محمد عبد الماجد : جمال الوالي فات..شيبوب البقعدو ليكم شنو في (البرد) دا؟

تلاتة شهور لجنة تسيير المريخ وقعت ليها في (برد) – يعني ما بفهموا ليك فيها أي حاجة
غايتو يا الكاردينال ..عمليتك دي (نجار) في الخشب ما بعملها..صلاح إدريس لو جابوها ليه في (محاية) ما بقدر عليها
وقت كان عادل أبو جريشة حايم في (صاج السمك) مع (الوك) بياكلوا في (السمك) – الكاردينال كان هناك حسم أي حاجة مع شيبوب
جمال الوالي دردق ليك (شيبوب) للكاردينال ..عشان ينسف ليك لجنة التسيير ، ويطلعها ليك أي كلام

لمن محي الدين عبد التام كان قاعد من (الوك) بتصوروا في (السيلفي) ، الكلام دا كان (الضهر) كدا ، والدنيا متراوحة زي جدول تلاتة – الكاردينال كان هناك بفكر ليه في حاجة تانية.
موضوع تاني خالص.
ولا بتفكروا فيه.
حاجة ما عندها علاقة بـ (السيستم).
سيستم شنو؟.
السيستم خليناهو ليك.
الموضوع ولا عندو علاقة بي أسامة عطا المنان .
حاجة بتجي من فوق.
من بره.
عشان محمد سيد أحمد ما يقعد يشرع لينا كتير.
وقت كان عادل أبو جريشة حايم في (صاج السمك) بياكل في (السمك) مع (الوك) – الكاردينال كان هناك حسم أي حاجة مع شيبوب.
ديل فاكرين التسجيلات (سيلفي).
قايلنها (سمك).
الموضوع أكبر من كدا.
التسجيلات التى تتم في (أعمدة الصحف) دي ذاتها لا (تسجيلات) ولا حاجة.
ما تغشوا نفسكم ساكت.
إعلام المريخ كلو بكتب عن لاعب ما شاهده اسمو (الوك).
وشيبوب بتسرب من بين أيديهم زي الضوء.
عارفين أبو جريشة بعد (السمك) طلع قال شنو في موضوع (شيبوب)؟.
(في تصريحات خص بها كفر ووتر قال الكابتن عادل أبو جريشة رئيس القطاع الرياضي بالمريخ في تعليقه على توقيع اللاعب شيبوب في كشوفات الملكية بناء توصية من رئيس الهلال الكاردينال قال لا نريد أن نسهب في الحديث ولكن نقول فقط : من لا يرغب في اللعب للمريخ فليذهب غير مأسوف عليه).
الكلام دا منك ولّا من السمك يا أبو جريشة؟.
غايتو يا الكاردينال ..عمليتك دي (نجار) في الخشب ما بعملها.
صلاح إدريس لو جابوها ليه في (محاية) ما بقدر عليها.
يا أبو جريشة لو طبقتو حكاية (من لا يرغب في اللعب للمريخ فليذهب غير مأسوف عليه)..ما بتلقوا ليكم لاعب واحد في المريخ.
خالد النعسان – الساهل دا ما بقعد ليكم.
سمك ما بتطلعوا بيه – خلوا (شيبوب).
الولد صغير في السن وموهوب.
وطويل القامة.
ومنضبط وما بتكلم كتير.
وبسمع محمد وردي.
وعمل ليه خبرة كويسة في فترة قصيرة وصل مرحلة دور الأربعة.
يعني كل المواصفات (الهلالية) منطبقة عليه.
أنت قايل يا أبو جريشة الناس ديل مقعداهم (الرغبة).
الناس ديل مقعداهم (الظروف).
مجبروين بس.
المعايش جبارة.
موضوع (شيبوب) دا فرتك ليك الجماعة.
طلع ليك جماعتنا من موضوع هيثم مصطفى.
الناس ما فاقوا من ضربة هيثم مصطفى – ظهرت ليهم ضربة (شيبوب).
قعدوا ينظروا لينا في موضوع هيثم مصطفى – وهم ما عارفين الحاصل عليهم شنو؟.
أتاري الكاردينال كان لابد ليهم بي شيء كتر.
الجماعة اتصدعوا ، اتفرتكوا ، وقعوا في الواطة ..الموضوع دا طلع فيه أكتر من (13) تصريح من قيادات المريخ.
موضوع شيبوب.
عارفين بتاع (السيلفي) قال شنو؟…حسب ما نشر أمس في المواقع نقلا عن الإذاعات.
(قال نائب الأمين العام لنادي المريخ المهندس محي الدين عبد التام إنهم في المريخ لم يتخذوا أي إجراء حالياً ولكن اللاعب لن يستطيع اللعب في السودان إلا للمريخ وفقاً للمادة 55 وعاد وقال : شيبوب لا زال لاعبنا ولن نتحرك ما لم يظهر جديد وقال إن ناديه قادر على حفظ حقوق اللاعب و ذكر في تصريحات إذاعية أن المريخ ينتظر خطوة بعد أن جمع الأدلة و الصور الدامغة لأن هذه الخطوة ستتبعها خطوات).
عبد التام قال المريخ لم يتخذ أي إجراء.
يا أخوي أنتوا ما في أيديكم حيلة.
أحسن تركز في (السيلفي) بتاعك.
إجراء شنو؟..أنت عاوز ترخص ليك عربية.
