محمد عبد الماجد : لو عارفين الموضوع بيتطور كدا كنا قلنا ليكم (ما عبرت)

محمد عبد الماجد : لو عارفين الموضوع بيتطور كدا كنا قلنا ليكم (ما عبرت)

امس قريت عمود بابكر سلك – لقيت الزول حالتو صعبة – دخل ليك في حالة (فقدان الشهية).
سلك من يرفض (ام فتفت) حالتو معناتها صعبة.
تصبب عرق.
تصبب عرق في (البرد) دا.
ويا ريت لو الموضوع وقف هنا.
طشاش في العيون.
تضخم في الاوردة.
ارتفاع في درجات الحرارة.
مقاطعة الصحف.
الخروج من الواتس اب.
وشعور عام بالتجهم اللا ارادي.
والزوغانات بدون سبب منطقي من الشوارع والمناطق الضيقة.
معقولة دي كلها عملها فيكم انتقال (شيبوب) للملكية جوبا.
طيب الزول دا وقت ينتقل للهلال بتعملوا شنو؟.
بتقعدوا وين في البلد الضيقة دي؟.
سلك امس دخل ليك في حالة بتاعة (شك) عام.
اسهب ليك في (الشك).
فقد الثقة في اي شيء.
بقى يشك في اي حاجة.
اي حاجة يقول ليك ما في ذلك شك.
انت في (السلك) الدبلوماسي يا سلك.
شفتوا الزول من يقول ليك الكلمة دي (ما في ذلك شك) ..اعرفوه ما براهو.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
موضوع سلك دا ذكرني ليك (عائلة) معروفة كدا.
عائلة (تقليدية) في موضوع الموت دا.
العائلة دي كان اي زول وقت يبقى زول موت ..بقول ليهم اعملوا لي (شوربة كوارع).
شوربة الكوارع دي اخر طلب بالنسبة ليه.
ناس الحلة بي خبرتهم ..بيعرفوا ليك الزول بقى على الموت من يطلب ليه (شوربة كوارع).
شفتوا الزول فيهم من يقول عاوز لي (شوربة كوارع)..بيلزوا (7) صبيان على المقابر – عشان يوضبوا (المقبرة).
من (شوربة الكوارع) تنطرح في مشروع (الرغبات) 7 صبيان بمشوا على المقابر و7 بمشوا يجيبوا ليهم صيوان و7 بمشوا على التلج.
يوم داك مشينا على (التوم ود حجر)..قالوا شعر ليه بي (دوشة) الدكتور قال ليه تعمل لي فحوصات شاملة.
التوم ود حجر عمل الفحوصات كلها طلعت (نضيفة).
ما عندو اي حاجة.
الدكتور كتب ليه (خروج).
وخروج – دكاترة زمان ما كان بكتبوها بالساهل.
الواحد لو ما كان زي (الحصان) اصلو ما بيكتبو ليه (خروج).
التوم ود حجر كتبوا ليه (خروج)..طلع البيت ..ناس الحلة كلهم كرموا ليه.
التعبان فيهم جاب ليه (حمل).
في اليوم التالت من (الخروج) التوم ود حجر قاعد في الحوش في امان الله – فجأة كدا قال عاوز ليه (شوربة كوارع).
نفسو في (شوربة كوارع).
أهلو قدر ما حاولوا يقنعوه ويشيلوا من رأسو فكرة (شوربة الكوارع) دي ما قدرو.
ناس الحلة عرفوه بقى للموت.
شوربة الكوارع دي اصلو ما بمرق منها.
ما بطلع تاني.
طوالي حركوا مجموعاتهم السباعية …7 مشوا على المقابر ..و7 على الصيوان و 7 مشوا على التلج.
والكان فيهم جايب ليه (خروف) سحب خروفو.
اليوم التاني التوم ود حجر مات.
لقوه ميت في سريرو.
والله (كورية) شوربة الكوارع في حتتها …ما رجعوها.
هسع (سلك) عاوز يطبق لي نفس النظرية ..شغال لي العمود كلو (ما في ذلك شك).
والله انا ما قال الجملة دي ..عرفت ليك موضوع (شيبوب) داخل على الزول دا شديد.
يا سلك عاوز اسألك سؤال.
قبال موضوع شيبوب دا ..كنت بتحس انو شارع بيتكم دي ما بيتكم.
وانو بيتكم ذاتو ما بيتكم.
زي الداخل غلط.
شايف (اسلام) ذاتها بقى كلامها كتير.
وان (المروحة) شغالة وهي ما شغالة.
والتلاجة ما في حتتها.
والناس دي كلها شايفها (محمود المليجي – محمود المليجي).
الموضوع دا أكيد حصل ليك قبل انتقال شيبوب – لأنو الموضوع دا بي نفس التفاصيل حصل لي واحد مريخابي معانا في انتقال فييرا للهلال من المريخ.
ارتكاز يلاقى ارتكاز.
لو كنت بتشعر بالاعراض دي يا سلك ..بنقول ليك طيب الحاجات دي ما هي ذاتها مقدمة انتقال شيبوب للهلال.
قالوا ليك مريخابي امس شاف ليك الجرايد كلها (شيبوب).
المواقع كلها شيبوب.
يعني موقع (كووورة سودانية) امس مع متابعته لاخبار شيبوب جاب ليك في فد مرة (7) اخبار عن شيبوب.
شيبوب يغادر.
شيبوب يصل جوبا.
والله دي سيلفاكير ما لقاها.
قالوا ليك مع الحالة (الشيبوبية) دي ..في مريخابي رجع البيت الساعة 2.
زهجان وما طايق نفسو.
وعندو رأي في اي حاجة.
المريخابي دخل البيت جابو ليه (الغداء).
فتح الصحن لقى ليك الغداء (قرع).
كورك للمدام ..قال ليها الهلالاب ديل وصلوا لغاية هنا.
مية مرة انا ما قلت ليك (القرع) دا ما تجيبي لي سيرتو وقت الهلال يكون ضاربنا.
انا ما حذرتك.
المدام قالت ليه : وانا شن خبرني انو الهلال ضاربكم …الدوري انتهي والهلال انسحب والسيستم قفل – الهلال دا يضربكم وين؟.
المريخابي (اتفقع) ليك ..قال ليها الهلال ضربنا في (شيبوب).
ولد صغير.
وموهوب.
وطويل القامة.
وبلعب في الرديف.
ولسه ما شاف اي حاجة في الدنيا.
وخبرته عريضة.
ناس الهلال خطفوه.
المدام تصبر فيه.
وهو شغال ..والله لو شالوا مصعب عمر ما كان بنقول حاجة.
مصعب ذاتو سبب الخسارة امام مازيمبي.
لو شالوا راجي عبدالعاطي كان بنقول هو ذاتو بقى كبير.
ما كان بنزعل.
لو شالوا امير كمال …كان قلنا بقى (تقيل).
شال ليه (3) مليار ..عاوز يلعب ليكم تاني.
لكن يشيلوا (شيبوب) – هو ود متين؟.
والله لو ما ازمة الغاز ..كنا سكتنا.
لكن دي ازمة غاز يشيلوا فيها شيبوب.
دي حقارة بس.
حقارة بس من ناس الهلال.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
سلك امس طبعا استعرض حكاية (عبرت وما عبرت).
رجع لقون شيبوب الذي لم يحسب في الاتحاد الجزائري.
والله انا من شيبوب جاب ليه قون ما حسبوه – وقطع قلب المريخاب ..عرفتو الزول دا قاصدها.
عرفتو ح يجي الهلال.
الحركة دي ما بعملها إلّا زول هلالابي.
الكورة ذاتها بقت زي القسمة والنصيب.
يعني ما معروفة الظروف.
اللاعب يكون في المريخ.
فجأة تلقاه في الهلال.
لكن يا سلك عشان نرحمنك شوية الزول دا لو نحن عارفنو ح يجي الهلال ما كنا قعدنا نغالط فيكم.
كورتو طوالي كان بنحسبها ليه قون.
نحن عارفين المواضيع بتصل هنا.
قايلين (الجرة) بتصلنا.
لو عارفنها ما كان حرقنا دمنا ساكت.
الولد ولدنا – نغالط على شنو؟.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
…………..
و

