بابكر سلك : العرجا لي مراحا

بابكر سلك : العرجا لي مراحا

> ان طال الزمن يا محمد عبد الماجد
> وان قصر الزمن
> خلال الطمنطاشر شهر العرجا لي مراحا
> وشيبون الا تشموهو قدحه
> او يتجنس ويلعب في منتخب دولة جنوب السودان ويريح رقبتو
> لكن لو جا البلد دي زيارة او تجاره
> العرجا لي مراحا
> ايها الناس
> الماده واضحه
> وحتي الحالات التي لا تنص عليها المواد القانونيه
> فإنها اي القواعد والنصوص القانونيه
> تفسر بحسب قصد المشرع وروح القانون
> وروح القانون في الحته دي
> منعت هروب اللاعب الوطني الهاوي من الهروب لدولة اجنبيه بوصفه محترفاً ليعود بكبري لداخل الوطن العزيز
> عشان كده اشترطت عودته لناديه واكمال فترته فيه حال عودته قبل ان يكمل الطمنطاشر شهر
> الا ناديهو يابي
> يعني قصة الاعاره دي بتدخل في الاحتيال على عودته لي ارض الوطن من الاتحاد الاجنبي
> وبتهدر الحق الذي قصد المشرع حمايته
> وهو حق النادي الوطني الذي كان اللاعب مقيداً به بصفة الهوايه
> وحق النادي الوطني هو الأجدر بالحمايه والرعايه
> لذا
> ولكل ذلك
> نلتمس من اهل الشأن تفسير هذه القاعده بما يحقق قصد المشرع
> ومن اسي
> قبل الفاس ما تقع في الراس
> ونبقى في انسحاب جديد
> وخروج على القانون تحت شعار الثوره
> والفرق كبير بين الثوره والفوضى
> الحته دي دايره افتاء من اهل الشأن قوي وواضح وصريح من اسي
> والداير ينسحب من اسي
> ينسحب
> الحته حتة قانون
> والقانون فتر من المجاملات واسقاط العقوبات والترضيات
> حتى لا ندخل بموسمنا الجديد مدخل التفلت الذي ادخلوا فيه الموسم الماضي
> حقو من اسي نوضح الحته دي
> ايها الناس
> القانون يجب ان يسبق الجريمه في التطور
> لأن الجريمه تتطور كل يوم وكل ساعه وكل لحظه
> وحتى نقفل الباب امام من يريد ان يجرم في حق اللوائح والقوانين الرياضيه
> حقو نفسر ما سكت عنه القانون لفظاً ونرده لما قصده روحاً
> عشان بعدين ما يقولوا لينا وينو النص
> المهم
> شيبون لن ينقص المريخ شيئاً
> ولن يضيف للهلال شيئاً
> يلعب في ملكيتو
> ولما يزهج يعتزل
> تاني كورة في البلد دي يا شيبون
> الا في البلي استيشن
> مهرجانات ساااااي
> المهم
> لسه 2870 لم يحقق لنا اهدافنا
> همتكم يا شفوت
> العشره جنيه علبة سجاير ما بتجيبها
> هي بتسوي شنو العشره الف
> ياخ ولد اخوي الصغير
> عمرو تلاته سنين
> اديتو عشره الف
> رماها في الواطه
> قال لي دايل الفيها بتله
> قصدو.. داير الفيها بقره
> والفيها بقره طبعا الخمسين
> قلت ليهو الفيها بتله قايلها بتسوي شئ يا حمودي؟!
> والله البقر كلو ما بسوي شيء
> يا حليلك
> ما حضرت الفيها جمل
> الفيها جمل كانت بتجيب تلاته دولار ونص يا حمودي
> وكان عندنا سينما
> وكان عندنا مواسم مسرحية
> وكان عندنا تبادل ثقافي
> كان بجونا في المهرجانات الحبش يفتو ويحتو
> وكان بجونا الكوريين
> انت قايل يا حمودي الكوريين ديل ظهروا مع الاتوز؟
> ابدا يا ولدي
> ديل ظهروا مع مهرجان الموسيقى والتفاعلات الثقافيه
> وكان شفت يا حمودي
> ام كلثوم جاتنا في البلد دي
> عملت حفله في المسرح القومي
> علي الطلاق
> وعملت لقاء في التلفزيون
> استضافها علي شمو
> وكان بجينا الملك فيصل وجمال عبد الناصر
> وجانا نيلسون مانديلا
> الوكت داك ما كان عندو جواز سفر يا حمودي
> استقبلناهو واديناهو جواز سفر دبلوماسي سوداني
> ياخ كارتر جانا
> لأننا كنا ما بنمشي لي ناس ما بجونا.. كنا كده يا حمودي
> كنا منظمين
> المطر في مواعيدو والمدرسه شهر سبعه
> القطر تزبط عليهو ساعتك
> كان عندنا قطر يا حمودي
> قاطعني وقال لي
> الكتل ده شنو؟
> قلت ليهو يا هو الكتل يا ولدي
> الكتل القطر منو؟
> القطر يا حمودي البجيبوهو في «زي افلام» وفي «ام بي سي بوليوود» و «زي الوان»
> البجي جاري ويقول تووووووت
> كان عندنا يا حمودي
> يجري حلفا ويجري كريمه ويجري عطبره ويجري الابيض ويجري بابنوسه ويمشي واو يا حمودي
> قال لي
> ضيعتوهو ليه يا عمو؟
> قلت ليهو ضيعناهو نحنا يا ولدي؟
> قال لي الضيعو منو يا عمو؟
> قلت ليهو ضاع براهو
> الولد ده ما داير يجيبها البر خلي بالك
> قال لي والجمل مرقتوهو من القروش ليه؟
> قلت ليهو من مرق يا حمودي روحنا مرقت معاهو
> من مرق من جنيهنا كوادرنا مرقت من البلد
> قام قال لي انتوا كعبين يا عمو
> قلت ليهو كعبين نحنا؟
> عينيك للفيل يا حمودي تطعن في عمو؟؟!!
> هيييي وهيييي وتاني هييييي
> ما تخلينا ندق الصفايح ونمرق الفضايح يا حمودي
> والله نحنا كان قمنا
> والله نفتو فت
> والزمن ده شعارو الشمار انا جبتو وانا ستو وانا قتتتتتتتتو
> قال لي والشمار ده بتضروهو متين؟!
> ايها الناس
> ان تنصروا الله ينصركم
> فتوهو
> اها
> نجي لي شمارات والي الخرتوم
> كان شفت يا والينا
> جنيهنا كان بجيب لينا ويجيب لينا
> اكياس تملي ايدينا
> اسي نملي بالجنيهات اكياس
> ونرجع مدلدلين ايدنا
> جنَّ الجنيه يا والينا
> ولا نحنا الجنينا !!!!
سلك كهربا
ننساك كيف والكلب لما يشوف الجنيه ببكي.. قرب يفرش والله العظيم.
وإلى لقاء
سلك

تعليقات الفيسبوك

تعليقات

مقالات ذات صله

الرد

لن يتم نشر عنوان بريدك الإلكتروني. الحقول الإلزامية مشار إليها بـ *