معقولة (الوك) تتصور لينا معاه (520) صورة يا عبد التام وتنزلها في المواقع.
الوك من ولدوه ما اتصور الصور التى اصورها مع عبد التام.
عليك اللـه يا عبد التام أنت زول جديد في الشغلة …شغال التسجيلات (كسر)..نقول ليك حاجة بتفيدك لي قدام…الأدلة والصور الدامغة بلوها وأشربوا مويتها.
أنت يا عبد التام آخر زول تتكلم عن (الصور).
أنت هسع في لجنة التسيير عندك شنو غير (الصور).
عليك اللـه في صور (دامغة).
يا زول شغل (المحليات) دا عليك اللـه ما تعملوا لينا في (الكورة).
أنتوا الناس ديل بتجيبوهم لينا من وين؟.
لكن في النهاية برضو بقول الغلطان في الموضوع دا ما عبد التام.
عبد التام شن خبرو.
غلطان جمال الوالي – لاعب زي دا بخلوه (هاوي).
معقولة بس.
أصلو ما في زول من ناس المريخ يهاجم أسامة ونسي.
هاجموا الوالي لو بتقدروا على الموضوع.
لو ما بتقدروا كمان – ما تفشوا غبينتكم في لجنة التسيير.
لجنة التسيير ما عندها أي ذنب.
جمال الوالي دردق ليك (شيبوب) للكاردينال ..عشان ينسف ليك لجنة التسيير ، ويطلعها ليك أي كلام.
جابو ليك (مدردق).
واللـه زي (شيبوب) دا ما بخلوه (هاوي).
الظاهر الوالي عاوز ينتهي ليك من (لجنة التسيير).
المسؤولية بتقع على المجلس الذي سجله (هاوي) – ما المجلس الذي فرط عليه.
الزول برضو أحسن يقول الحقيقة.
عشان ناس عبد التام ديل ما يروحوا فيها ساكت.
ناس عبد التام ديل عندهم تلاتة شهور – عاوزين تقطعوا لحمهم.
تلاتة شهور وقعت ليهم كمان في (البرد) – يعني ما بفهموا ليك فيها أي حاجة.
قنبلة شيبوب ..محمد سيد أحمد ذاتو أصابتو ليك.
طلع ليك فيها.
موضوع زي دا ما بفوتو ليك.
زولكم مريخابي ..وبمهد من الآن يجي في الانتخابات القادمة الأمين العام.
محمد سيد أحمد عارفنو قال شنو؟.
(قطع محمد سيد أحمد سر الختم مساعد رئيس اﻻتحاد باستحالة تسجيل الهلال للاعب شيبوب إلّا بعد أن يكمل عام ونصف حسب الماده 55 وأن تسجيله في أي فريق خارج السودان تسجيل سليم وأكد الجكومي في تصريحات إذاعية أن مجلس المريخ تنقصه الخبره والمال لذلك فرط في اللاعب الذي يعتبر لاعب إضافة حقيقية للفريق..فيما أكد موﻻنا الطيب العباسي القانوني المعروف أن اللاعب يمكن أن يعود ليسجل في الهلال خلال الفترةالتكميلية ..وأضاف أن ضم اللاعب للفريق يعتبر ضربة معلم لرئيس الهلال وشطاره منه ..وفيه مكر ودهاء يحسب لرئيس الهلال. وأضاف العباسي إن الفيفا تقف إلى جانب اللاعب وقانون الفيفا يسمح له بالتسجيل للاعب).
محمد سيد أحمد عاوز يتكلم لينا عن المادة 55.
أنتوا هسع في الاتحاد دا شغالين بي (مواد) – عشان تتكلم لينا عن المادة 55.
مادة شنو؟.
لو عندكم كلام غير المواد واللوائح أعملوه.
هذه التصريحات كانت كلام الإذاعات أمس ..لو جبت ليكم كلام مواقع التواصل الاجتماعي بتقفلوا نادي المريخ تلاتة يوم.
حداد رسمي.
جنس جرسة.
واللـه جرسة زي دي أنا عمري ما شفتها.
لدرجة أن واحد مريخابي (حقاني) قال شيلوا بكري المدينة ورجعوا لينا شيبوب.
بكري المدينة نحن نعمل بيه شنو؟.
نحن بكري المدينة لو عاوزنو كان رجعناهو بـ (لوزان).
بكري المدينة نعمل بيه شنو؟.
عاوزين نفتح لينا (دكان).
عاوزين (شيبوب) ولد صغير في السن.
وموهوب.
وطويل القامة.
وجاء الهلال برغبته.
شغل بتاع معلمين.
مزاج عال.
تاني أصلو ما عاوزين زول يجيب لينا سيرة السمك.
ولا السيستم.
ولا السيلفي.
الحاجات دي ما بتقدروا عليها.
أنتوا قايلين الكاردينال دا (الجوهرة الزرقاء) براها.
الزول دا بقى شغال (كورة).
كورة عديل كدا.
جاب ليك هيثم مصطفى في الإدارة (الفنية)..وشال ليك شيبوب.
تاني الناقص شنو؟.
كمان شيبوب دا مع الجوهرة الزرقاء بفتح ليكم فتح.
الزول دا في الحفرة ما قاعد يقصر ليه مع زول.
شيلوا شيلتكم.
……….
ملحوظة : الصدمة في البرد كعبة عديل كدا.
هوامش