المريخ السنة دي عندو تراوري ما ح يستفيد منو في الكشف الافريقي.
عندو شيبوب ما ح يستفيد منو.
عندو (الوك) ما ح يستفيد منو.
انتوا ح تلعبوا افريقيا بي منو؟.
عاوزين نعرف بس.
كمان قالوا ليك (جوبا) فيها برد.
ولدنا دا ما يقوم يضربو التهاب.
الكاردينال زي ما اشتغل في موضوع (ولاءالدين) مفروض يشتغل موضوع شيبوب.
يعني اللاعب بعد ما يوقع في الملكية مفروض يستلمو الهلال طوالي.
خاصة اللاعب (مصاب) وعاوز ليه علاج قبل (التكميلية).
مريخاب الجنوب ديل بقوموا يحولوا سير اللاعب زي الوك.
احسن شيبوب يكون معاكم.
وما تفكوه تاني للتسجيلات القادمة.
اصلا افريقيا ما ح يلعب مع الملكية جوبا.
ومصاب.
الملكية طبعا ح تعتبر سوقت هذا اللاعب ..يعني بتأخذ حقها على داير المليم.
خلوه معاكم.
امرقوه من الشمال والجنوب.
لا جنوب السودان ولا السودان.
احفظوه بعيدا عن متناول الاعين.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
…………….
السيدة (ل) – بتستهلكي (صمت) بي كميات.
وقرّط على كدا.

تعليقات الفيسبوك

تعليقات

مقالات ذات صله

الرد

لن يتم نشر عنوان بريدك الإلكتروني. الحقول الإلزامية مشار إليها بـ *