخواجه كضاب ونكار
> وناس تقول الخواجه حاشاهو ما نكار
> وتستند هذه الفئه إلى تصفيق الجماهير لغرزه وهو يحييها بعد اي مباراة افريقيه
> حب لم يجده مدرب من قبل
> اجماع لم تشوشه الا الشائعات التي استغلت خسارتنا من مازيمبي
> وحتى الذين يعارضون بقاء غرزه
> في ذاكرتهم ايضاً تلك العروض المبهره التي قدمها المريخ افريقيا
> وذلك الشكل الرائع
> ايها الناس
> ملكوا الجماهير الحقائق
> بشرط في وجود غرزه
> وانطونيو كمان
> عسى أن ينسى احد الخواجات فيذكره الآخر
> فقد تكون للرجل حقائق ايضاً يريد ان يملكها للجماهير
> المهم
> مجلس ونسي الفيهو مكفيهو
> يحتاج لالتفاف الناس حوله
> ويحتاج الناس من ونسي أن يفتح اضانو كويس
> ويسمع الكلام
> يستشير اهل الدرايه
> وما خاب من استشار
> قلت لي سيرة ذاتيه بتاعت منو يا انت؟
> سيرة ذاتيه يعني شنو يا انت؟
> وسيرة ذاتيه لي شنو يا انت؟
> لو جبنا سيرة «الاوط» بجينا ينط
> ايها الناس
> حمدتو اسم سيعشقه الشفوت قريباً
> لأنه موهوب وعاشق للكيان
> المهم
> مريخابي كبير ومتعصب شديد
> اخوهو مغترب في الامارات
> قام بتاع الامارات ضرب ليهو تلفون
> الو.. كيفك
> تماااام نحمد الله
> ظروفكم كيف والبلد كيف؟؟؟؟
> قلت ليك نحمد الله.. يعني الا احلف ليك؟
> مريخكم كيف؟
> احيييييييييييييييي انا
> ما تزعل … عندي ليك خبر يجنن
> شنو خبرك
> الليله اخوك جابوا ليهو تيمان اولاد؟
> ان شاء الله فيهم طرف شمال !!!!
> وتوت توت توت
> الخط قطع
> ايها الناس
> ان تنصروا الله ينصركم
> اها
> نجي لي شمارات والي الخرتوم
> كان شفت يا والينا
> آلاف الناس اغتربوا لينا
> آلاف السنين مغتربين لينا
> لي اسي يا والينا
> لا رسلوا لينا لا حولوا لينا
> وفيهم ناس ولا حاسين بينا يا والينا
> واذا جوا البلد تلقاهم رافعين القزاز ويعاينوا لينا
> لكن الايام دول بتلف وبتجينا
> بكرة البترول هناك ينشف وهنا يطلع لينا
> علي اليمين يا والينا
> اليوم داك يجي نجيب العربات بالالوان يا والينا
> ولما نمرق يكون لون العربيه ماتشنج مع اللبسه العلينا
> وكنتاكي ده يا والينا
> نعضيهو بس ونجدعو وننزل طلب جديد لينا
> بس اليوم ده يجي يا والينا
سلك كهربا
ننساك كيف والكلب قال كنتاكي ده كان وين لمن كنتوا بتفنقلوا الحمل برا سبب !!!!
والى لقاء.
سلك

تعليقات الفيسبوك

تعليقات

مقالات ذات صله

الرد

لن يتم نشر عنوان بريدك الإلكتروني. الحقول الإلزامية مشار إليها بـ *