إعلام المريخ ح يحاول يتجه نحو لجنة التسيير.
الجماعة ديل ما عندهم ذنب.
كما سوف يحاول إعلام المريخ (المكابرة).
والمغالطة.
كشف المريخ السنة دي ح يكون ناقص اتنين.
تراوري.
وشيبوب.
كان تعيدوا قيد بله جابر وأحمد الباشا.
بدل ما الخانات تقعد (فاضية).
المحيرني ..والما قادر استوعبه حتى الآن – الكاردينال حسم موضوع شيبوب دا في (البرد) دا كيف؟.
واللـه (البرد) موضوع بله جابر ما تقدر تحسمه.
أجمل ما في خبطة شيبوب.
زول موهوب.
وصغير في السن.
وطويل القامة.
وبسمع وردي كمان.
يا جماعة ما في طريقة – تسوقوا معاكم شيبوب معسكر تونس.
خلوه يدخل في التوليفة.
عشان شهر خمسة قرب.
باقى ليه خمسة شهور ونص.
كمان في (البرد) دا اليوم قصيّر شديد.
اللـه يستر على إبراهومة.
الزول دا (محترف).
لكن فترتو قربت.
يا أبو جريشة نقول ليك حاجة – ما في (سمك) بقعد ليه لاعب في الكشوفات.
عاوزين تسجلوا اللاعبين بالسمك.
بعدين الزعل في شنو؟.
جمال الوالي ما قعد ليكم.
عاوزين (شيبو) يقعد ليكم.
شيبو – خلاص بقى يفكر في حاجات عالية.
بقى يفكر في الجوهرة الزرقاء.
عاوزنو يقعد ليكم في استادكم المفتح دا – في البرد دا.
البرد دا ما برد (مريخ).
ولا حاجة.
فيصل موسى اتجه نحو هلال الأبيض.
وهو مكسب كبير لهلال التبلدي.
مهند الطاهر وفيصل موسى في هلال الأبيض …المتعة تأتى من عروس الرمال.
من أفضل التسجيلات هذا الموسم تسجيلات هلال الأبيض والأهلي شندي.
الهلال طبعاً تسجيلاته إلى الآن شغالة.
ضرب صاح.
في البرد دا.
…………
عاجل : الجماعة سنتهم كلها مركزين في (أمير كمال) ما عارفين (شيبو) هاوي.

تعليقات الفيسبوك

تعليقات

الرد

لن يتم نشر عنوان بريدك الإلكتروني. الحقول الإلزامية مشار إليها بـ *